অথ দ্বিপঞ্চাশঃ সর্গঃ স তস্য বচনং শ্রুত্বা বানরস্য মহাত্মনঃ। আজ্ঞাপয়দ্বধং তস্য রাবণঃ ক্রোধমূর্ছিতঃ॥১॥ বধে তস্য সমাজ্ঞপ্তে রাবণেন দুরাত্মনা । নিবেদিতবতো দৌত্যং নানুমেনে বিভীষণঃ॥২॥ তং রক্ষোঽধিপতিং ক্রুদ্ধং তচ্চ কার্যমুপস্থিতম্ । বিদিত্বা চিন্তয়ামাস কার্যং কার্যবিধৌ স্থিতঃ॥৩॥ নিশ্চিতার্থস্ততঃ সাম্না পূজ্যং শত্রুজিদগ্রজম্ । উবাচ হিতমত্যর্থং বাক্যং বাক্যবিশারদঃ॥৪॥ ক্ষমস্ব রোষং ত্যজ রাক্ষসেন্দ্র প্রসীদ মে বাক্যমিদং শৃণুষ্ব । বধং ন কুর্বন্তি পরাবরজ্ঞা দূতস্য সন্তো বসুধাধিপেন্দ্রাঃ॥৫॥ রাজন্ধর্মবিরুদ্ধং চ লোকবৃত্তেশ্চ গর্হিতম্ । তব চাসদৃশং বীর কপেরস্য প্রমাপণম্ ॥৬॥ ধর্মজ্ঞশ্চ কৃতজ্ঞশ্চ রাজধর্মবিশারদঃ। পরাবরজ্ঞো ভূতানাং ত্বমেব পরমার্থবিৎ ॥৭॥ গৃহ্যন্তে যদি রোষেণ ত্বাদৃশোঽপি বিচক্ষণাঃ। ততঃ শাস্ত্রবিপশ্চিত্ত্বং শ্রম এব হি কেবলম্ ॥৮॥ তস্মাৎপ্রসীদ শত্রুঘ্ন রাক্ষসেন্দ্র দুরাসদ । যুক্তায়ুক্তং বিনিশ্চিত্য দূতদণ্ডো বিধীয়তাম্ ॥৯॥ বিভীষণবচঃ শ্রুত্বা রাবণো রাক্ষসেশ্বরঃ। কোপেন  মহতাঽঽবিষ্টো বাক্যমুত্তরমব্রবীৎ ॥১০॥ ন পাপানাং বধে পাপং বিদ্যতে শত্রুসূদন । তস্মাদিমং বধিষ্যামি বানরং পাপকারিণম্ ॥১১॥ অধর্মমূলং বহুদোষয়ুক্ত- মনার্যজুষ্টং বচনং নিশম্য । উবাচ বাক্যং পরমার্থতত্ত্বং বিভীষণো বুদ্ধিমতাং বরিষ্ঠঃ॥১২॥ প্রসীদ লঙ্কেশ্বর রাক্ষসেন্দ্র ধর্মার্থতত্বং বচনং শৃণুষ্ব । দূতা ন বধ্যাঃ সময়েষু রাজন্ সর্বেষু সর্বত্র বদন্তি সন্তঃ॥১৩॥ অসংশয়ং শত্রুরয়ং প্রবৃদ্ধঃ কৃতং হ্যনেনাপ্রিয়মপ্রমেয়ম্ । ন দূতবধ্যাং প্রবদন্তি সন্তো দূতস্য দৃষ্টা বহবো হি দণ্ডাঃ॥১৪॥ বৈরূপ্যমঙ্গেষু কশাভিঘাতো মৌণ্ড্যং তথা লক্ষণসংনিপাতঃ। এতান্হি দূতে প্রবদন্তি দণ্ডান্ বধস্তু দূতস্য ন নঃ শ্রুতোঽস্তি ॥১৫॥ কথং চ ধর্মার্থবিনীতবুদ্ধিঃ পরাবরপ্রত্যযনিশ্চিতার্থঃ। ভবদ্বিধঃ কোপবশে হি তিষ্ঠেৎ কোপং ন গচ্ছন্তি হি সত্ত্ববন্তঃ॥১৬॥ ন ধর্মবাদে ন চ লোকবৃত্তে ন শাস্ত্রবুদ্ধিগ্রহণেষু বাপি । বিদ্যেত কশ্চিত্তব বীর তুল্য- স্ত্বং হ্যুত্তমঃ সর্বসুরাসুরাণাম্ ॥১৭॥ পরাক্রমোৎসাহমনস্বিনাং চ সুরাসুরাণামপি দুর্জয়েন । ত্বয়াপ্রমেয়েণ সুরেন্দ্রসঙ্ঘা জিতাশ্চ যুদ্ধেষ্বসকৃন্নরেন্দ্রাঃ॥১৮॥ ইত্থংবিধস্যামরদৈত্যশত্রোঃ শূরস্য বীরস্য তবাজিতস্য । কুর্বন্তি বীরা মনসাপ্যলীকং প্রাণৈর্বিমুক্তা ন তু ভোঃ পুরা তে ॥১৯॥ ন চাপ্যস্য কপের্ঘাতে কঞ্চিৎপশ্যাম্যহং গুণম্ । তেষ্বয়ং পাত্যতাং দণ্ডো যৈরয়ং প্রেষিতঃ কপিঃ॥২০॥ সাধুর্বা যদি বাসাধুঃ পরৈরেষ সমর্পিতঃ। ব্রুবন্পরার্থং পরবান্ন দূতো বধমর্হতি ॥২১॥ অপি চাস্মিন্হতে নান্যং রাজন্ পশ্যামি খেচরম্ । ইহ যঃ পুনরাগচ্ছেৎপরং পারং মহোদধেঃ॥২২॥ তস্মান্নাস্য বধে যত্নঃ কার্যঃ পরপুরঞ্জয় । ভবান্সেন্দ্রেষু দেবেষু যত্নমাস্থাতুমর্হতি ॥২৩॥ অস্মিন্বিনষ্টে ন হি ভূতমন্যং পশ্যামি যস্তৌ নররাজপুত্রৌ । যুদ্ধায় যুদ্ধপ্রিয়দুর্বিনীতা- বুদ্যোজয়েদ্ বৈ ভবতা বিরুদ্ধৌ ॥২৪॥ পরাক্রমোৎসাহমনস্বিনাং চ সুরাসুরাণামপি দুর্জয়েন । ত্বয়া মনোনন্দন নৈরৃতানাং যুদ্ধায় নির্নাশয়িতুং ন যুক্তম্ ॥২৫॥ হিতাশ্চ শূরাশ্চ সমাহিতাশ্চ কুলেষু জাতাশ্চ মহাগুণেষু । মনস্বিনঃ শস্ত্রভৃতাং বরিষ্ঠাঃ কোপপ্রশস্তাঃ সুভৃতাশ্চ যোধাঃ॥২৬॥ তদেকদেশে ন বলস্য তাবৎ কেচিত্তবাদেশকৃতোঽদ্য যান্তু । তৌ রাজপুত্রাবুপগৃহ্য মূঢৌ পরেষু তে ভাবয়িতুং প্রভাবম্ ॥২৭॥ নিশাচরাণামধিপোঽনুজস্য বিভীষণস্যোত্তমবাক্যমিষ্টম্ । জগ্রাহ বুদ্ধ্যা সুরলোকশত্রু- র্মহাবলো রাক্ষসরাজমুখ্যঃ॥২৮॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে দ্বিপঞ্চাশঃ সর্গঃ