অথ একপঞ্চাশঃ সর্গঃ তং সমীক্ষ্য মহাসত্ত্বং সত্ত্ববান্ হরিসত্তমঃ। বাক্যমর্থবদব্যগ্রস্তমুবাচ দশাননম্ ॥১॥ অহং সুগ্রীবসন্দেশাদিহ প্রাপ্তস্তবান্তিকে । রাক্ষসেশ হরীশস্ত্বাং ভ্রাতা কুশলমব্রবীৎ ॥২॥ ভ্রাতুঃ শৃণু সমাদেশং সুগ্রীবস্য মহাত্মনঃ। ধর্মার্থসহিতং বাক্যমিহ চামুত্র চ ক্ষমম্ ॥৩॥ রাজা দশরথো নাম রথকুঞ্জরবাজিমান্ । পিতেব বন্ধুর্লোকস্য সুরেশ্বরসমদ্যুতিঃ॥৪॥ জ্যেষ্ঠস্তস্য মহাবাহুঃ পুত্রঃ প্রিয়তরঃ প্রভুঃ। পিতুর্নিদেশান্নিষ্ক্রান্তঃ প্রবিষ্টো দণ্ডকাবনম্ ॥৫॥ লক্ষ্মণেন সহ ভ্রাত্রা সীতয়া সহ ভার্যযা । রামো নাম মহাতেজা ধর্ম্যং পন্থানমাশ্রিতঃ॥৬॥ তস্য ভার্যা জনস্থানে ভ্রষ্টা সীতেতি বিশ্রুতা । বৈদেহস্য সুতা রাজ্ঞো জনকস্য মহাত্মনঃ॥৭॥ মার্গমাণস্তু তাং দেবীং রাজপুত্রঃ সহানুজঃ। ঋষ্যমূকমনুপ্রাপ্তঃ সুগ্রীবেণ চ সঙ্গতঃ॥৮॥ তস্য তেন প্রতিজ্ঞাতং সীতায়াঃ পরিমার্গণম্ । সুগ্রীবস্যাপি রামেণ হরিরাজ্যং নিবেদিতুম্ ॥৯॥ ততস্তেন মৃধে হত্বা রাজপুত্রেণ বালিনম্ । সুগ্রীবঃ স্থাপিতো রাজ্যে হর্যৃক্ষাণাং গণেশ্বরঃ॥১০॥ ত্বয়া বিজ্ঞাতপূর্বশ্চ বালী বানরপুঙ্গবঃ। স তেন নিহতঃ সঙ্খ্যে শরেণৈকেন বানরঃ॥১১॥ স সীতামার্গণে ব্যগ্রঃ সুগ্রীবঃ সত্যসঙ্গরঃ। হরীন্সম্প্রেষয়ামাস দিশঃ সর্বা হরীশ্বরঃ॥১২॥ তাং হরীণাং সহস্রাণি শতানি নিয়ুতানি চ । দিক্ষু সর্বাসু মার্গন্তে হ্যধশ্চোপরি চাম্বরে ॥১৩॥ বৈনতেয়সমাঃ কেচিৎকেচিত্তত্রানিলোপমাঃ। অসঙ্গগতয়ঃ শীঘ্রা হরিবীরা মহাবলাঃ॥১৪॥ অহং তু হনুমান্নাম মারুতস্যৌরসঃ সুতঃ। সীতায়াস্তু কৃতে তূর্ণং শতয়োজনমায়তম্ ॥১৫॥ সমুদ্রং লঙ্ঘয়িত্বৈব ত্বাং দিদৃক্ষুরিহাগতঃ। ভ্রমতা চ ময়া দৃষ্টা গৃহে তে জনকাত্মজা ॥১৬॥ তদ্ভবান্দৃষ্টধর্মার্থস্তপঃ কৃতপরিগ্রহঃ। পরদারান্মহাপ্রাজ্ঞ নোপরোদ্ধুং ত্বমর্হসি ॥১৭॥ নহি ধর্মবিরুদ্ধেষু বহ্বপায়েষু কর্মসু । মূলঘাতিষু সজ্জন্তে বুদ্ধিমন্তো ভবদ্বিধাঃ॥১৮॥ কশ্চ লক্ষ্মণমুক্তানাং রামকোপানুবর্তিনাম্ । শরাণামগ্রতঃ স্থাতুং শক্তো দেবাসুরেষ্বপি ॥১৯॥ ন চাপি ত্রিষু লোকেষু রাজন্বিদ্যেত কশ্চন । রাঘবস্য ব্যলীকং যঃ কৃত্বা সুখমবাপ্নুয়াৎ ॥২০॥ তৎ ত্রিকালহিতং বাক্যং ধর্ম্যমর্থানুয়ায়ি চ । মন্যস্ব নরদেবায় জানকী প্রতিদীয়তাম্ ॥২১॥ দৃষ্টা হীয়ং ময়া দেবী লব্ধং যদিহ দুর্লভম্ । উত্তরং কর্ম যচ্ছেষং নিমিত্তং তত্র রাঘবঃ॥২২॥ লক্ষিতেয়ং ময়া সীতা তথা শোকপরায়ণা । গৃহে যাং নাভিজানাসি পঞ্চাস্যামিব পন্নগীম্ ॥২৩॥ নেয়ং জরয়িতুং শক্যা সাসুরৈরমরৈরপি । বিষসংস্পৃষ্টমত্যর্থং ভুক্তমন্নমিবৌজসা ॥২৪॥ তপঃসন্তাপলব্ধস্তে যোঽয়ং ধর্মপরিগ্রহঃ। ন স নাশয়িতুং ন্যায়্য আত্মপ্রাণপরিগ্রহঃ॥২৫॥ অবধ্যতাং তপোভির্যাং ভবান্সমনুপশ্যতি । আত্মনঃ সাসুরৈর্দেবৈর্হেতুস্তত্রাপ্যযং মহান্ ॥২৬॥ সুগ্রীবো ন চ দেবোঽয়ং ন যক্ষো ন চ রাক্ষসঃ। মানুষো রাঘবো রাজন্ সুগ্রীবশ্চ হরীশ্বরঃ। তস্মাৎ প্রাণপরিত্রাণং কথং রাজন্করিষ্যসি ॥২৭॥ ন তু ধর্মোপসংহারমধর্মফলসংহিতম্ । তদেব ফলমন্বেতি ধর্মশ্চাধর্মনাশনঃ॥২৮॥ প্রাপ্তং ধর্মফলং তাবদ্ভবতা নাত্র সংশয়ঃ। ফলমস্যাপ্যধর্মস্য ক্ষিপ্রমেব প্রপৎস্যসে ॥২৯॥ জনস্থানবধং বুদ্ধ্বা বালিনশ্চ বধং তথা । রামসুগ্রীবসখ্যং চ বুদ্ধ্যস্ব হিতমাত্মনঃ॥৩০॥ কামং খল্বহমপ্যেকঃ সবাজিরথকুঞ্জরাম্ । লঙ্কাং নাশয়িতুং শক্তস্তস্যৈষ তু ন নিশ্চয়ঃ॥৩১॥ রামেণ হি প্রতিজ্ঞাতং হর্যৃক্ষগণসংনিধৌ । উৎসাদনমমিত্রাণাং সীতা যৈস্তু প্রধর্ষিতা ॥৩২॥ অপকুর্বন্হি রামস্য সাক্ষাদপি পুরন্দরঃ। ন সুখং প্রাপ্নুয়াদন্যঃ কিং পুনস্ত্বদ্বিধো জনঃ॥৩৩॥ যাং সীতেত্যভিজানাসি যেয়ং তিষ্ঠতি তে গৃহে । কালরাত্রীতি তাং বিদ্ধি সর্বলঙ্কাবিনাশিনীম্ ॥৩৪॥ তদলং কালপাশেন সীতা বিগ্রহরূপিণা । স্বয়ং স্কন্ধাবসক্তেন ক্ষেমমাত্মনি চিন্ত্যতাম্ ॥৩৫॥ সীতায়াস্তেজসা দগ্ধাং রামকোপপ্রদীপিতাম্ । দহ্যমানামিমাং পশ্য পুরীং সাট্টপ্রতোলিকাম্ ॥৩৬॥ স্বানি মিত্রাণি মন্ত্রীংশ্চ জ্ঞাতীন্ ভাত্রৃন্ সুতান্ হিতান্ । ভোগান্দারাংশ্চ লঙ্কাং চ মা বিনাশমুপানয় ॥৩৭॥ সত্যং রাক্ষসরাজেন্দ্র শৃণুষ্ব বচনং মম । রামদাসস্য দূতস্য বানরস্য বিশেষতঃ॥৩৮॥ সর্বান্ লোকান্ সুসংহৃত্য সভূতান্ সচরাচরান্ । পুনরেব তথা স্রষ্টুং শক্তো রামো মহায়শাঃ॥৩৯॥ দেবাসুরনরেন্দ্রেষু যক্ষরক্ষোরগেষু চ । বিদ্যাধরেষু নাগেষু গন্ধর্বেষু মৃগেষু চ ॥৪০॥ সিদ্ধেষু কিন্নরেন্দ্রেষু পতত্ত্রিষু চ সর্বতঃ। সর্বত্র সর্বভূতেষু সর্বকালেষু নাস্তি সঃ॥৪১॥ যো রামং প্রতিয়ুধ্যেত বিষ্ণুতুল্যপরাক্রমম্ । সর্বলোকেশ্বরস্যেহ কৃত্বা বিপ্রিয়মীদৃশম্ । রামস্য রাজসিংহস্য দুর্লভং তব জীবিতম্ ॥৪২॥ দেবাশ্চ দৈত্যাশ্চ নিশাচরেন্দ্র গন্ধর্ববিদ্যাধরনাগয়ক্ষাঃ। রামস্য লোকত্রয়নায়কস্য স্থাতুং ন শক্তাস্সমরেষু সর্বে ॥৪৩॥ ব্রহ্মা স্বয়ম্ভূশ্চতুরাননো বা রুদ্রস্ত্রিনেত্রস্ত্রিপুরান্তকো বা । ইন্দ্রো মহেন্দ্রস্সুরনায়কো বা স্থাতুং ন শক্তা যুধি রাঘবস্য ॥৪৪॥ স সৌষ্ঠবোপেতমদীনবাদিনঃ কপের্নিশম্যাপ্রতিমোঽপ্রিয়ং বচঃ। দশাননঃ কোপবিবৃত্তলোচনঃ সমাদিশত্তস্য বধং মহাকপেঃ॥৪৫॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে একপঞ্চাশঃ সর্গঃ