অথ একষষ্টিতমঃ সর্গঃ ততো জাম্ববতো বাক্যমগৃহ্ণন্ত বনৌকসঃ। অঙ্গদপ্রমুখা বীরা হনূমাংশ্চ মহাকপিঃ॥১॥ প্রীতিমন্তস্ততঃ সর্বে বায়ুপুত্রপুরঃসরাঃ। মহেন্দ্রাগ্রাৎ সমুৎপত্য পুপ্লুবুঃ প্লবগর্ষভাঃ॥২॥ মেরুমন্দরসঙ্কাশা মত্তা ইব মহাগজাঃ। ছাদয়ন্ত ইবাকাশং মহাকায়া মহাবলাঃ॥৩॥ সভাজ্যমানং ভূতৈস্তমাত্মবন্তং মহাবলম্ । হনূমন্তং মহাবেগং বহন্ত ইব দৃষ্টিভিঃ॥৪॥ রাঘবে চার্থনির্বৃত্তিং কর্তুং চ পরমং যশঃ। সমাধায় সমৃদ্ধার্থাঃ কর্মসিদ্ধিভিরুন্নতাঃ॥৫॥ প্রিয়াখ্যানোন্মুখাঃ সর্বে সর্বে যুদ্ধাভিনন্দিনঃ। সর্বে রামপ্রতীকারে নিশ্চিতার্থা মনস্বিনঃ॥৬॥ প্লবমানাঃ খমাপ্লুত্য ততস্তে কাননৌকসঃ। নন্দনোপমমাসেদুর্বনং দ্রুমশতায়ুতম্ ॥৭॥ যত্তন্মধুবনং নাম সুগ্রীবস্যাভিরক্ষিতম্ । অধৃষ্যং সর্বভূতানাং সর্বভূতমনোহরম্ ॥৮॥ যদ্রক্ষতি মহাবীরঃ সদা দধিমুখঃ কপিঃ। মাতুলঃ কপিমুখ্যস্য সুগ্রীবস্য মহাত্মনঃ॥৯॥ তে তদ্বনমুপাগম্য বভূবুঃ পরমোৎকটাঃ। বানরা বানরেন্দ্রস্য মনঃকান্তং মহাবনম্ ॥১০॥ ততস্তে বানরা হৃষ্টা দৃষ্ট্বা মধুবনং মহৎ । কুমারমভ্যযাচন্ত মধূনি মধুপিঙ্গলাঃ॥১১॥ ততঃ কুমারস্তান্বৃদ্ধাঞ্জাম্ববৎপ্রমুখান্কপীন্ । অনুমান্য দদৌ তেষাং নিসর্গং মধুভক্ষণে ॥১২॥ তে নিসৃষ্টাঃ কুমারেণ ধীমতা বালিসূনুনা । হরয়ঃ সমপদ্যন্ত দ্রুমান্ মধুকরাকুলান্ ॥১৩॥ ভক্ষয়ন্তঃ সুগন্ধীনি মূলানি চ ফলানি চ । জগ্মুঃ প্রহর্ষং তে সর্বে বভূবুশ্চ মদোৎকটাঃ॥১৪॥ ততশ্চানুমতাঃ সর্বে সুসংহৃষ্টা বনৌকসঃ। মুদিতাশ্চ ততস্তে চ প্রনৃত্যন্তি ততস্ততঃ॥১৫॥ গায়ন্তি কেচিৎ প্রহসন্তি কেচি- ন্নৃত্যন্তি কেচিৎ প্রণমন্তি কেচিৎ । পতন্তি কেচিৎ প্রচরন্তি কেচিৎ প্লবন্তি কেচিৎ প্রলপন্তি কেচিৎ ॥১৬॥ পরস্পরং কেচিদুপাশ্রয়ন্তি পরস্পরং কেচিদতিব্রুবন্তি । দ্রুমাদ্দ্রুমং কেচিদভিদ্রবন্তি ক্ষিতৌ নগাগ্রান্নিপতন্তি কেচিৎ ॥১৭॥ মহীতলাৎকেচিদুদীর্ণবেগা মহাদ্রুমাগ্রাণ্যভিসম্পতন্তি । গায়ন্তমন্যঃ প্রহসন্নুপৈতি হসন্তমন্যঃ প্ররুদন্নুপৈতি ॥১৮॥ তুদন্তমন্যঃ প্রণদন্নুপৈতি সমাকুলং তৎ কপিসৈন্যমাসীৎ । ন চাত্র কশ্চিন্ন বভূব মত্তো ন চাত্র কশ্চিন্ন বভূব দৃপ্তঃ॥১৯॥ ততো বনং তৎপরিভক্ষ্যমাণং দ্রুমাংশ্চ বিধ্বংসিতপত্রপুষ্পান্ । সমীক্ষ্য কোপাদ্দধিবক্ত্রনামা নিবারয়ামাস কপিঃ কপীংস্তান্ ॥২০॥ স তৈঃ প্রবৃদ্ধৈঃ পরিভর্ত্স্যমানো বনস্য গোপ্তা হরিবৃদ্ধবীরঃ। চকার ভূয়ো মতিমুগ্রতেজা বনস্য রক্ষাং প্রতি বানরেভ্যঃ॥২১॥ উবাচ কাংশ্চিৎ পরুষাণ্যভীত- মসক্তমন্যাংশ্চ তলৈর্জঘান । সমেত্য কৈশ্চিৎ কলহং চকার তথৈব সাম্নোপজগাম কাংশ্চিৎ ॥২২॥ স তৈর্মদাদপ্রতিবার্যবেগৈ- র্বলাচ্চ তেন প্রতিবার্যমাণৈঃ। প্রধর্ষণে ত্যক্তভয়ৈঃ সমেত্য প্রকৃষ্যতে চাপ্যনবেক্ষ্য দোষম্ ॥২৩॥ নখৈস্তুদন্তো দশনৈর্দশন্ত- স্তলৈশ্চ পাদৈশ্চ সমাপয়ন্তঃ। মদাৎকপিং তে কপয়ঃ সমন্তা- ন্মহাবনং নির্বিষয়ং চ চক্রুঃ॥২৪॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে একষষ্টিতমঃ সর্গঃ