অথ অষ্টপঞ্চাশঃ সর্গঃ
ততস্তস্য গিরেঃ শৃঙ্গে মহেন্দ্রস্য মহাবলাঃ।
হনুমৎপ্রমুখাঃ প্রীতিং হরয়ো জগ্মুরুত্তমাম্ ॥১॥
প্রীতিমৎসূপবিষ্টেষু বানরেষু মহাত্মসু ।
তং ততঃ প্রতিসংহৃষ্টঃ প্রীতিয়ুক্তং মহাকপিম্ ॥২॥
জাম্ববান্কার্যবৃত্তান্তমপৃচ্ছদনিলাত্মজম্ ।
কথং দৃষ্টা ত্বয়া দেবী কথং বা তত্র বর্ততে ॥৩॥
তস্যাং চাপি কথং বৃত্তঃ ক্রূরকর্মা দশাননঃ।
তত্ত্বতঃ সর্বমেতন্নঃ প্রব্রূহি ত্বং মহাকপে ॥৪॥
সম্মার্গিতা কথং দেবী কিং চ সা প্রত্যভাষত ।
শ্রুতার্থাশ্চিন্তয়িষ্যামো ভূয়ঃ কার্যবিনিশ্চয়ম্ ॥৫॥
যশ্চার্থস্তত্র বক্তব্যো গতৈরস্মাভিরাত্মবান্ ।
রক্ষিতব্যং চ যত্তত্র তদ্ভবান্ব্যাকরোতু নঃ॥৬॥
স নিয়ুক্তস্ততস্তেন সম্প্রহৃষ্টতনূরুহঃ।
নমস্যঞ্শিরসা দেব্যৈ সীতায়ৈ প্রত্যভাষত ॥৭॥
প্রত্যক্ষমেব ভবতাং মহেন্দ্রাগ্রাৎখমাপ্লুতঃ।
উদধের্দক্ষিণং পারং কাঙ্ক্ষমাণঃ সমাহিতঃ॥৮॥
গচ্ছতশ্চ হি মে ঘোরং বিঘ্নরূপমিবাভবৎ ।
কাঞ্চনং শিখরং দিব্যং পশ্যামি সুমনোহরম্ ॥৯॥
স্থিতং পন্থানমাবৃত্য মেনে বিঘ্নং চ তং নগম্ ।
উপসঙ্গম্য তং দিব্যং কাঞ্চনং নগমুত্তমম্ ॥১০॥
কৃতা মে মনসা বুদ্ধির্ভেত্তব্যোঽয়ং ময়েতি চ ।
প্রহতস্য ময়া তস্য লাঙ্গূলেন মহাগিরেঃ॥১১॥
শিখরং সূর্যসঙ্কাশং ব্যশীর্যত সহস্রধা ।
ব্যবসায়ং চ তং বুদ্ধ্বা স হোবাচ মহাগিরিঃ॥১২॥
পুত্রেতি মধুরাং বাণীং মনঃ প্রহ্লাদয়ন্নিব ।
পিতৃব্যং চাপি মাং বিদ্ধি সখায়ং মাতরিশ্বনঃ॥১৩॥
মৈনাকমিতি বিখ্যাতং নিবসন্তং মহোদধৌ ।
পক্ষ্ববন্তঃ পুরা পুত্র বভূবুঃ পর্বতোত্তমাঃ॥১৪॥
ছন্দতঃ পৃথিবীং চেরুর্বাধমানাঃ সমন্ততঃ।
শ্রুত্বা নগানাং চরিতং মহেন্দ্রঃ পাকশাসনঃ॥১৫॥
বজ্রেণ ভগবান্ পক্ষৌ চিচ্ছেদৈষাং সহস্রশঃ।
অহং তু মোচিতস্তস্মাত্তব পিত্রা মহাত্মনা ॥১৬॥
মারুতেন তদা বৎস প্রক্ষিপ্তো বরুণালয়ে ।
রাঘবস্য ময়া সাহ্যে বর্তিতব্যমরিন্দম ॥১৭॥
রামো ধর্মভৃতাং শ্রেষ্ঠো মহেন্দ্রসমবিক্রমঃ।
এতচ্ছ্রুত্বা ময়া তস্য মৈনাকস্য মহাত্মনঃ॥১৮॥
কার্যমাবেদ্য চ গিরেরুদ্ধতং বৈ মনো মম ।
তেন চাহমনুজ্ঞাতো মৈনাকেন মহাত্মনা ॥১৯॥
স চাপ্যন্তর্হিতঃ শৈলো মানুষেণ বপুষ্মতা ।
শরীরেণ মহাশৈলঃ শৈলেন চ মহোদধৌ ॥২০॥
উত্তমং জবমাস্থায় শেষমধ্বানমাস্থিতঃ।
ততোঽহং সুচিরং কালং জবেনাভ্যগমং পথি ॥২১॥
ততঃ পশ্যাম্যহং দেবীং সুরসাং নাগমাতরম্ ।
সমুদ্রমধ্যে সা দেবী বচনং চেদমব্রবীৎ ॥২২॥
মম ভক্ষ্যঃ প্রদিষ্টস্ত্বমমরৈর্হরিসত্তম ।
ততস্ত্বাং ভক্ষয়িষ্যামি বিহিতস্ত্বং হি মে সুরৈঃ॥২৩॥
এবমুক্তঃ সুরসয়া প্রাঞ্জলিঃ প্রণতঃ স্থিতঃ।
বিবর্ণবদনো ভূত্বা বাক্যং চেদমুদীরয়ম্ ॥২৪॥
রামো দাশরথিঃ শ্রীমান্প্রবিষ্টো দণ্ডকাবনম্ ।
লক্ষ্মণেন সহ ভ্রাত্রা সীতয়া চ পরন্তপঃ॥২৫॥
তস্য সীতা হৃতা ভার্যা রাবণেন দুরাত্মনা ।
তস্যাঃ সকাশং দূতোঽহং গমিষ্যে রামশাসনাৎ ॥২৬॥
কর্তুমর্হসি রামস্য সাহায়্যং বিষয়ে সতী ।
অথবা মৈথিলীং দৃষ্ট্বা রামং চাক্লিষ্টকারিণম্ ॥২৭॥
আগমিষ্যামি তে বক্ত্রং সত্যং প্রতিশৃণোমি তে ।
এবমুক্তা ময়া সা তু সুরসা কামরূপিণী ॥২৮॥
অব্রবীন্নাতিবর্তেত কশ্চিদেষ বরো মম ।
এবমুক্তঃ সুরসয়া দশয়োজনমায়তঃ॥২৯॥
ততোঽর্ধগুণবিস্তারো বভূবাহং ক্ষণেন তু ।
মৎপ্রমাণাধিকং চৈব ব্যাদিতং তু মুখং তয়া ॥৩০॥
তদ্দৃষ্ট্বা ব্যাদিতং ত্বাস্যং হ্রস্বং হ্যকরবং পুনঃ।
তস্মিন্মুহূর্তে চ পুনর্বভূবাঙ্গুষ্ঠসংমিতঃ॥৩১॥
অভিপত্যাশু তদ্বক্ত্রং নির্গতোঽহং ততঃ ক্ষণাৎ ।
অব্রবীৎসুরসা দেবী স্বেন রূপেণ মাং পুনঃ॥৩২॥
অর্থসিদ্ধ্যৈ হরিশ্রেষ্ঠ গচ্ছ সৌম্য যথাসুখম্ ।
সমানয় চ বৈদেহীং রাঘবেণ মহাত্মনা ॥৩৩॥
সুখী ভব মহাবাহো প্রীতাস্মি তব বানর ।
ততোঽহং সাধু সাধ্বীতি সর্বভূতৈঃ প্রশংসিতঃ॥৩৪॥
ততোঽন্তরিক্ষং বিপুলং প্লুতোঽহং গরুডো যথা ।
ছায়া মে নিগৃহীতা চ ন চ পশ্যামি কিঞ্চন ॥৩৫॥
সোঽহং বিগতবেগস্তু দিশো দশ বিলোকয়ন্ ।
ন কিঞ্চিত্তত্র পশ্যামি যেন মে বিহতা গতিঃ॥৩৬॥
অথ মে বুদ্ধিরুৎপন্না কিং নাম গমনে মম ।
ঈদৃশো বিঘ্ন উৎপন্নো রূপমত্র ন দৃশ্যতে ॥৩৭॥
অধোভাগে তু মে দৃষ্টিঃ শোচতঃ পতিতা তদা ।
তত্রাদ্রাক্ষমহং ভীমাং রাক্ষসীং সলিলে শয়াম্ ॥৩৮॥
প্রহস্য চ মহানাদমুক্তোঽহং ভীময়া তয়া ।
অবস্থিতমসম্ভ্রান্তমিদং বাক্যমশোভনম্ ॥৩৯॥
ক্বাসি গন্তা মহাকায় ক্ষুধিতায়া মমেপ্সিতঃ।
ভক্ষঃ প্রীণয় মে দেহং চিরমাহারবর্জিতম্ ॥৪০॥
বাঢমিত্যেব তাং বাণীং প্রত্যগৃহ্ণামহং ততঃ।
আস্য প্রমাণাদধিকং তস্যাঃ কায়মপূরয়ম্ ॥৪১॥
তস্যাশ্চাস্যং মহদ্ভীমং বর্ধতে মম ভক্ষণে ।
ন তু মাং সা নু বুবুধে মম বা বিকৃতং কৃতম্ ॥৪২॥
ততোঽহং বিপুলং রূপং সঙ্ক্ষিপ্য নিমিষান্তরাৎ ।
তস্যা হৃদয়মাদায় প্রপতামি নভঃস্থলম্ ॥৪৩॥
সা বিসৃষ্টভুজা ভীমা পপাত লবণাম্ভসি ।
ময়া পর্বতসঙ্কাশা নিকৃত্তহৃদয়া সতী ॥৪৪॥
শৃণোমি খগতানাং চ বাচঃ সৌম্যা মহাত্মনাম্ ।
রাক্ষসী সিংহিকা ভীমা ক্ষিপ্রং হনুমতা হতা ॥৪৫॥
তাং হত্বা পুনরেবাহং কৃত্যমাত্যযিকং স্মরন্ ।
গত্বা চ মহদধ্বানং পশ্যামি নগমণ্ডিতম্ ॥৪৬॥
দক্ষিণং তীরমুদধের্লঙ্কা যত্র গতা পুরী ।
অস্তং দিনকরে যাতে রক্ষসাং নিলয়ং পুরীম্ ॥৪৭॥
প্রবিষ্টোঽহমবিজ্ঞাতো রক্ষোভির্ভীমবিক্রমৈঃ।
তত্র প্রবিশতশ্চাপি কল্পান্তঘনসপ্রভা ॥৪৮॥
অট্টহাসং বিমুঞ্চন্তী নারী কাপ্যুত্থিতা পুরঃ।
জিঘাংসন্তীং ততস্তাং তু জ্বলদগ্নিশিরোরুহাম্ ॥৪৯॥
সব্যমুষ্টিপ্রহারেণ পরাজিত্য সুভৈরবাম্ ।
প্রদোষকালে প্রবিশং ভীতয়াহং তয়োদিতঃ॥৫০॥
অহং লঙ্কাপুরী বীর নির্জিতা বিক্রমেণ তে ।
যস্মাত্তস্মাদ্বিজেতাসি সর্বরক্ষাংস্যশেষতঃ॥৫১॥
তত্রাহং সর্বরাত্রং তু বিচরঞ্জনকাত্মজাম্ ।
রাবণান্তঃপুরগতো ন চাপশ্যং সুমধ্যমাম্ ॥৫২॥
ততঃ সীতামপশ্যংস্তু রাবণস্য নিবেশনে ।
শোকসাগরমাসাদ্য ন পারমুপলক্ষয়ে ॥৫৩॥
শোচতা চ ময়া দৃষ্টং প্রাকারেণাভিসংবৃতম্ ।
কাঞ্চনেন বিকৃষ্টেন গৃহোপবনমুত্তমম্ ॥৫৪॥
সপ্রাকারমবপ্লুত্য পশ্যামি বহুপাদপম্ ।
অশোকবনিকামধ্যে শিংশপাপাদপো মহান্ ॥৫৫॥
তমারুহ্য চ পশ্যামি কাঞ্চনং কদলী বনম্ ।
অদূরাচ্ছিংশপাবৃক্ষাৎপশ্যামি বনবর্ণিনীম্ ॥৫৬॥
শ্যামাং কমলপত্রাক্ষীমুপবাসকৃশাননাম্ ।
তদেকবাসঃসংবীতাং রজোধ্বস্তশিরোরুহাম্ ॥৫৭॥
শোকসন্তাপদীনাঙ্গীং সীতাং ভর্তৃহিতে স্থিতাম্ ।
রাক্ষসীভির্বিরূপাভিঃ ক্রূরাভিরভিসংবৃতাম্ ॥৫৮॥
মাংসশোণিতভক্ষ্যাভির্ব্যাঘ্রীভির্হরিণীং যথা ।
সা ময়া রাক্ষসীমধ্যে তর্জ্যমানা মুহুর্মুহুঃ॥৫৯॥
একবেণীধরা দীনা ভর্তৃচিন্তাপরায়ণা ।
ভূমিশয়্যা বিবর্ণাঙ্গী পদ্মিনীব হিমাগমে ॥৬০॥
রাবণাদ্বিনিবৃত্তার্থা মর্তব্যে কৃতনিশ্চয়া ।
কথঞ্চিন্মৃগশাবাক্ষী তূর্ণমাসাদিতা ময়া ॥৬১॥
তাং দৃষ্ট্বা তাদৃশীং নারীং রামপত্নীং যশস্বিনীম্ ।
তত্রৈব শিংশপাবৃক্ষে পশ্যন্নহমবস্থিতঃ॥৬২॥
ততো হলহলাশব্দং কাঞ্চীনূপুরমিশ্রিতম্ ।
শৃণোম্যধিকগম্ভীরং রাবণস্য নিবেশনে ॥৬৩॥
ততোঽহং পরমোদ্বিগ্নঃ স্বরূপং প্রত্যসংহরম্ ।
অহং চ শিংশপাবৃক্ষে পক্ষীব গহনে স্থিতঃ॥৬৪॥
ততো রাবণদারাশ্চ রাবণশ্চ মহাবলঃ।
তং দেশমনুসম্প্রাপ্তো যত্র সীতাভবৎস্থিতা ॥৬৫॥
তং দৃষ্ট্বাথ বরারোহা সীতা রক্ষোগণেশ্বরম্ ।
সঙ্কুচ্যোরূ স্তনৌ পীনৌ বাহুভ্যাং পরিরভ্য চ ॥৬৬॥
বিত্রস্তাং পরমোদ্বিগ্নাং বীক্ষ্যমাণামিতস্ততঃ।
ত্রাণং কংঞ্চিদপশ্যন্তীং বেপমানাং তপস্বিনীম্ ॥৬৭॥
তামুবাচ দশগ্রীবঃ সীতাং পরমদুঃখিতাম্ ।
অবাক্শিরাঃ প্রপতিতো বহুমন্যস্ব মামিতি ॥৬৮॥
যদি চেত্ত্বং তু মাং দর্পান্নাভিনন্দসি গর্বিতে ।
দ্বিমাসানন্তরং সীতে পাস্যামি রুধিরং তব ॥৬৯॥
এতচ্ছ্রুত্বা বচস্তস্য রাবণস্য দুরাত্মনঃ।
উবাচ পরমক্রুদ্ধা সীতা বচনমুত্তমম্ ॥৭০॥
রাক্ষসাধম রামস্য ভার্যামমিততেজসঃ।
ইক্ষ্বাকুবংশনাথস্য স্নুষাং দশরথস্য চ ॥৭১॥
অবাচ্যং বদতো জিহ্বা কথং ন পতিতা তব ।
কিংস্বিদ্বীর্য তবানার্য যো মাং ভর্তুরসংনিধৌ ॥৭২॥
অপহৃত্যাগতঃ পাপ তেনাদৃষ্টো মহাত্মনা ।
ন ত্বং রামস্য সদৃশো দাস্যেঽপ্যস্যা ন যুজ্যসে ॥৭৩॥
অজেয়ঃ সত্যবাক্ শূরো রণশ্লাঘী চ রাঘবঃ।
জানক্যা পরুষং বাক্যমেবমুক্তো দশাননঃ॥৭৪॥
জজ্বাল সহসা কোপাচ্চিতাস্থ ইব পাবকঃ।
বিবৃত্য নয়নে ক্রূরে মুষ্টিমুদ্যম্য দক্ষিণম্ ॥৭৫॥
মৈথিলীং হন্তুমারব্ধঃ স্ত্রীভির্হাহাকৃতং তদা ।
স্ত্রীণাং মধ্যাৎসমুৎপত্য তস্য ভার্যা দুরাত্মনঃ॥৭৬॥
বরা মন্দোদরী নাম তয়া স প্রতিষেধিতঃ।
উক্তশ্চ মধুরাং বাণীং তয়া স মদনার্দিতঃ॥৭৭॥
সীতয়া তব কিং কার্যং মহেন্দ্রসমবিক্রম ।
ময়া সহ রমস্বাদ্য মদ্বিশিষ্টা ন জানকী ॥৭৮॥
দেবগন্ধর্বকন্যাভির্যক্ষকন্যাভিরেব চ ।
সার্ধং প্রভো রমস্বেতি সীতয়া কিং করিষ্যসি ॥৭৯॥
ততস্তাভিঃ সমেতাভির্নারীভিঃ স মহাবলঃ।
উত্থাপ্য সহসা নীতো ভবনং স্বং নিশাচরঃ॥৮০॥
যাতে তস্মিন্দশগ্রীবে রাক্ষস্যো বিকৃতাননাঃ।
সীতাং নির্ভর্ত্সয়ামাসুর্বাক্যৈঃ ক্রূরৈঃ সুদারুণৈঃ॥৮১॥
তৃণবদ্ভাষিতং তাসাং গণয়ামাস জানকী ।
গর্জিতং চ তথা তাসাং সীতাং প্রাপ্য নিরর্থকম্ ॥৮২॥
বৃথাগর্জিতনিশ্চেষ্টা রাক্ষস্যঃ পিশিতাশনাঃ।
রাবণায় শশংসুস্তাঃ সীতাব্যবসিতং মহৎ ॥৮৩॥
ততস্তাঃ সহিতাঃ সর্বা বিহতাশা নিরুদ্যমাঃ।
পরিক্লিশ্য সমস্তাস্তা নিদ্রাবশমুপাগতাঃ॥৮৪॥
তাসু চৈব প্রসুপ্তাসু সীতা ভর্তৃহিতে রতা ।
বিলপ্য করুণং দীনা প্রশুশোচ সুদুঃখিতা ॥৮৫॥
তাসাং মধ্যাৎসমুত্থায় ত্রিজটা বাক্যমব্রবীৎ ।
আত্মানং খাদত ক্ষিপ্রং ন সীতামসিতেক্ষণাম্ ॥৮৬॥
জনকস্যাত্মজাং সাধ্বীং স্নুষাং দশরথস্য চ ।
স্বপ্নো হ্যদ্য ময়া দৃষ্টো দারুণো রোমহর্ষণঃ॥৮৭॥
রক্ষসাং চ বিনাশায় ভর্তুরস্যা জয়ায় চ ।
অলমস্মান্ পরিত্রাতুং রাঘবাদ্রাক্ষসীগণম্ ॥৮৮॥
অভিয়াচাম বৈদেহীমেতদ্ধি মম রোচতে ।
যদি হ্যেবংবিধঃ স্বপ্নো দুঃখিতায়াঃ প্রদৃশ্যতে ॥৮৯॥
সা দুঃখৈর্বিবিধৈর্মুক্তা সুখমাপ্নোত্যনুত্তমম্ ।
প্রণিপাতপ্রসন্না হি মৈথিলী জনকাত্মজা ॥৯০॥
অলমেষা পরিত্রাতুং রাক্ষসির্মহতো ভয়াৎ ।
ততঃ সা হ্রীমতী বালা ভর্তুর্বিজয়হর্ষিতা ॥৯১॥
অবোচদ্যদি তত্তথ্যং ভবেয়ং শরণং হি বঃ।
তাং চাহং তাদৃশীং দৃষ্ট্বা সীতায়া দারুণাং দশাম্ ॥৯২॥
চিন্তয়ামাস বিশ্রান্তো ন চ মে নির্বৃতং মনঃ।
সম্ভাষণার্থে চ ময়া জানক্যাশ্চিন্তিতো বিধিঃ॥৯৩॥
ইক্ষ্বাকুকুলবংশস্তু স্তুতো মম পুরস্কৃতঃ।
শ্রুত্বা তু গদিতাং বাচং রাজর্ষিগণভূষিতাম্ ॥৯৪॥
প্রত্যভাষত মাং দেবী বাষ্পৈঃ পিহিতলোচনা ।
কস্ত্বং কেন কথং চেহ প্রাপ্তো বানরপুঙ্গব ॥৯৫॥
কা চ রামেণ তে প্রীতিস্তন্মে শংসিতুমর্হসি ।
তস্যাস্তদ্বচনং শ্রুত্বা অহমপ্যব্রুবং বচঃ॥৯৬॥
দেবি রামস্য ভর্তুস্তে সহায়ো ভীমবিক্রমঃ।
সুগ্রীবো নাম বিক্রান্তো বানরেন্দ্রো মহাবলঃ॥৯৭॥
তস্য মাং বিদ্ধি ভৃত্যং ত্বং হনূমন্তমিহাগতম্ ।
ভর্ত্রা সম্প্রহিতস্তুভ্যং রামেণাক্লিষ্টকর্মণা ॥৯৮॥
ইদং তু পুরুষব্যাঘ্রঃ শ্রীমান্ দাশরথিঃ স্বয়ম্ ।
অঙ্গুলীয়মভিজ্ঞানমদাত্তুভ্যং যশস্বিনি ॥৯৯॥
তদিচ্ছামি ত্বয়াজ্ঞপ্তং দেবি কিং করবাণ্যহম্ ।
রামলক্ষ্মণয়োঃ পার্শ্বং নয়ামি ত্বাং কিমুত্তরম্ ॥১০০॥
এতচ্ছ্রুত্বা বিদিত্বা চ সীতা জনকনন্দিনী ।
আহ রাবণমুৎপাট্য রাঘবো মাং নয়ত্বিতি ॥১০১॥
প্রণম্য শিরসা দেবীমহমার্যামনিন্দিতাম্ ।
রাঘবস্য মনোহ্লাদমভিজ্ঞানময়াচিষম্ ॥১০২॥
অথ মামব্রবীৎসীতা গৃহ্যতাময়মুত্তমঃ।
মণির্যেন মহাবাহূ রামস্ত্বাং বহুমন্যতে ॥১০৩॥
ইত্যুক্ত্বা তু বরারোহা মণিপ্রবরমুত্তমম্ ।
প্রায়চ্ছৎপরমোদ্বিগ্না বাচা মাং সন্দিদেশ হ ॥১০৪॥
ততস্তস্যৈ প্রণম্যাহং রাজপুত্র্যৈ সমাহিতঃ।
প্রদক্ষিণং পরিক্রামমিহাভ্যুদ্গতমানসঃ॥১০৫॥
উত্তরং পুনরেবাহ নিশ্চিত্য মনসা তদা ।
হনূমন্মম বৃত্তান্তং বক্তুমর্হসি রাঘবে ॥১০৬॥
যথা শ্রুত্বৈব নচিরাত্তাবুভৌ রামলক্ষ্মণৌ ।
সুগ্রীবসহিতৌ বীরাবুপেয়াতাং তথা কুরু ॥১০৭॥
যদ্যন্যথা ভবেদেতদ্দ্বৌ মাসৌ জীবিতং মম ।
ন মাং দ্রক্ষ্যতি কাকুৎস্থো ম্রিয়ে সাহমনাথবৎ ॥১০৮॥
তচ্ছ্রুত্বা করুণং বাক্যং ক্রোধো মামভ্যবর্তত ।
উত্তরং চ ময়া দৃষ্টং কার্যশেষমনন্তরম্ ॥১০৯॥
ততোঽবর্ধত মে কায়স্তদা পর্বতসংনিভঃ।
যুদ্ধাকাঙ্ক্ষী বনং তস্য বিনাশয়িতুমারভে ॥১১০॥
তদ্ভগ্নং বনখণ্ডং তু ভ্রান্তত্রস্তমৃগদ্বিজম্ ।
প্রতিবুদ্ধ্য নিরীক্ষন্তে রাক্ষস্যো বিকৃতাননাঃ॥১১১॥
মাং চ দৃষ্ট্বা বনে তস্মিন্সমাগম্য ততস্ততঃ।
তাঃ সমভ্যাগতাঃ ক্ষিপ্রং রাবণায়াচচক্ষিরে ॥১১২॥
রাজন্বনমিদং দুর্গং তব ভগ্নং দুরাত্মনা ।
বানরেণ হ্যবিজ্ঞায় তব বীর্যং মহাবল ॥১১৩॥
তস্য দুর্বুদ্ধিতা রাজংস্তব বিপ্রিয়কারিণঃ।
বধমাজ্ঞাপয় ক্ষিপ্রং যথাসৌ ন র্পুনব্রজেৎ ॥১১৪॥
তচ্ছ্রুত্বা রাক্ষসেন্দ্রেণ বিসৃষ্টা বহুদুর্জয়াঃ।
রাক্ষসাঃ কিঙ্করা নাম রাবণস্য মনোঽনুগাঃ॥১১৫॥
তেষামশীতিসাহস্রং শূলমুদ্গরপাণিনাম্ ।
ময়া তস্মিন্বনোদ্দেশে পরিঘেণ নিষূদিতম্ ॥১১৬॥
তেষাং তু হতশিষ্টা যে তে গতা লঘুবিক্রমাঃ।
নিহতং চ ময়া সৈন্যং রাবণায়াচচক্ষিরে ॥১১৭॥
ততো মে বুদ্ধিরুৎপন্না চৈত্যপ্রাসাদমুত্তমম্ ।
তত্রস্থান্রাক্ষসান্হত্বা শতং স্তম্ভেন বৈ পুনঃ॥১১৮॥
ললামভূতো লঙ্কায়া ময়া বিধ্বংসিতো রুষা ।
ততঃ প্রহস্তস্য সুতং জম্বুমালিনমাদিশৎ ॥১১৯॥
রাক্ষসৈর্বহুভিঃ সার্ধং ঘোররূপৈর্ভয়ানকৈঃ।
তমহং বলসম্পন্নং রাক্ষসং রণকোবিদম্ ॥১২০॥
পরিঘেণাতিঘোরেণ সূদয়ামি সহানুগম্ ।
তচ্ছ্রুত্বা রাক্ষসেন্দ্রস্তু মন্ত্রিপুত্রান্মহাবলান্ ॥১২১॥
পদাতিবলসম্পন্নান্প্রেষয়ামাস রাবণঃ।
পরিঘেণৈব তান্সর্বান্নয়ামি যমসাদনম্ ॥১২২॥
মন্ত্রিপুত্রান্হতাঞ্শ্রুত্বা সমরে লঘুবিক্রমান্ ।
পঞ্চসেনাগ্রগাঞ্শূরান্প্রেষয়ামাস রাবণঃ॥১২৩॥
তানহং সহসৈন্যান্বৈ সর্বানেবাভ্যসূদয়ম্ ।
ততঃ পুনর্দশগ্রীবঃ পুত্রমক্ষং মহাবলম্ ॥১২৪॥
বহুভী রাক্ষসৈঃ সার্ধং প্রেষয়ামাস সংয়ুগে ।
তং তু মন্দোদরী পুত্রং কুমারং রণপণ্ডিতম্ ॥১২৫॥
সহসা খং সমুদ্যন্তং পাদয়োশ্চ গৃহীতবান্ ।
তমাসীনং শতগুণং ভ্রাময়িত্বা ব্যপেষয়ম্ ॥১২৬॥
তমক্ষমাগতং ভগ্নং নিশম্য স দশাননঃ।
ততশ্চেন্দ্রজিতং নাম দ্বিতীয়ং রাবণঃ সুতম্ ॥১২৭॥
ব্যাদিদেশ সুসঙ্ক্রুদ্ধো বলিনং যুদ্ধদুর্মদম্ ।
তচ্চাপ্যহং বলং সর্বং তং চ রাক্ষসপুঙ্গবম্ ॥১২৮॥
নষ্টৌজসং রণে কৃত্বা পরং হর্ষমুপাগতঃ।
মহতাপি মহাবাহুঃ প্রত্যযেন মহাবলঃ॥১২৯॥
প্রেহিতো রাবণেনৈষ সহ বীরৈর্মদোদ্ধতৈঃ।
সোঽবিষহ্যং হি মাং বুদ্ধ্বা স্বসৈন্যং চাবমর্দিতম্ ॥১৩০॥
ব্রহ্মণোঽস্ত্রেণ স তু মাং প্রবদ্ধ্বা চাতিবেগিনঃ।
রজ্জুভিশ্চাপি বধ্নন্তি ততো মাং তত্র রাক্ষসাঃ॥১৩১॥
রাবণস্য সমীপং চ গৃহীত্বা মামুপাগমন্ ।
দৃষ্ট্বা সম্ভাষিতশ্চাহং রাবণেন দুরাত্মনা ॥১৩২॥
পৃষ্টশ্চ লঙ্কাগমনং রাক্ষসানাং চ তং বধম্ ।
তৎসর্বং চ রণে তত্র সীতার্থমুপজল্পিতম্ ॥১৩৩॥
তস্যাস্তু দর্শনাকাঙ্ক্ষী প্রাপ্তস্ত্বদ্ভবনং বিভো ।
মারুতস্যৌরসঃ পুত্রো বানরো হনুমানহম্ ॥১৩৪॥
রামদূতং চ মাং বিদ্ধি সুগ্রীবসচিবং কপিম্ ।
সোঽহং দৌত্যেন রামস্য ত্বৎসকাশমিহাগতঃ॥১৩৫॥
শৃণু চাপি সমাদেশং যদহং প্রব্রবীমি তে ।
রাক্ষসেশ হরীশস্ত্বাং বাক্যমাহ সমাহিতম্ ॥১৩৬॥
সুগ্রীবশ্চ মহাভাগঃ স ত্বাং কৌশলমব্রবীৎ ।
ধর্মার্থকামসহিতং হিতং পথ্যমুবাচ হ ॥১৩৭॥
বসতো ঋষ্যমূকে মে পর্বতে বিপুলদ্রুমে ।
রাঘবো রণবিক্রান্তো মিত্রত্বং সমুপাগতঃ॥১৩৮॥
তেন মে কথিতং রাজন্ভার্যা মে রক্ষসা হৃতা ।
তত্র সাহায়্যহেতোর্মে সময়ং কর্তুমর্হসি ॥১৩৯॥
বালিনা হৃতরাজ্যেন সুগ্রীবেণ সহ প্রভুঃ।
চক্রেঽগ্নিসাক্ষিকং সখ্যং রাঘবঃ সহলক্ষ্মণঃ॥১৪০॥
তেন বালিনমাহত্য শরেণৈকেন সংয়ুগে ।
বানরাণাং মহারাজঃ কৃতঃ সম্প্লবতাং প্রভুঃ॥১৪১॥
তস্য সাহায়্যমস্মাভিঃ কার্যং সর্বাত্মনা ত্বিহ ।
তেন প্রস্থাপিতস্তুভ্যং সমীপমিহ ধর্মতঃ॥১৪২॥
ক্ষিপ্রমানীয়তাং সীতা দীয়তাং রাঘবস্য চ ।
যাবন্ন হরয়ো বীরা বিধমন্তি বলং তব ॥১৪৩॥
বানরাণাং প্রভাবোঽয়ং ন কেন বিদিতঃ পুরা ।
দেবতানাং সকাশং চ যে গচ্ছন্তি নিমন্ত্রিতাঃ॥১৪৪॥
ইতি বানররাজস্ত্বামাহেত্যভিহিতো ময়া ।
মামৈক্ষত ততো রুষ্টশ্চক্ষুষা প্রদহন্নিব ॥১৪৫॥
তেন বধ্যোঽহমাজ্ঞপ্তো রক্ষসা রৌদ্রকর্মণা ।
মৎপ্রভাবমবিজ্ঞায় রাবণেন দুরাত্মনা ॥১৪৬॥
ততো বিভীষণো নাম তস্য ভ্রাতা মহামতিঃ।
তেন রাক্ষসরাজশ্চ যাচিতো মম কারণাৎ ॥১৪৭॥
নৈবং রাক্ষসশার্দূল ত্যজ্যতামেষ নিশ্চয়ঃ।
রাজশাস্ত্রব্যপেতো হি মার্গঃ সংলক্ষ্যতে ত্বয়া ॥১৪৮॥
দূতবধ্যা ন দৃষ্টা হি রাজশাস্ত্রেষু রাক্ষস ।
দূতেন বেদিতব্যং চ যথাভিহিতবাদিনা ॥১৪৯॥
সুমহত্যপরাধেঽপি দূতস্যাতুলবিক্রম ।
বিরূপকরণং দৃষ্টং ন বধোঽস্তীহ শাস্ত্রতঃ॥১৫০॥
বিভীষণেনৈবমুক্তো রাবণঃ সন্দিদেশ তান্ ।
রাক্ষসানেতদেবাদ্য লাঙ্গূলং দহ্যতামিতি ॥১৫১॥
ততস্তস্য বচঃ শ্রুত্বা মম পুচ্ছং সমন্ততঃ।
বেষ্টিতং শণবল্কৈশ্চ পট্টৈঃ কার্পাসকৈস্তথা ॥১৫২॥
রাক্ষসাঃ সিদ্ধসংনাহাস্ততস্তে চণ্ডবিক্রমাঃ।
তদাদীপ্যন্ত মে পুচ্ছং হনন্তঃ কাষ্ঠমুষ্টিভিঃ॥১৫৩॥
বদ্ধস্য বহুভিঃ পাশৈর্যন্ত্রিতস্য চ রাক্ষসৈঃ।
ন মে পীডাভবৎকাচিদ্দিদৃক্ষোর্নগরীং দিবা ॥১৫৪॥
ততস্তে রাক্ষসাঃ শূরা বদ্ধং মামগ্নিসংবৃতম্ ।
অঘোষয়ন্রাজমার্গে নগরদ্বারমাগতাঃ॥১৫৫॥
ততোঽহং সুমহদ্রূপং সঙ্ক্ষিপ্য পুনরাত্মনঃ।
বিমোচয়িত্বা তং বন্ধং প্রকৃতিস্থঃ স্থিতঃ পুনঃ॥১৫৬॥
আয়সং পরিঘং গৃহ্য তানি রক্ষাংস্যসূদয়ম্ ।
ততস্তন্নগরদ্বারং বেগেনাপ্লুতবানহম্ ॥১৫৭॥
পুচ্ছেন চ প্রদীপ্তেন তাং পুরীং সাট্টগোপুরাম্ ।
দহাম্যহমসম্ভ্রান্তো যুগান্তাগ্নিরিব প্রজাঃ॥১৫৮॥
বিনষ্টা জানকী ব্যক্তং ন হ্যদগ্ধঃ প্রদৃশ্যতে ।
লঙ্কায়াঃ কশ্চিদুদ্ধেশঃ সর্বা ভস্মীকৃতা পুরী ॥১৫৯॥
দহতা চ ময়া লঙ্কাং দগ্ধা সীতা ন সংশয়ঃ।
রামস্য চ মহৎকার্যং ময়েদং বি়ফলীকৃতম্ ॥১৬০॥
ইতি শোকসমাবিষ্টশ্চিন্তামহমুপাগতঃ।
ততোঽহং বাচমশ্রৌষং চারণানাং শুভাক্ষরাম্ ॥১৬১॥
জানকী ন চ দগ্ধেতি বিস্ময়োদন্তভাষিণাম্ ।
ততো মে বুদ্ধিরুৎপন্না শ্রুত্বা তামদ্ভুতাং গিরম্ ॥১৬২॥
অদগ্ধা জানকীত্যেব নিমিত্তৈশ্চোপলক্ষিতম্ ।
দীপ্যমানে তু লাঙ্গূলে ন মাং দহতি পাবকঃ॥১৬৩॥
হৃদয়ং চ প্রহৃষ্টং মে বাতাস্সুরভিগন্ধিনঃ।
তৈর্নিমিত্তৈশ্চ দৃষ্টার্থৈঃ কারণৈশ্চ মহাগুণৈঃ॥১৬৪॥
ঋষিবাক্যৈশ্চ দৃষ্টার্থৈরভবং হৃষ্টমানসঃ।
পুনর্দৃষ্টা চ বৈদেহী বিসৃষ্টশ্চ তয়া পুনঃ॥১৬৫॥
ততঃ পর্বতমাসাদ্য তত্রারিষ্টমহং পুনঃ।
প্রতিপ্লবনমারেভে যুষ্মদ্ধর্শনকাঙ্ক্ষয়া ॥১৬৬॥
ততঃ শ্বসনচন্দ্রার্কসিদ্ধগন্ধর্বসেবিতম্ ।
পন্থানমহমাক্রম্য ভবতো দৃষ্টবানিহ ॥১৬৭॥
রাঘবস্য প্রসাদেন ভবতাং চৈব তেজসা ।
সুগ্রীবস্য চ কার্যার্থং ময়া সর্বমনুষ্ঠিতম্ ॥১৬৮॥
এতৎসর্বং ময়া তত্র যথাবদুপপাদিতম্ ।
তত্র যন্ন কৃতং শেষং তৎসর্বং ক্রিয়তামিতি ॥১৬৯॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে অষ্টপঞ্চাশঃ সর্গঃ