অথ সপ্তপঞ্চাশঃ সর্গঃ আপ্লুত্য চ মহাবেগঃ পক্ষবানিব পর্বতঃ। ভুজঙ্গয়ক্ষগন্ধর্বপ্রবুদ্ধকমলোৎপলম্ ॥১॥ স চন্দ্রকুমুদং রম্যং সার্ককারণ্ডবং শুভম্ । তিষ্যশ্রবণকাদম্বমভ্রশৈবলশাদ্বলম্ ॥২॥ পুনর্বসুমহামীনং লোহিতাঙ্গমহাগ্রহম্ । ঐরাবতমহাদ্বীপং স্বাতীহংসবিলাসিতম্ ॥৩॥ বাতসঙ্ঘাতজালোর্মিচন্দ্রাংশুশিশিরাম্বুমৎ । হনূমানপরিশ্রান্তঃ পুপ্লুবে গগনার্ণবম্ ॥৪॥ গ্রসমান ইবাকাশং তারাধিপমিবোল্লিখন্ । হরন্নিব সনক্ষত্রং গগনং সার্কমণ্ডলম্ ॥৫॥ অপারমপরিশ্রান্তশ্চাম্বুধিং সমগাহত । হনূমান্মেঘজালানি বিকর্ষন্নিব গচ্ছতি ॥৬॥ পাণ্ডুরারুণবর্ণানি নীলমাঞ্জিষ্ঠকানি চ । হরিতারুণবর্ণানি মহাভ্রাণি চকাশিরে ॥৭॥ প্রবিশন্নভ্রজালানি নিষ্ক্রমংশ্চ পুনঃ পুনঃ। প্রচন্নশ্চ প্রকাশশ্চ চন্দ্রমা ইব দৃশ্যতে ॥৮॥ বিবিধাভ্রঘনাপন্নগোচরো ধবলাম্বরঃ। দৃশ্যাদৃশ্যতনুর্বীরস্তথা চন্দ্রায়তেঽম্বরে ॥৯॥ তার্ক্ষ্যায়মাণো গগনে স বভৌ বায়ুনন্দনঃ। দারয়ন্মেঘবৃন্দানি নিষ্পতংশ্চ পুনঃ পুনঃ॥১০॥ নদন্নাদেন মহতা মেঘস্বনমহাস্বনঃ। প্রবরান্রাক্ষসান্ হত্বা নাম বিশ্রাব্য চাত্মনঃ॥১১॥ আকুলাং নগরীং কৃত্বা ব্যথয়িত্বা চ রাবণম্ । অর্দয়িত্বা মহাবীরান্ বৈদেহীমভিবাদ্য চ ॥১২॥ আজগাম মহাতেজাঃ পুনর্মধ্যেন সাগরম্ । পর্বতেন্দ্রং সুনাভং চ সমুপস্পৃশ্য বীর্যবান্ ॥১৩॥ জ্যামুক্ত ইব নারাচো মহাবেগোঽভ্যুপাগমৎ । স কিঞ্চিদারাৎ সম্প্রাপ্তঃ সমালোক্য মহাগিরিম্ ॥১৪॥ মহেন্দ্রং মেঘসঙ্কাশং ননাদ স মহাকপিঃ। স পূরয়ামাস কপির্দিশো দশ সমন্ততঃ॥১৫॥ নদন্নাদেন মহতা মেঘস্বনমহাস্বনঃ। স তং দেশমনুপ্রাপ্তঃ সুহৃদ্ধর্শনলালসঃ॥১৬॥ ননাদ সুমহানাদং লাঙ্গূলং চাপ্যকম্পয়ৎ । তস্য নানদ্যমানস্য সুপর্ণাচরিতে পথি ॥১৭॥ ফলতীবাস্য ঘোষেণ গগনং সার্কমণ্ডলম্ । যে তু তত্রোত্তরে কূলে সমুদ্রস্য মহাবলাঃ॥১৮॥ পূর্বং সংবিষ্ঠিতাশ্শূরা বায়ুপুত্রদিদৃক্ষবঃ। মহতো বায়ুনুন্নস্য তোয়দস্যেব নিঃস্বনম্ । শুশ্রুবুস্তে তদা ঘোষমূরুবেগং হনূমতঃ॥১৯॥ তে দীনমনসঃ সর্বে শুশ্রুবুঃ কাননৌকসঃ। বানরেন্দ্রস্য নির্ঘোষং পর্জন্যনিনদোপমম্ ॥২০॥ নিশম্য নদতো নাদং বানরাস্তে সমন্ততঃ। বভূবুরুৎসুকাঃ সর্বে সুহৃদ্দর্শনকাঙ্ক্ষিণঃ॥২১॥ জাম্ববান্ স হরিশ্রেষ্ঠঃ প্রীতিসংহৃষ্টমানসঃ। উপামন্ত্র্য হরীন্সর্বানিদং বচনমব্রবীৎ ॥২২॥ সর্বথা কৃতকার্যোঽসৌ হনূমান্নাত্র সংশয়ঃ। ন হ্যস্যাকৃতকার্যস্য নাদ এবংবিধো ভবেৎ ॥২৩॥ তস্য বাহূরুবেগং চ নিনাদং চ মহাত্মনঃ। নিশম্য হরয়ো হৃষ্টাঃ সমুৎপেতুর্যতস্ততঃ॥২৪॥ তে নগাগ্রান্নগাগ্রাণি শিখরাচ্ছিখরাণি চ । প্রহৃষ্টাঃ সমপদ্যন্ত হনূমন্তং দিদৃক্ষবঃ॥২৫॥ তে প্রীতাঃ পাদপাগ্রেষু গৃহ্য শাখামবস্থিতাঃ। বাসাংসি চ প্রকাশানি সমাবিধ্যন্ত বানরাঃ॥২৬॥ গিরিগহ্বরসংলীনো যথা গর্জতি মারুতঃ। এবং জগর্জ বলবান্ হনুমান্মারুতাত্মজঃ॥২৭॥ তমভ্রঘনসঙ্কাশমাপতন্তং মহাকপিম্ । দৃষ্ট্বা তে বানরাঃ সর্বে তস্থুঃ প্রাঞ্জলয়স্তদা ॥২৮॥ ততস্তু বেগবান্ বীরো গিরের্গিরিনিভঃ কপিঃ। নিপপাত গিরেস্তস্য শিখরে পাদপাকুলে ॥২৯॥ হর্ষেণাপূর্যমাণোঽসৌ রম্যে পর্বতনির্ঝরে । ছিন্নপক্ষ ইবাঽকাশাৎপপাত ধরণীধরঃ॥৩০॥ ততস্তে প্রীতমনসঃ সর্বে বানরপুঙ্গবাঃ। হনূমন্তং মহাত্মানং পরিবার্যোপতস্থিরে ॥৩১॥ পরিবার্য চ তে সর্বে পরাং প্রীতিমুপাগতাঃ। প্রহৃষ্টবদনাঃ সর্বে তমাগতমুপাগমন্ ॥৩২॥ উপায়নানি চাদায় মূলানি চ ফলানি চ । প্রত্যর্চয়ন্হরিশ্রেষ্ঠং হরয়ো মারুতাত্মজম্ ॥৩৩॥ বিনেদুর্মুদিতাঃ কেচিৎ কেচিৎ কিলকিলাং তথা । হৃষ্টাঃ পাদপশাখাশ্চ আনিন্যুর্বানরর্ষভাঃ॥৩৪॥ হনূমাংস্তু গুরূন্বৃদ্ধাঞ্জাম্ববৎপ্রমুখাংস্তদা । কুমারমঙ্গদং চৈব সোঽবন্দত মহাকপিঃ॥৩৫॥ স তাভ্যাং পূজিতঃ পূজ্যঃ কপিভিশ্চ প্রসাদিতঃ। দৃষ্টা দেবীতি বিক্রান্তঃ সঙ্ক্ষেপেণ ন্যবেদয়ৎ ॥৩৬॥ নিষসাদ চ হস্তেন গৃহীত্বা বালিনঃ সুতম্ । রমণীয়ে বনোদ্দেশে মহেন্দ্রস্য গিরেস্তদা ॥৩৭॥ হনূমানব্রবীৎ পৃষ্টস্তদা তান্বানরর্ষভান্ । অশোকবনিকাসংস্থা দৃষ্টা সা জনকাত্মজা ॥৩৮॥ রক্ষ্যমাণা সুঘোরাভী রাক্ষসীভিরনিন্দিতা । একবেণীধরা বালা রামদর্শনলালসা ॥৩৯॥ উপবাসপরিশ্রান্তা মলিনা জটিলা কৃশা । ততো দৃষ্টেতি বচনং মহার্থমমৃতোপমম্ ॥৪০॥ নিশম্য মারুতেঃ সর্বে মুদিতা বানরা ভবন্ । ক্ষ্বেডন্ত্যন্যে নদন্ত্যন্যে গর্জন্ত্যন্যে মহাবলাঃ॥৪১॥ চক্রুঃ কিলকিলামন্যে প্রতিগর্জন্তি চাপরে । কেচিদুচ্ছ্রিতলাঙ্গূলাঃ প্রহৃষ্টাঃ কপিকুঞ্জরাঃ॥৪২॥ আয়তাঞ্চিতদীর্ঘাণি লাঙ্গূলানি প্রবিব্যধুঃ। অপরে তু হনূমন্তং শ্রীমন্তং বানরোত্তমম্ ॥৪৩॥ আপ্লুত্য গিরিশৃঙ্গেষু সংস্পৃশন্তি স্ম হর্ষিতাঃ। উক্তবাক্যং হনূমন্তমঙ্গদস্তু তদাব্রবীৎ ॥৪৪॥ সর্বেষাং হরিবীরাণাং মধ্যে বাচমনুত্তমাম্ । সত্ত্বে বীর্যে ন তে কশ্চিৎসমো বানর বিদ্যতে ॥৪৫॥ যদবপ্লুত্য বিস্তীর্ণং সাগরং পুনরাগতঃ। জীবিতস্য প্রদাতা নস্ত্বমেকো বানরোত্তম ॥৪৬॥ ত্বৎপ্রসাদাৎ সমেষ্যামঃ সিদ্ধার্থা রাঘবেণ হ । অহো স্বামিনি তে ভক্তিরহো বীর্যমহো ধৃতিঃ॥৪৭॥ দিষ্ট্যা দৃষ্টা ত্বয়া দেবী রামপত্নী যশস্বিনী । দিষ্ট্যা ত্যক্ষ্যতি কাকুৎস্থঃ শোকং সীতা বিয়োগজম্ ॥৪৮॥ ততোঽঙ্গদং হনূমন্তং জাম্ববন্তং চ বানরাঃ। পরিবার্য প্রমুদিতা ভেজিরে বিপুলাঃ শিলাঃ॥৪৯॥ উপবিষ্টা গিরেস্তস্য শিলাসু বিপুলাসু তে । শ্রোতুকামাঃ সমুদ্রস্য লঙ্ঘনং বানরোত্তমাঃ॥৫০॥ দর্শনং চাপি লঙ্কায়াঃ সীতায়া রাবণস্য চ । তস্থুঃ প্রাঞ্জলয়ঃ সর্বে হনূমদ্বদনোন্মুখাঃ॥৫১॥ তস্থৌ তত্রাঙ্গদঃ শ্রীমান্বানরৈর্বহুভির্বৃতঃ। উপাস্যমানো বিবুধৈর্দিবি দেবপতির্যথা ॥৫২॥ হনূমতা কীর্তিমতা যশস্বিনা তথাঙ্গদেনাঙ্গদনদ্ধবাহুনা । মুদা তদাধ্যাসিতমুন্নতং মহন্ মহীধরাগ্রং জ্বলিতং শ্রিয়াভবৎ ॥৫৩॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে সপ্তপঞ্চাশঃ সর্গঃ