অথ চতুঃপঞ্চাশঃ সর্গঃ বীক্ষমাণস্ততো লঙ্কাং কপিঃ কৃতমনোরথঃ। বর্ধমানসমুৎসাহঃ কার্যশেষমচিন্তয়ৎ ॥১॥ কিং নু খল্ববশিষ্টং মে কর্তব্যমিহ সাম্প্রতম্ । যদেষাং রক্ষসাং ভূয়ঃ সন্তাপজননং ভবেৎ ॥২॥ বনং তাবৎপ্রমথিতং প্রকৃষ্টা রাক্ষসা হতাঃ। বলৈকদেশঃ ক্ষপিতঃ শেষং দুর্গবিনাশনম্ ॥৩॥ দুর্গে বিনাশিতে কর্ম ভবেৎ সুখপরিশ্রমম্ । অল্পয়ত্নেন কার্যেঽস্মিন্মম স্যাৎসফলঃ শ্রমঃ॥৪॥ যো হ্যযং মম লাঙ্গূলে দীপ্যতে হব্যবাহনঃ। অস্য সন্তর্পণং ন্যায়্যং কর্তুমেভির্গৃহোত্তমৈঃ॥৫॥ ততঃ প্রদীপ্তলাঙ্গূলঃ সবিদ্যুদিব তোয়দঃ। ভবনাগ্রেষু লঙ্কায়া বিচচার মহাকপিঃ॥৬॥ গৃহাদ্গৃহং রাক্ষসানামুদ্যানানি চ বানরঃ। বীক্ষমাণো হ্যসন্ত্রস্তঃ প্রাসাদাংশ্চ চচার সঃ॥৭॥ অবপ্লুত্য মহাবেগঃ প্রহস্তস্য নিবেশনম্ । অগ্নিং তত্র বিনিক্ষিপ্য শ্বসনেন সমো বলী ॥৮॥ ততোঽন্যৎপুপ্লুবে বেশ্ম মহাপার্শ্বস্য বীর্যবান্ । মুমোচ হনুমানগ্নিং কালানলশিখোপমম্ ॥৯॥ বজ্রদংষ্ট্রস্য চ তথা পুপ্লুবে স মহাকপিঃ। শুকস্য চ মহাতেজাস্সারণস্য চ ধীমতঃ॥১০॥ তথা চেন্দ্রজিতো বেশ্ম দদাহ হরিয়ূথপঃ। জম্বুমালেঃ সুমালেশ্চ দদাহ ভবনং ততঃ॥১১॥ রশ্মিকেতোশ্চ ভবনং সূর্যশত্রোস্তথৈব চ । হ্রস্বকর্ণস্য দংষ্ট্রস্য রোমশস্য চ রক্ষসঃ॥১২॥ যুদ্ধোন্মত্তস্য মত্তস্য ধ্বজগ্রীবস্য রক্ষসঃ। বিদ্যুজ্জিহ্বস্য ঘোরস্য তথা হস্তিমুখস্য চ ॥১৩॥ করালস্য বিশালস্য শোণিতাক্ষস্য চৈব হি । কুম্ভকর্ণস্য ভবনং মকরাক্ষস্য চৈব হি ॥১৪॥ নরান্তকস্য কুম্ভস্য নিকুম্ভস্য দুরাত্মনঃ। যজ্ঞশত্রোশ্চ ভবনং ব্রহ্মশত্রোস্তথৈব চ ॥১৫॥ বর্জয়িত্বা মহাতেজা বিভীষণগৃহং প্রতি । ক্রমমাণঃ ক্রমেণৈব দদাহ হরিপুঙ্গবঃ॥১৬॥ তেষু তেষু মহার্হেষু ভবনেষু মহায়শাঃ। গৃহেষ্বৃদ্ধিমতামৃদ্ধিং দদাহ কপিকুঞ্জরঃ॥১৭॥ সর্বেষাং সমতিক্রম্য রাক্ষসেন্দ্রস্য বীর্যবান্ । আসসাদাথ লক্ষ্মীবান্ রাবণস্য নিবেশনম্ ॥১৮॥ ততস্তস্মিন্গৃহে মুখ্যে নানারত্নবিভূষিতে । মেরুমন্দরসঙ্কাশে নানামঙ্গল়শোভিতে ॥১৯॥ প্রদীপ্তমগ্নিমুৎসৃজ্য লাঙ্গূলাগ্রে প্রতিষ্ঠিতম্ । ননাদ হনুমান্বীরো যুগান্তজলদো যথা ॥২০॥ শ্বসনেন চ সংয়োগাদতিবেগো মহাবলঃ। কালাগ্নিরিব জজ্বাল প্রাবর্ধত হুতাশনঃ॥২১॥ প্রদীপ্তমগ্নিং পবনস্তেষু বেশ্মসু চারয়ন্ । তানি কাঞ্চনজালানি মুক্তামণিময়ানি চ ॥২২॥ ভবনানি ব্যশীর্যন্ত রত্নবন্তি মহান্তি চ । তানি ভগ্নবিমানানি নিপেতুর্বসুধাতলে ॥২৩॥ ভবনানীব সিদ্ধানামম্বরাৎপুণ্যসঙ্ক্ষয়ে । সঞ্জজ্ঞে তুমুলঃ শব্দো রাক্ষসানাং প্রধাবতাম্ ॥২৪॥ স্বে স্বে গৃহপরিত্রাণে ভগ্নোৎসাহোজ্ঝিতশ্রিয়াম্ । নূনমেষোঽগ্নিরায়াতঃ কপিরূপেণ হা ইতি ॥২৫॥ ক্রন্দন্ত্যস্সহসা পেতুঃ স্তনন্ধয়ধরাঃ স্ত্রিয়ঃ। কাশ্চিদগ্নিপরীতাঙ্গ্যো হর্ম্যেভ্যো মুক্তমূর্ধজাঃ॥২৬॥ পতন্ত্যো রেজিরেঽভ্রেভ্যস্সৌদামন্য ইবাম্বরাৎ । বজ্রবিদ্রুমবৈদূর্যমুক্তারজতসংহতান্ ॥২৭॥ বিচিত্রান্ভবনাদ্ধাতূন্স্যন্দমানান্দদর্শ সঃ। নাগ্নিস্তৃপ্যতি কাষ্ঠানাং তৃণানাং চ যথা তথা ॥২৮॥ হনূমান্রাক্ষসেন্দ্রাণাং বধে কিঞ্চিন্ন তৃপ্যতি । ন হনূমদ্বিশস্তানাং রাক্ষসানাং বসুন্ধরা ॥২৯॥ হনূমতা বেগবতা বানরেণ মহাত্মনা । লঙ্কাপুরং প্রদগ্ধং তদ্রুদ্রেণ ত্রিপুরং যথা ॥৩০॥ ততঃ স লঙ্কাপুরপর্বতাগ্রে সমুত্থিতো ভীমপরাক্রমোঽগ্নিঃ। প্রসার্য চূডাবলয়ং প্রদীপ্তো হনূমতা বেগবতোপসৃষ্টঃ॥৩১॥ যুগান্তকালানলতুল্যরূপঃ সমারুতোঽগ্নির্ববৃধে দিবিস্পৃক্ । বিধূমরশ্মির্ভবনেষু সক্তো রক্ষঃশরীরাজ্যসমর্পিতার্চিঃ॥৩২॥ আদিত্যকোটীসদৃশঃ সুতেজা লঙ্কাং সমস্তাং পরিবার্য তিষ্ঠন্ । শব্দৈরনেকৈরশনিপ্ররূঢৈ- র্ভিন্দন্নিবাণ্ডং প্রবভৌ মহাগ্নিঃ॥৩৩॥ তত্রাম্বরাদগ্নিরতিপ্রবৃদ্ধো রূক্ষপ্রভঃ কিংশুকপুষ্পচূডঃ। নির্বাণধূমাকুলরাজয়শ্চ নীলোৎপলাভাঃ প্রচকাশিরেঽভ্রাঃ॥৩৪॥ বজ্রী মহেন্দ্রস্ত্রিদশেশ্বরো বা সাক্ষাদ্যমো বা বরুণোঽনিলো বা । রৌদ্রোঽগ্নিরর্কো ধনদশ্চ সোমো ন বানরোঽয়ং স্বয়মেব কালঃ॥৩৫॥ কিং ব্রহ্মণস্সর্বপিতামহস্য লোকস্য ধাতুশ্চতুরাননস্য । ইহাঽঽগতো বানররূপধারী রক্ষোপসংহারকরঃ প্রকোপঃ॥৩৬॥ কিং বৈষ্ণবং বা কপিরূপমেত্য রক্ষোবিনাশায় পরং সুতেজঃ। অচিন্ত্যমব্যক্তমনন্তমেকং স্বমায়যা সাম্প্রতমাগতং বা ॥৩৭॥ ইত্যেবমূচুর্বহবো বিশিষ্টা রক্ষোগণাস্তত্র সমেত্য সর্বে । সপ্রাণিসঙ্ঘাং সগৃহাং সবৃক্ষাং দগ্ধাং পুরীং তাং সহসা সমীক্ষ্য ॥৩৮॥ ততস্তু লঙ্কা সহসা প্রদগ্ধা সরাক্ষসা সাশ্বরথা সনাগা । সপক্ষিসঙ্ঘা সমৃগা সবৃক্ষা রুরোদ দীনা তুমুলং সশব্দম্ ॥৩৯॥ হা তাত হা পুত্রক কান্ত মিত্র হা জীবিতেশাঙ্গ হতং সুপুণ্যম্ । রক্ষোভিরেবং বহুধা ব্রুবদ্ভি শব্দঃ কৃতো ঘোরতরস্সুভীমঃ॥৪০॥ হুতাশনজ্বালসমাবৃতা সা হতপ্রবীরা পরিবৃত্তয়োধা । হনূমতঃ ক্রোধবলাভিভূতা বভূব শাপোপহতেব লঙ্কা ॥৪১॥ সসম্ভ্রমং ত্রস্তবিষণ্ণরাক্ষসাং সমুজ্জ্বলজ্জ্বালহুতাশনাঙ্কিতাম্ । দদর্শ লঙ্কাং হনুমান্মহামনাঃ স্বয়ম্ভুরোষোপহতামিবাবনিম্ ॥৪২॥ ভঙ্ক্ত্বা বনং পাদপরত্নসঙ্কুলং হত্বা তু রক্ষাংসি মহান্তি সংয়ুগে । দগ্ধ্বা পুরীং তাং গৃহরত্নমালিনীং তস্থৌ হনূমান্পবনাত্মজঃ কপিঃ॥৪৩॥ স রাক্ষসাংস্তান্সুবহূংশ্চ হত্বা বনং চ ভঙ্ক্ত্বা বহুপাদপং তৎ । বিসৃজ্য রক্ষোভবনেষু চাগ্নিং জগাম রামং মনসা মহাত্মা ॥৪৪॥ ততস্তু তং বানরবীরমুখ্যং মহাবলং মারুততুল্যবেগম্ । মহামতিং বায়ুসুতং বরিষ্ঠং প্রতুষ্টুবুর্দেবগণাশ্চ সর্বে ॥৪৫॥ দেবাশ্চ সর্বে মুনিপুঙ্গবাশ্চ গন্ধর্ববিদ্যাধরপন্নগাশ্চ । ভূতানি সর্বাণি মহান্তি তত্র জগ্মুঃ পরাং প্রীতিমতুল্যরূপাম্ ॥৪৬॥ ভঙ্ক্ত্বা বনং মহাতেজা হত্বা রক্ষাংসি সংয়ুগে । দগ্ধ্বা লঙ্কাপুরীং ভীমাং ররাজ স মহাকপিঃ॥৪৭॥ গৃহাগ্র্যশৃঙ্গাগ্রতলে বিচিত্রে প্রতিষ্ঠিতো বানররাজসিংহঃ। প্রদীপ্তলাঙ্গূলকৃতার্চিমালী ব্যরাজতাদিত্য ইবার্চিমালী ॥৪৮॥ লঙ্কাং সমস্তাং সম্পীড্য লাঙ্গূলাগ্নিং মহাকপিঃ। নির্বাপয়ামাস তদা সমুদ্রে হরিপুঙ্গবঃ॥৪৯॥ ততো দেবাস্সগন্ধর্বাস্সিদ্ধাশ্চ পরমর্ষয়ঃ। দৃষ্ট্বা লঙ্কাং প্রদগ্ধাং তাং বিস্ময়ং পরমং গতাঃ॥৫০॥ তং দৃষ্ট্বা বানরশ্রেষ্ঠং হনুমন্তং মহাকপিম্ । কালাগ্নিরিতি সঞ্চিন্ত্য সর্বভূতানি তত্রসুঃ॥৫১॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে চতুঃপঞ্চাশঃ সর্গঃ