অথ ষট্পঞ্চাশঃ সর্গঃ
ততস্তু শিংশপামূলে জানকীং পর্যবস্থিতাম্ ।
অভিবাদ্যাব্রবীদ্দিষ্ট্যা পশ্যামি ত্বামিহাক্ষতাম্ ॥১॥
ততস্তং প্রস্থিতং সীতা বীক্ষমাণা পুনঃ পুনঃ।
ভর্তৃস্নেহান্বিতা বাক্যং হনূমন্তমভাষত ॥২॥
যদি ত্বং মন্যসে তাত বসৈকাহমিহানঘ ।
ক্বচিৎ সুসংবৃতে দেশে বিশ্রান্তঃ শ্বো গমিষ্যসি ॥৩॥
মম চৈবাল্পভাগ্যায়াঃ সাংনিধ্যাৎ তব বানর ।
শোকস্যাস্যাপ্রমেয়স্য মুহূর্তং স্যাদপি ক্ষয়ঃ॥৪॥
গতে হি হরিশার্দূল পুনঃ সম্প্রাপ্তয়ে ত্বয়ি ।
প্রাণেষ্বপি ন বিশ্বাসো মম বানরপুগংব ॥৫॥
অদর্শনং চ তে বীর ভূয়ো মাং দারয়িষ্যতি ।
দুঃখাদ্ দুঃখতরং প্রাপ্তাং দুর্মনঃশোককর্শিতাম্ ॥৬॥
অয়ং চ বীর সন্দেহস্তিষ্ঠতীব মমাগ্রতঃ।
সুমহৎসু সহায়েষু হর্যৃক্ষেষু মহাবলঃ॥৭॥
কথং নু খলু দুষ্পারং সন্তরিষ্যতি সাগরম্ ।
তানি হর্যুক্ষসৈন্যানি তৌ বা নরবরাত্মজৌ ॥৮॥
ত্রয়াণামেব ভূতানাং সাগরস্যাপি লঙ্ঘনে ।
শক্তিঃ স্যাদ্ বৈনতেয়স্য তব বা মারুতস্য বা ॥৯॥
তদত্র কার্যনির্বন্ধে সমুৎপন্নে দুরাসদে ।
কিং পশ্যসি সমাধানং ত্বং হি কার্যবিশারদঃ॥১০॥
কামমস্য ত্বমেবৈকঃ কার্যস্য পরিসাধনে ।
পর্যাপ্তঃ পরবীরঘ্ন যশস্যস্তে ফলোদয়ঃ॥১১॥
বলৈস্তু সঙ্কুলাং কৃত্বা লঙ্কাং পরবলার্দনঃ।
মাং নয়েদ্যদি কাকুৎস্থস্তৎ তস্য সদৃশং ভবেৎ ॥১২॥
তদ্যথা তস্য বিক্রান্তমনুরূপং মহাত্মনঃ।
ভবত্যাহবশূরস্য তথা ত্বমুপপাদয় ॥১৩॥
তদর্থোপহিতং বাক্যং প্রশ্রিতং হেতুসংহিতম্ ।
নিশম্য হনুমান্ বীরো বাক্যমুত্তরমব্রবীৎ ॥১৪॥
দেবি হর্যৃক্ষসৈন্যানামীশ্বরঃ প্লবতাং বরঃ।
সুগ্রীবঃ সত্ত্বসম্পন্নস্তবার্থে কৃতনিশ্চয়ঃ॥১৫॥
স বানরসহস্রাণাং কোটীভিরভিসংবৃতঃ।
ক্ষিপ্রমেষ্যতি বৈদেহি সুগ্রীবঃ প্লবগাধিপঃ॥১৬॥
তৌ চ বীরৌ নরবরৌ সহিতৌ রামলক্ষ্মণৌ ।
আগম্য নগরীং লঙ্কাং সায়কৈর্বিধমিষ্যতঃ॥১৭॥
সগণং রাক্ষসং হত্বা নচিরাদ্ রঘুনন্দনঃ।
ত্বামাদায় বরারোহে স্বাং পুরীং প্রতি যাস্যতি ॥১৮॥
সমাশ্বসিহি ভদ্রং তে ভব ত্বং কালকাঙ্ক্ষিণী ।
ক্ষিপ্রং দ্রক্ষ্যসি রামেণ নিহতং রাবণং রণে ॥১৯॥
নিহতে রাক্ষসেন্দ্রে চ সপুত্রামাত্যবান্ধবে ।
ত্বং সমেষ্যসি রামেণ শশাঙ্কেনেব রোহিণী ॥২০॥
ক্ষিপ্রমেষ্যতি কাকুৎস্থো হর্যৃক্ষপ্রবরৈর্যুতঃ।
যস্তে যুধি বিজিত্যারীঞ্ছোকং ব্যপনয়িষ্যতি ॥২১॥
এবমাশ্বাস্য বৈদেহীং হনূমান্মারুতাত্মজঃ।
গমনায় মতিং কৃত্বা বৈদেহীমভ্যবাদয়ৎ ॥২২॥
রাক্ষসান্ প্রবরান্ হত্বা নাম বিশ্রাব্য চাত্মনঃ।
সমাশ্বাস্য চ বৈদেহীং দর্শয়িত্বা পরং বলম্ ॥২৩॥
নগরীমাকুলাং কৃত্বা বঞ্চয়িত্বা চ রাবণম্ ।
দর্শয়িত্বা বলং ঘোরং বৈদেহীমভিবাদ্য চ ॥২৪॥
প্রতিগন্তুং মনশ্চক্রে পুনর্মধ্যেন সাগরম্ ।
ততঃ স কপিশার্দূলঃ স্বামিসন্দর্শনোৎসুকঃ॥২৫॥
আরুরোহ গিরিশ্রেষ্ঠমরিষ্টমরিমর্দনঃ।
তুঙ্গপদ্মকজুষ্টাভির্নীলাভির্বনরাজিভিঃ॥২৬॥
সোত্তরীয়মিবাম্ভোদৈঃ শৃঙ্গান্তরবিলম্বিভিঃ।
বোধ্যমানমিব প্রীত্যা দিবাকরকরৈঃ শুভৈঃ॥২৭॥
উন্মিষন্তমিবোদ্ধূতৈর্লোচনৈরিব ধাতুভিঃ।
তোয়ৌঘনিঃস্বনৈর্মন্দ্রৈঃ প্রাধীতমিব পর্বতম্ ॥২৮॥
প্রগীতমিব বিস্পষ্টং নানাপ্রস্রবণস্বনৈঃ।
দেবদারুভিরুদ্ধূতৈরূর্ধ্ববাহুমিব স্থিতম্ ॥২৯॥
প্রপাতজলনির্ঘোষঃ প্রাক্রুষ্টমিব সর্বতঃ।
বেপমানমিব শ্যামৈঃ কম্পমানৈঃ শরদ্বনৈঃ॥৩০॥
বেণুভির্মারুতোদ্ধূতৈঃ কূজন্তমিব কীচকৈঃ।
নিঃশ্বসন্তমিবামর্ষাদ্ ঘোরৈরাশীবিষোত্তমৈঃ॥৩১॥
নীহারকৃতগম্ভীরৈর্ধ্যায়ন্তমিব গহ্বরৈঃ।
মেঘপাদনিভৈঃ পাদৈঃ প্রক্রান্তমিব সর্বতঃ॥৩২॥
জৃম্ভমাণমিবাকাশে শিখরৈরভ্রমালিভিঃ।
কূটৈশ্চ বহুধা কীর্ণং শোভিতং বহুকন্দরৈঃ॥৩৩॥
সালতালৈশ্চ কর্ণৈশ্চ বংশৈশ্চ বহুভির্বৃতম্ ।
লতাবিতানৈর্বিততৈঃ পুষ্পবদ্ভিরলঙ্কৃতম্ ॥৩৪॥
নানামৃগগণৈঃ কীর্ণং ধাতুনিষ্যন্দভূষিতম্ ।
বহুপ্রস্রবণোপেতং শিলাসঞ্চয়সঙ্কটম্ ॥৩৫॥
মহর্ষিয়ক্ষগন্ধর্বকিংনরোরগসেবিতম্ ।
লতাপাদপসম্বাধং সিংহাধিষ্ঠিতকন্দরম্ ॥৩৬॥
ব্যাঘ্রাদিভিঃ সমাকীর্ণং স্বাদুমূলফলদ্রুমম্ ।
আরুরোহানিলসুতঃ পর্বতং প্লবগোত্তমঃ॥৩৭॥
রামদর্শনশীঘ্রেণ প্রহর্ষেণাভিচোদিতঃ।
তেন পাদতলক্রান্তা রম্যেষু গিরিসানুষু ॥৩৮॥
সঘোষাঃ সমশীর্যন্ত শিলাশ্চূর্ণীকৃতাস্ততঃ।
স তমারুহ্য শৈলেন্দ্রং ব্যবর্ধত মহাকপিঃ॥৩৯॥
দক্ষিণাদুত্তরং পারং প্রার্থয়ঁল্লবণাম্ভসঃ।
অধিরুহ্য ততো বীরঃ পর্বতং পবনাত্মজঃ॥৪০॥
দদর্শ সাগরং ভীমং মীনোরগনিষেবিতম্ ।
স মারুত ইবাকাশং মারুতস্যাত্মসম্ভবঃ॥৪১॥
প্রপেদে হরিশার্দূলো দক্ষিণাদুত্তরাং দিশম্ ।
স তদা পীডিতস্তেন কপিনা পর্বতোত্তমঃ॥৪২॥
ররাস বিবিধৈর্ভূতৈঃ প্রাবিশদ্বসুধাতলম্ ।
কম্পমানৈশ্চ শিখরৈঃ পতদ্ভিরপি চ দ্রুমৈঃ॥৪৩॥
তস্যোরুবেগোন্মথিতাঃ পাদপাঃ পুষ্পশালিনঃ।
নিপেতুর্ভূতলে ভগ্নাঃ শক্রায়ুধহতা ইব ॥৪৪॥
কন্দরোদরসংস্থানাং পীডিতানাং মহৌজসাম্ ।
সিংহানাং নিনদো ভীমো নভো ভিন্দন্ হি শুশ্রুবে ॥৪৫॥
ত্রস্তব্যাবিদ্ধবসনা ব্যাকুলীকৃতভূষণাঃ।
বিদ্যাধর্যঃ সমুৎপেতুঃ সহসা ধরণীধরাৎ ॥৪৬॥
অতিপ্রমাণা বলিনো দীপ্তজিহ্বা মহাবিষাঃ।
নিপীডিতশিরোগ্রীবা ব্যবেষ্টন্ত মহাহয়ঃ॥৪৭॥
কিংনরোরগগন্ধর্বয়ক্ষবিদ্যাধরাস্তথা ।
পীডিতং তং নগবরং ত্যক্ত্বা গগনমাস্থিতাঃ॥৪৮॥
স চ ভূমিধরঃ শ্রীমান্বলিনা তেন পীডিতঃ।
সবৃক্ষশিখরোদগ্রঃ প্রবিবেশ রসাতলম্ ॥৪৯॥
দশয়োজনবিস্তারস্ত্রিংশদ্যোজনমুচ্ছ্রিতঃ।
ধরণ্যাং সমতাং যাতঃ স বভূব ধরাধরঃ॥৫০॥
স লিলঙ্ঘয়িষুর্ভীমং সলীলং লবণার্ণবম্ ।
কল্লোলাস্ফালবেলান্তমুৎপপাত নভো হরিঃ॥৫১॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ষট্পঞ্চাশঃ সর্গঃ