অথ একোনপঞ্চাশঃ সর্গঃ
ততঃ স কর্মণা তস্য বিস্মিতো ভীমবিক্রমঃ।
হনুমান্ ক্রোধতাম্রাক্ষো রক্ষোঽধিপমবৈক্ষত ॥১॥
ভ্রাজমানং মহার্হেণ কাঞ্চনেন বিরাজতা ।
মুক্তাজালবৃতেনাথ মুকুটেন মহাদ্যুতিম্ ॥২॥
বজ্রসংয়োগসংয়ুক্তৈর্মহার্হমণিবিগ্রহৈঃ।
হৈমৈরাভরণৈশ্চিত্রৈর্মনসেব প্রকল্পিতৈঃ॥৩॥
মহার্হক্ষৌমসংবীতং রক্তচন্দনরূষিতম্ ।
স্বনুলিপ্তং বিচিত্রাভির্বিবিধাভিশ্চ ভক্তিভিঃ॥৪॥
বিচিত্রং দর্শনীয়ৈশ্চ রক্তাক্ষৈর্ভীমদর্শনৈঃ।
দীপ্ততীক্ষ্ণমহাদংষ্ট্রং প্রলম্বং দশনচ্ছদৈঃ॥৫॥
শিরোভির্দশভির্বীরো ভ্রাজমানং মহৌজসং ।
নানাব্যালসমাকীর্ণৈঃ শিখরৈরিব মন্দরম্ ॥৬॥
নীলাঞ্জনচয়প্রখ্যং হারেণোরসি রাজতা ।
পূর্ণচন্দ্রাভবক্ত্রেণ সবালার্কমিবাম্বুদম্ ॥৭॥
বাহুভির্বদ্ধকেয়ূরৈশ্চন্দনোত্তমরূষিতৈঃ।
ভ্রাজমানাঙ্গদৈর্ভীমৈঃ পঞ্চশীর্ষৈরিবোরগৈঃ॥৮॥
মহতি স্ফাটিকে চিত্রে রত্নসংয়োগচিত্রিতে ।
উত্তমাস্তরণাস্তীর্ণে সূপবিষ্টং বরাসনে ॥৯॥
অলঙ্কৃতাভিরত্যর্থং প্রমদাভিঃ সমন্ততঃ।
বালব্যজনহস্তাভিরারাৎসমুপসেবিতম্ ॥১০॥
দুর্ধরেণ প্রহস্তেন মহাপার্শ্বেন রক্ষসা ।
মন্ত্রিভির্মন্ত্রতত্ত্বজ্ঞৈর্নিকুম্ভেন চ মন্ত্রিণা ॥১১॥
উপোপবিষ্টং রক্ষোভিশ্চতুর্ভির্বলদর্পিতম্ ।
কৃৎস্নং পরিবৃতং লোকং চতুর্ভিরিব সাগরৈঃ॥১২॥
মন্ত্রিভির্মন্ত্রতত্ত্বজ্ঞৈরন্যৈশ্চ শুভদর্শিভিঃ।
আশ্বাস্যমানং সচিবৈঃ সুরৈরিব সুরেশ্বরম্ ॥১৩॥
অপশ্যদ্রাক্ষসপতিং হনূমানতিতেজসং ।
বেষ্ঠিতং মেরুশিখরে সতোয়মিব তোয়দম্ ॥১৪॥
স তৈঃ সম্পীড্যমানোঽপি রক্ষোভির্ভীমবিক্রমৈঃ।
বিস্ময়ং পরমং গত্বা রক্ষোঽধিপমবৈক্ষত ॥১৫॥
ভ্রাজমানং ততো দৃষ্ট্বা হনুমান্রাক্ষসেশ্বরম্ ।
মনসা চিন্তয়ামাস তেজসা তস্য মোহিতঃ॥১৬॥
অহো রূপমহো ধৈর্যমহো সত্ত্বমহো দ্যুতিঃ।
অহো রাক্ষসরাজস্য সর্বলক্ষণয়ুক্ততা ॥১৭॥
যদ্যধর্মো ন বলবান্স্যাদয়ং রাক্ষসেশ্বরঃ।
স্যাদয়ং সুরলোকস্য সশক্রস্যাপি রক্ষিতা ॥১৮॥
অস্য ক্রূরৈর্নৃশংসৈশ্চ কর্মভির্লোককুৎসিতৈঃ।
সর্বে বিভ্যতি খল্বস্মাল্লোকাঃ সামরদানবাঃ॥১৯॥
অয়ং হ্যুৎসহতে ক্রুদ্ধঃ কর্তুমেকার্ণবং জগৎ ।
ইতি চিন্তাং বহুবিধামকরোন্মতিমান্কপিঃ।
দৃষ্ট্বা রাক্ষসরাজস্য প্রভাবমমিতৌজসঃ॥২০॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে একোনপঞ্চাশঃ সর্গঃ