অথ পঞ্চপঞ্চাশঃ সর্গঃ সন্দীপ্যমানাং বিত্রস্তাং ত্রস্তরক্ষোগণাং পুরীম্ । অবেক্ষ্য হানুমাঁল্লঙ্কাং চিন্তয়ামাস বানরঃ॥১॥ তস্যাভূৎসুমহাংস্ত্রাসঃ কুৎসা চাত্মন্যজায়ত । লঙ্কাং প্রদহতা কর্ম কিংস্বিৎকৃতমিদং ময়া ॥২॥ ধন্যাঃ খলু মহাত্মানো যে বুদ্ধ্যা কোপমুত্থিতম্ । নিরুন্ধন্তি মহাত্মানো দীপ্তমগ্নিমিবাম্ভসা ॥৩॥ ক্রুদ্ধঃ পাপং ন কুর্যাৎকঃ ক্রুদ্ধো হন্যাদ্গুরূনপি । ক্রুদ্ধঃ পরুষয়া বাচা নরস্সাধূনধিক্ষিপেৎ ॥৪॥ বাচ্যাবাচ্যং প্রকুপিতো ন বিজানাতি কর্হিচিৎ । নাকার্যমস্তি ক্রুদ্ধস্য নাবাচ্যং বিদ্যতে ক্বচিৎ ॥৫॥ যঃ সমুৎপতিতং ক্রোধং ক্ষময়ৈব নিরস্যতি । যথোরগস্ত্বচং জীর্ণাং স বৈ পুরুষ উচ্যতে ॥৬॥ ধিগস্তু মাং সুদুর্বুদ্ধিং নির্লজ্জং পাপকৃত্তমম্ । অচিন্তয়ত্বা তাং সীতামগ্নিদং স্বামিঘাতকম্ ॥৭॥ যদি দগ্ধা ত্বিয়ং সর্বা নূনমার্যাপি জানকী । দগ্ধা তেন ময়া ভর্তুর্হতং কার্যমজানতা ॥৮॥ যদর্থময়মারম্ভস্তৎকার্যমবসাদিতম্ । ময়া হি দহতা লঙ্কাং ন সীতা পরিরক্ষিতা ॥৯॥ ঈষৎকার্যমিদং কার্যং কৃতমাসীন্ন সংশয়ঃ। তস্য ক্রোধাভিভূতেন ময়া মূলক্ষয়ঃ কৃতঃ॥১০॥ বিনষ্টা জানকী ব্যক্তং ন হ্যদগ্ধঃ প্রদৃশ্যতে । লঙ্কায়াঃ কশ্চিদুদ্দেশঃ সর্বা ভস্মীকৃতা পুরী ॥১১॥ যদি তদ্বিহতং কার্যং ময়া প্রজ্ঞাবিপর্যযাৎ । ইহৈব প্রাণসংন্যাসো মমাপি হ্যদ্য রোচতে ॥১২॥ কিমগ্নৌ নিপতাম্যদ্য আহোস্বিদ্বডবামুখে । শরীরমিহ সত্ত্বানাং দদ্মি সাগরবাসিনাম্ ॥১৩॥ কথং নু জীবতা শক্যো ময়া দ্রষ্টুং হরীশ্বরঃ। তৌ বা পুরুষশার্দূলৌ কার্যসর্বস্বঘাতিনা ॥১৪॥ ময়া খলু তদেবেদং রোষদোষাৎপ্রদর্শিতম্ । প্রথিতং ত্রিষু লোকেষু কপিত্বমনবস্থিতম্ ॥১৫॥ ধিগস্তু রাজসং ভাবমনীশমনবস্থিতম্ । ঈশ্বরেণাপি যদ্রাগান্ময়া সীতা ন রক্ষিতা ॥১৬॥ বিনষ্টায়াং তু সীতায়াং তাবুভৌ বিনশিষ্যতঃ। তয়োর্বিনাশে সুগ্রীবঃ সবন্ধুর্বিনশিষ্যতি ॥১৭॥ এতদেব বচঃ শ্রুত্বা ভরতো ভ্রাতৃবৎসলঃ। ধর্মাত্মা সহশত্রুঘ্নঃ কথং শক্ষ্যতি জীবিতুম্ ॥১৮॥ ইক্ষ্বাকুবংশে ধর্মিষ্ঠে গতে নাশমসংশয়ম্ । ভবিষ্যন্তি প্রজাঃ সর্বাঃ শোকসন্তাপপীডিতাঃ॥১৯॥ তদহং ভাগ্যরহিতো লুপ্তধর্মার্থসঙ্গ্রহঃ। রোষদোষপরীতাত্মা ব্যক্তং লোকবিনাশনঃ॥২০॥ ইতি চিন্তয়তস্তস্য নিমিত্তান্যুপপেদিরে । পূর্বমপ্যুপলব্ধানি সাক্ষাৎপুনরচিন্তয়ৎ ॥২১॥ অথ বা চারুসর্বাঙ্গী রক্ষিতা স্বেন তেজসা । ন নশিষ্যতি কল্যাণী নাগ্নিরগ্নৌ প্রবর্ততে ॥২২॥ নহি ধর্মাত্মনস্তস্য ভার্যামমিততেজসঃ। স্বচরিত্রাভিগুপ্তাং তাং স্প্রষ্টুমর্হতি পাবকঃ॥২৩॥ নূনং রামপ্রভাবেণ বৈদেহ্যাঃ সুকৃতেন চ । যন্মাং দহনকর্মায়ং নাদহদ্ধব্যবাহনঃ॥২৪॥ ত্রয়াণাং ভরতাদীনাং ভ্রাতৄণাং দেবতা চ যা । রামস্য চ মনঃকান্তা সা কথং বিনশিষ্যতি ॥২৫॥ যদ্বা দহনকর্মায়ং সর্বত্র প্রভুরব্যযঃ। ন মে দহতি লাঙ্গূলং কথমার্যাং প্রধক্ষ্যতি ॥২৬॥ পুনশ্চাচিন্তয়ত্তত্র হনুমান্বিস্মিতস্তদা । হিরণ্যনাভস্য গিরের্জলমধ্যে প্রদর্শনম্ ॥২৭॥ তপসা সত্যবাক্যেন অনন্যত্বাচ্চ ভর্তরি । অসৌ বিনির্দহেদগ্নিং ন তামগ্নিঃ প্রধক্ষ্যতি ॥২৮॥ স তথা চিন্তয়ংস্তত্র দেব্যা ধর্মপরিগ্রহম্ । শুশ্রাব হনুমাংস্তত্র চারণানাং মহাত্মনাম্ ॥২৯॥ অহো খলু কৃতং কর্ম দুর্বিগাহং হনূমতা । অগ্নিং বিসৃজতা তীক্ষ্ণং ভীমং রাক্ষসসদ্মনি ॥৩০॥ প্রপলায়িতরক্ষঃ স্ত্রীবালবৃদ্ধসমাকুলা । জনকোলাহলাধ্মাতা ক্রন্দন্তীবাদ্রিকন্দরৈঃ ॥৩১॥ দগ্ধেয়ং নগরী লঙ্কা সাট্টপ্রাকারতোরণা । জানকী ন চ দগ্ধেতি বিস্ময়োঽদ্ভুত এব নঃ॥৩২॥ ইতি শুশ্রাব হনুমান্ বাচং তামমৃতোপমাম্ । বভূব চাস্য মনসো হর্ষস্তৎকালসম্ভবঃ॥৩৩॥ স নিমিত্তৈশ্চ দৃষ্টার্থৈঃ কারণৈশ্চ মহাগুণৈঃ। ঋষিবাক্যৈশ্চ হনুমানভবৎপ্রীতমানসঃ॥৩৪॥ ততঃ কপিঃ প্রাপ্তমনোরথার্থ- স্তামক্ষতাং রাজসুতাং বিদিত্বা । প্রত্যক্ষতস্তাং পুনরেব দৃষ্ট্বা প্রতিপ্রয়াণায় মতিং চকার ॥৩৫॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে পঞ্চপঞ্চাশঃ সর্গঃ