অথ পঞ্চাশঃ সর্গঃ
তমুদ্বীক্ষ্য মহাবাহুঃ পিঙ্গাক্ষং পুরতঃ স্থিতম্ ।
রোষেণ মহতাঽঽবিষ্টো রাবণো লোকরাবণঃ॥১॥
শঙ্কাহতাত্মা দধ্যৌ স কপীন্দ্রং তেজসাবৃতম্ ।
কিমেষ ভগবান্নন্দী ভবেৎসাক্ষাদিহাগতঃ॥২॥
যেন শপ্তোঽস্মি কৈলাসে ময়া প্রহসিতে পুরা ।
সোঽয়ং বানরমূর্তিঃ স্যাৎকিংস্বিদ্বাণোঽপি বাসুরঃ॥৩॥
স রাজা রোষতাম্রাক্ষঃ প্রহস্তং মন্ত্রিসত্তমম্ ।
কালয়ুক্তমুবাচেদং বচো বিপুলমর্থবৎ ॥৪॥
দুরাত্মা পৃচ্ছ্যতামেষ কুতঃ কিং বাস্য কারণম্ ।
বনভঙ্গে চ কোঽস্যার্থো রাক্ষসানাং চ তর্জনে ॥৫॥
মৎপুরীমপ্রধৃষ্যাং বৈ গমনে কিং প্রয়োজনম্ ।
আয়োধনে বা কিং কার্যং পৃচ্ছয়তামেষ দুর্মতিঃ॥৬॥
রাবণস্য বচঃ শ্রুত্বা প্রহস্তো বাক্যমব্রবীৎ ।
সমাশ্বসিহি ভদ্রং তে ন ভীঃ কার্যা ত্বয়া কপে ॥৭॥
যদি তাবত্ত্বমিন্দ্রেণ প্রেষিতো রাবণালয়ম্ ।
তত্ত্বমাখ্যাহি মা তে ভূদ্ভয়ং বানর মোক্ষ্যসে ॥৮॥
যদি বৈশ্রবণস্য ত্বং যমস্য বরুণস্য চ ।
চারুরূপমিদং কৃত্বা প্রবিষ্টো নঃ পুরীমিমাম্ ॥৯॥
বিষ্ণুনা প্রেষিতো বাপি দূতো বিজয়কাঙ্ক্ষিণা ।
নহি তে বানরং তেজো রূপমাত্রং তু বানরম্ ॥১০॥
তত্ত্বতঃ কথয়স্বাদ্য ততো বানর মোক্ষ্যসে ।
অনৃতং বদতশ্চাপি দুর্লভং তব জীবিতম্ ॥১১॥
অথবা যন্নিমিত্তস্তে প্রবেশো রাবণালয়ে ।
এবমুক্তো হরিবরস্তদা রক্ষোগণেশ্বরম্ ॥১২॥
অব্রবীন্নাস্মি শক্রস্য যমস্য বরুণস্য চ ।
ধনদেন ন মে সখ্যং বিষ্ণুনা নাস্মি চোদিতঃ॥১৩॥
জাতিরেব মম ত্বেষা বানরোঽহমিহাগতঃ।
দর্শনে রাক্ষসেন্দ্রস্য তদিদং দুর্লভং ময়া ॥১৪॥
বনং রাক্ষসরাজস্য দর্শনার্থং বিনাশিতম্ ।
ততস্তে রাক্ষসাঃ প্রাপ্তা বলিনো যুদ্ধকাঙ্ক্ষিণঃ॥১৫॥
রক্ষণার্থং চ দেহস্য প্রতিয়ুদ্ধা ময়া রণে ।
অস্ত্রপাশৈর্ন শক্যোঽহং বদ্ধুং দেবাসুরৈরপি ॥১৬॥
পিতামহাদেষ বরো মমাপি হি সমাগতঃ।
রাজানং দ্রষ্টুকামেন ময়াস্ত্রমনুবর্তিতম্ ॥১৭॥
বিমুক্তোঽপ্যহমস্ত্রেণ রাক্ষসৈস্ত্বভিবেদিতঃ।
কেনচিদ্ রামকার্যেণ আগতোঽস্মি তবান্তিকম্ ॥১৮॥
দূতোঽহমিতি বিজ্ঞায় রাঘবস্যামিতৌজসঃ।
শ্রূয়তামেব বচনং মম পথ্যমিদং প্রভো ॥১৯॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে পঞ্চাশঃ সর্গঃ