অথ ষষ্টিতমঃ সর্গঃ
তস্য তদ্বচনং শ্রুত্বা বালিসূনুরভাষত ।
অশ্বিপুত্রৌ মহাবেগৌ বলবন্তৌ প্লবঙ্গমৌ ॥১॥
পিতামহবরোৎসেকাৎ পরমং দর্পমাস্থিতৌ ।
অশ্বিনোর্মাননার্থং হি সর্বলোকপিতামহঃ॥২॥
সর্বাবধ্যত্বমতুলমনয়োর্দত্তবান্পুরা ।
বরোৎসেকেন মত্তৌ চ প্রমথ্য মহতীং চমূম্ ॥৩॥
সুরাণামমৃতং বীরৌ পীতবন্তৌ মহাবলৌ ।
এতাবেব হি সঙ্ক্রুদ্ধৌ সবাজিরথকুঞ্জরাম্ ॥৪॥
লঙ্কাং নাশয়িতুং শক্তৌ সর্বে তিষ্ঠন্তু বানরাঃ।
অহমেকোঽপি পর্যাপ্তঃ সরাক্ষসগণাং পুরীম্ ॥৫॥
তাং লঙ্কাং তরসা হন্তুং রাবণং চ মহাবলম্ ।
কিং পুনঃ সহিতো বীরৈর্বলবদ্ভিঃ কৃতাত্মভিঃ॥৬॥
কৃতাস্ত্রৈঃ প্লবগৈঃ শক্তৈর্ভবদ্ভির্বিজয়ৈষিভিঃ।
বায়ুসূনোর্বলেনৈব দগ্ধা লঙ্কেতি নঃ শ্রুতম্ ॥৭॥
দৃষ্ট্বা দেবী ন চানীতা ইতি তত্র নিবেদিতুম্ ।
ন যুক্তমিব পশ্যামি ভবদ্ভিঃ খ্যাতপৌরুষৈঃ॥৮॥
নহি বঃ প্লবনে কশ্চিন্নাপি কশ্চিৎ পরাক্রমে ।
তুল্যঃ সামরদৈত্যেষু লোকেষু হরিসত্তমাঃ॥৯॥
জিত্বা লঙ্কাং সরক্ষৌঘাং হত্বা তং রাবণং রণে ।
সীতামাদায় গচ্ছামঃ সিদ্ধার্থা হৃষ্টমানসাঃ॥১০॥
তেষ্বেবং হতবীরেষু রাক্ষসেষু হনূমতা ।
কিমন্যদত্র কর্তব্যং গৃহীত্বা যাম জানকীম্ ॥১১॥
রামলক্ষ্মণয়োর্মধ্যে ন্যস্যাম জনকাত্মজাম্ ।
কিং ব্যলীকৈস্তু তান্ সর্বান্ বানরান্ বানরর্ষভান্ ॥১২॥
বয়মেব হি গত্বা তান্ হত্বা রাক্ষসপুঙ্গবান্ ।
রাঘবং দ্রষ্টুমর্হামঃ সুগ্রীবং সহলক্ষ্মণম্ ॥১৩॥
তমেবং কৃতসঙ্কল্পং জাম্ববান্হরিসত্তমঃ।
উবাচ পরমপ্রীতো বাক্যমর্থবদর্থবিৎ ॥১৪॥
নৈষা বুদ্ধির্মহাবুদ্ধে যদ্ ব্রবীষি মহাকপে ।
বিচেতুং বয়মাজ্ঞপ্তা দক্ষিণাং দিশমুত্তমাম্ ॥১৫॥
নানেতুং কপিরাজেন নৈব রামেণ ধীমতা ।
কথঞ্চিন্নির্জিতাং সীতামস্মাভির্নাভিরোচয়েৎ ॥১৬॥
রাঘবো নৃপশার্দূলঃ কুলং ব্যপদিশন্ স্বকম্ ।
প্রতিজ্ঞায় স্বয়ং রাজা সীতাবিজয়মগ্রতঃ॥১৭॥
সর্বেষাং কপিমুখ্যানাং কথং মিথ্যা করিষ্যতি ।
বিফলং কর্ম চ কৃতং ভবেৎ তুষ্টির্ন তস্য চ ॥১৮॥
বৃথা চ দর্শিতং বীর্যং ভবেদ্ বানরপুঙ্গবাঃ।
তস্মাদ্ গচ্ছাম বৈ সর্বে যত্র রামঃ সলক্ষ্মণঃ।
সুগ্রীবশ্চ মহাতেজাঃ কার্যস্যাস্য নিবেদনে ॥১৯॥
ন তাবদেষা মতিরক্ষমা নো
	যথা ভবান্পশ্যতি রাজপুত্র ।
যথা তু রামস্য মতির্নিবিষ্টা
	তথা ভবান্পশ্যতু কার্যসিদ্ধিম্ ॥২০॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ষষ্টিতমঃ সর্গঃ