অথ একোনষষ্টিতমঃ সর্গঃ
এতদাখ্যায় তৎসর্বং হনূমান্মারুতাত্মজঃ।
ভূয়ঃ সমুপচক্রাম বচনং বক্তুমুত্তরম্ ॥১॥
সফলো রাঘবোদ্যোগঃ সুগ্রীবস্য চ সম্ভ্রমঃ।
শীলমাসাদ্য সীতায়া মম চ প্রীণিতং মনঃ॥২॥
আর্যায়াঃ সদৃশং শীলং সীতায়াঃ প্লবগর্ষভাঃ।
তপসা ধারয়েল্লোকান্ক্রুদ্ধা বা নির্দহেদপি ॥৩॥
সর্বথাতিপ্রকৃষ্টোঽসৌ রাবণো রাক্ষসেশ্বরঃ।
যস্য তাং স্পৃশতো গাত্রং তপসা ন বিনাশিতম্ ॥৪॥
ন তদগ্নিশিখা কুর্যাৎসংস্পৃষ্টা পাণিনা সতী ।
জনকস্য সুতা কুর্যাদ্ যৎ ক্রোধকলুষীকৃতা ॥৫॥
জাম্ববৎপ্রমুখান্ সর্বাননুজ্ঞাপ্য মহাকপীন্ ।
অস্মিন্নেবঙ্গতে কার্যে ভবতাং চ নিবেদিতে ।
ন্যায়্যং স্ম সহ বৈদেহ্যা দ্রষ্টুং তৌ পার্থিবাত্মজৌ ॥৬॥
অহমেকোঽপি পর্যাপ্তঃ সরাক্ষসগণাং পুরীম্ ।
তাং লঙ্কাং তরসা হন্তুং রাবণং চ মহাবলম্ ॥৭॥
কিং পুনঃ সহিতো বীরৈর্বলবদ্ভিঃ কৃতাত্মভিঃ।
কৃতাস্ত্রৈঃ প্লবগৈঃ শক্তৈর্ভবর্দ্ভিবিজয়ৈষিভিঃ॥৮॥
অহং তু রাবণং যুদ্ধে সসৈন্যং সপুরঃসরম্ ।
সহপুত্রং বধিষ্যামি সহোদরয়ুতং যুধি ॥৯॥
ব্রাহ্মমস্ত্রং চ রৌদ্রং চ বায়ব্যং বারুণং তথা ।
যদি শক্রজিতোঽস্ত্রাণি দুর্নিরীক্ষ্যাণি সংয়ুগে ।
তান্যহং নিহনিষ্যামি বিধমিষ্যামি রাক্ষসান্ ॥১০॥
ভবতামভ্যনুজ্ঞাতো বিক্রমো মে রুণদ্ধি তম্ ।
ময়াতুলা বিসৃষ্টা হি শৈলবৃষ্টির্নিরন্তরা ॥১১॥
দেবানপি রণে হন্যাৎকিং পুনস্তান্নিশাচরান্ ।
ভবতামননুজ্ঞাতো বিক্রমো মে রুণদ্ধি মাম্ ॥১২॥
সাগরোঽপ্যতিয়াদ্বেলাং মন্দরঃ প্রচলেদপি ।
ন জাম্ববন্তং সমরে কম্পয়েদরিবাহিনী ॥১৩॥
সর্বরাক্ষসসঙ্ঘানাং রাক্ষসা যে চ পূর্বজাঃ।
অলমেকোঽপি নাশায় বীরো বালিসুতঃ কপিঃ॥১৪॥
প্লবগস্যোরুবেগেন নীলস্য চ মহাত্মনঃ।
মন্দরোঽপ্যবশীর্যেত কিং পুনর্যুধি রাক্ষসাঃ॥১৫॥
সদেবাসুরয়ক্ষেষু গন্ধর্বোরগপক্ষিষু ।
মৈন্দস্য প্রতিয়োদ্ধারং শংসত দ্বিবিদস্য বা ॥১৬॥
অশ্বিপুত্রৌ মহাবেগাবেতৌ প্লবগসত্তমৌ ।
এতয়োঃ প্রতিয়োদ্ধারং ন পশ্যামি রণাজিরে ॥১৭॥
ময়ৈব নিহতা লঙ্কা দগ্ধা ভস্মীকৃতা পুরী ।
রাজমার্গেষু সর্বেষু নাম বিশ্রাবিতং ময়া ॥১৮॥
জয়ত্যতিবলো রামো লক্ষ্মণশ্চ মহাবলঃ।
রাজা জয়তি সুগ্রীবো রাঘবেণাভিপালিতঃ॥১৯॥
অহং কোসলরাজস্য দাসঃ পবনসম্ভবঃ।
হনুমানিতি সর্বত্র নাম বিশ্রাবিতং ময়া ॥২০॥
অশোকবনিকামধ্যে রাবণস্য দুরাত্মনঃ।
অধস্তাচ্ছিংশপামূলে সাধ্বী করুণমাস্থিতা ॥২১॥
রাক্ষসীভিঃ পরিবৃতা শোকসন্তাপকর্শিতা ।
মেঘরেখাপরিবৃতা চন্দ্ররেখেব নিষ্প্রভা ॥২২॥
অচিন্তয়ন্তী বৈদেহী রাবণং বলদর্পিতম্ ।
পতিব্রতা চ সুশ্রোণী অবষ্টব্ধা চ জানকী ॥২৩॥
অনুরক্তা হি বৈদেহী রামে সর্বাত্মনা শুভা ।
অনন্যচিত্তা রামেণ পৌলোমীব পুরন্দরে ॥২৪॥
তদেকবাসঃসংবীতা রজোধ্বস্তা তথৈব চ ।
সা ময়া রাক্ষসীমধ্যে তর্জ্যমানা মুহুর্মুহুঃ॥২৫॥
রাক্ষসীভির্বিরূপাভির্দৃষ্টা হি প্রমদাবনে ।
একবেণীধরা দীনা ভর্তৃচিন্তাপরায়ণা ॥২৬॥
অধঃশয়্যা বিবর্ণাঙ্গী পদ্মিনীব হিমোদয়ে ।
রাবণাদ্বিনিবৃত্তার্থা মর্তব্যকৃতনিশ্চয়া ॥২৭॥
কথঞ্চিন্মৃগশাবাক্ষী বিশ্বাসমুপপাদিতা ।
ততঃ সম্ভাষিতা চৈব সর্বমর্থং প্রকাশিতা ॥২৮॥
রামসুগ্রীবসখ্যং চ শ্রুত্বা প্রীতিমুপাগতা ।
নিয়তঃ সমুদাচারো ভক্তির্ভর্তরি চোত্তমা ॥২৯॥
যন্ন হন্তি দশগ্রীবং স মহাত্মা দশাননঃ।
নিমিত্তমাত্রং রামস্তু বধে তস্য ভবিষ্যতি ॥৩০॥
সা প্রকৃত্যৈব তন্বঙ্গী তদ্বিয়োগাচ্চ কর্শিতা ।
প্রতিপৎপাঠশীলস্য বিদ্যেব তনুতাং গতা ॥৩১॥
এবমাস্তে মহাভাগা সীতা শোকপরায়ণা ।
যদত্র প্রতিকর্তব্যং তৎসর্বমুপকল্প্যতাম্ ॥৩২॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে একোনষষ্টিতমঃ সর্গঃ