অথ ত্রিপঞ্চাশঃ সর্গঃ তস্য তদ্বচনং শ্রুত্বা দশগ্রীবো মহাত্মনঃ। দেশকালহিতং বাক্যং ভ্রাতুরুত্তমমব্রবীৎ ॥১॥ সম্যগুক্তং হি ভবতা দূতবধ্যা বিগর্হিতা । অবশ্যং তু বধায়ান্যঃ ক্রিয়তামস্য নিগ্রহঃ॥২॥ কপীনাং কিল লাঙ্গূলমিষ্টং ভবতি ভূষণম্ । তদস্য দীপ্যতাং শীঘ্রং তেন দগ্ধেন গচ্ছতু ॥৩॥ ততঃ পশ্যন্ত্বমুং দীনমঙ্গবৈরূপ্যকর্শিতম্ । সুমিত্রজ্ঞাতয়ঃ সর্বে বান্ধবাঃ সসুহৃজ্জনাঃ॥৪॥ আজ্ঞাপয়দ্রাক্ষসেন্দ্রঃ পুরং সর্বং সচত্বরম্ । লাঙ্গূলেন প্রদীপ্তেন রক্ষোভিঃ পরিণীয়তাম্ ॥৫॥ তস্য তদ্বচনং শ্রুত্বা রাক্ষসাঃ কোপকর্কশাঃ। বেষ্টন্তে তস্য লাঙ্গূলং জীর্ণৈঃ কার্পাসিকৈঃ পটৈঃ॥৬॥ সংবেষ্ট্যমানে লাঙ্গূলে ব্যবর্ধত মহাকপিঃ। শুষ্কমিন্ধনমাসাদ্য বনেষ্বিব হুতাশনম্ ॥৭॥ তৈলেন পরিষিচ্যাথ তেঽগ্নিং তত্রোপপাদয়ন্ । লাঙ্গূলেন প্রদীপ্তেন রাক্ষসাংস্তানতাডয়ৎ ॥৮॥ রোষামর্ষপরীতাত্মা বালসূর্যসমাননঃ। স ভূয়ঃ সঙ্গতৈঃ ক্রূরৈর্রাক্ষসৈর্হরিপুঙ্গবঃ॥৯॥ সহস্রীবালবৃদ্ধাশ্চ জগ্মুঃ প্রীতিং নিশাচরাঃ। নিবদ্ধঃ কৃতবান্বীরস্তৎকালসদৃশীং মতিম্ ॥১০॥ কামং খলু ন মে শক্তা নিবদ্ধস্যাপি রাক্ষসাঃ। ছিত্ত্বা পাশান্সমুৎপত্য হন্যামহমিমান্পুনঃ॥১১॥ যদি ভর্তৃহিতার্থায় চরন্তং ভর্তৃশাসনাৎ । নিবধ্নন্তে দুরাত্মানো ন তু মে নিষ্কৃতিঃ কৃতা ॥১২॥ সর্বেষামেব পর্যাপ্তো রাক্ষসানামহং যুধি । কিং তু রামস্য প্রীত্যর্থং বিষহিষ্যেঽহমীদৃশম্ ॥১৩॥ লঙ্কা চারয়িতব্যা মে পুনরেব ভবেদিতি । রাত্রৌ নহি সুদৃষ্টা মে দুর্গকর্মবিধানতঃ॥১৪॥ অবশ্যমেব দ্রষ্টব্যা ময়া লঙ্কা নিশাক্ষয়ে । কামং বধ্নন্তু মে ভূয়ঃ পুচ্ছস্যোদ্দীপনেন চ ॥১৫॥ পীডাং কুর্বন্তি রক্ষাংসি ন মেঽস্তি মনসঃ শ্রমঃ। ততস্তে সংবৃতাকারং সত্ত্ববন্তং মহাকপিম্ ॥১৬॥ পরিগৃহ্য যয়ুর্হৃষ্টা রাক্ষসাঃ কপিকুঞ্জরম্ । শঙ্খভেরীনিনাদৈশ্চ ঘোষয়ন্তঃ স্বকর্মভিঃ॥১৭॥ রাক্ষসাঃ ক্রূরকর্মাণশ্চারয়ন্তি স্ম তাং পুরীম্ । অন্বীয়মানো রক্ষোভির্যযৌ সুখমরিন্দমঃ॥১৮॥ হনুমাংশ্চারয়ামাস রাক্ষসানাং মহাপুরীম্ । অথাপশ্যদ্বিমানানি বিচিত্রাণি মহাকপিঃ॥১৯॥ সংবৃতান্ভূমিভাগাংশ্চ সুবিভক্তাংশ্চ চত্বরান্ । রথ্যাশ্চ গৃহসম্বাধাঃ কপিঃ শৃঙ্গাটকানি চ ॥২০॥ তথা রথ্যোপরথ্যাশ্চ তথৈব চ গৃহান্তরান্ । চত্বরেষু চতুষ্কেষু রাজমার্গে তথৈব চ ॥২১॥ ঘোষয়ন্তি কপিং সর্বে চার ইত্যেব রাক্ষসাঃ। স্ত্রীবালবৃদ্ধা নির্জগ্মুস্তত্র তত্র কুতূহলাৎ ॥২২॥ তং প্রদীপিতলাঙ্গূলং হনূমন্তং দিদৃক্ষবঃ। দীপ্যমানে ততস্তস্য লাঙ্গূলাগ্রে হনূমতঃ॥২৩॥ রাক্ষস্যস্তা বিরূপাক্ষ্যঃ শংসুর্দেব্যাস্তদপ্রিয়ম্ । যস্ত্বয়া কৃতসংবাদঃ সীতে তাম্রমুখঃ কপিঃ॥২৪॥ লাঙ্গূলেন প্রদীপ্তেন স এষ পরিণীয়তে । শ্রুত্বা তদ্বচনং ক্রূরমাত্মাপহরণোপমম্ ॥২৫॥ বৈদেহী শোকসন্তপ্তা হুতাশনমুপাগমৎ । মঙ্গলাভিমুখী তস্য সা তদাসীন্মহাকপেঃ॥২৩॥ উপতস্থে বিশালাক্ষী প্রয়তা হব্যবাহনম্ । যদ্যস্তি পতিশুশ্রূষা যদ্যস্তি চরিতং তপঃ। যদি বা ত্বেকপত্নীত্বং শীতো ভব হনূমতঃ॥২৭॥ যদি কশ্চিদনুক্রোশস্তস্য ময়্যস্তি ধীমতঃ। যদি বা ভাগ্যশেষো মে শীতো ভব হনূমতঃ॥২৮॥ যদি মাং বৃত্তসম্পন্নাং তৎসমাগমলালসাম্ । স বিজানাতি ধর্মাত্মা শীতো ভব হনূমতঃ॥২৯॥ যদি মাং তারয়েদার্যঃ সুগ্রীবঃ সত্যসঙ্গরঃ। অস্মাদ্দুঃখাম্বুসংরোধাচ্ছীতো ভব হনূমতঃ॥৩০॥ ততস্তীক্ষ্ণার্চিরব্যগ্রঃ প্রদক্ষিণশিখোঽনলঃ। জজ্বাল মৃগশাবাক্ষ্যাঃ শংসন্নিব শুভং কপেঃ॥৩১॥ হনূমজ্জনকশ্চৈব পুচ্ছানলয়ুতোঽনিলঃ। ববৌ স্বাস্থ্যকরো দেব্যাঃ প্রালেয়ানিলশীতলঃ॥৩২॥ দহ্যমানে চ লাঙ্গূলে চিন্তয়ামাস বানরঃ। প্রদীপ্তোঽগ্নিরয়ং কস্মান্ন মাং দহতি সর্বতঃ॥৩৩॥ দৃশ্যতে চ মহাজ্বালঃ করোতি চ ন মে রুজম্ । শিশিরস্যেব সম্পাতো লাঙ্গূলাগ্রে প্রতিষ্ঠিতঃ॥৩৪॥ অথ বা তদিদং ব্যক্তং যদ্দৃষ্টং প্লবতা ময়া । রামপ্রভাবাদাশ্চর্যং পর্বতঃ সরিতাং পতৌ ॥৩৫॥ যদি তাবৎসমুদ্রস্য মৈনাকস্য চ ধীমতঃ। রামার্থং সম্ভ্রমস্তাদৃক্কিমগ্নির্ন করিষ্যতি ॥৩৬॥ সীতায়াশ্চানৃশংস্যেন তেজসা রাঘবস্য চ । পিতুশ্চ মম সখ্যেন ন মাং দহতি পাবকঃ॥৩৭॥ ভূয়ঃ স চিন্তয়ামাস মুহূর্তং কপিকুঞ্জরঃ। কথমস্মদ্বিধস্যেহ বন্ধনং রাক্ষসাধমৈঃ॥৩৮॥ প্রতিক্রিয়াস্য যুক্তা স্যাৎ সতি মহ্যং পরাক্রমে । ততশ্ছিত্ত্বা চ তান্ পাশান্ বেগবান্ বৈ মহাকপিঃ॥৩৯॥ উৎপপাতাথ বেগেন ননাদ চ মহাকপিঃ। পুরদ্বারং ততঃ শ্রীমাঞ্শৈলশৃঙ্গমিবোন্নতম্ ॥৪০॥ বিভক্তরক্ষঃসম্বাধমাসসাদানিলাত্মজঃ। স ভূত্বা শৈলসঙ্কাশঃ ক্ষণেন পুনরাত্মবান্ ॥৪১॥ হ্রস্বতাং পরমাং প্রাপ্তো বন্ধনান্যবশাতয়ৎ । বিমুক্তশ্চাভবচ্ছ্রীমান্পুনঃ পর্বতসংনিভঃ॥৪২॥ বীক্ষমাণশ্চ দদৃশে পরিঘং তোরণাশ্রিতম্ । স তং গৃহ্য মহাবাহুঃ কালায়সপরিষ্কৃতম্ । রক্ষিণস্তান্পুনঃ সর্বান্সূদয়ামাস মারুতিঃ॥৪৩॥ স তান্নিহত্বা রণচণ্ডবিক্রমঃ সমীক্ষমাণঃ পুনরেব লঙ্কাম্ । প্রদীপ্তলাঙ্গূলকৃতার্চিমালী প্রকাশতাদিত্য ইবার্চিমালী ॥৪৪॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ত্রিপঞ্চাশঃ সর্গঃ