অথ দ্বিষষ্টিতমঃ সর্গঃ
তানুবাচ হরিশ্রেষ্ঠো হনূমান্বানরর্ষভঃ।
অব্যগ্রমনসো যূয়ং মধু সেবত বানরাঃ॥১॥
অহমাবর্জয়িষ্যামি যুষ্মাকং পরিপন্থিনঃ।
শ্রুত্বা হনূমতো বাক্যং হরীণাং প্রবরোঽঙ্গদঃ॥২॥
প্রত্যুবাচ প্রসন্নাত্মা পিবন্তু হরয়ো মধু ।
অবশ্যং কৃতকার্যস্য বাক্যং হনুমতো ময়া ॥৩॥
অকার্যমপি কর্তব্যং কিমঙ্গং পুনরীদৃশম্ ।
অঙ্গদস্য মুখাচ্ছ্রুত্বা বচনং বানরর্ষভাঃ॥৪॥
সাধু সাধ্বিতি সংহৃষ্টা বানরাঃ প্রত্যপূজয়ন্ ।
পূজয়িত্বাঙ্গদং সর্বে বানরা বানরর্ষভম্ ॥৫॥
জগ্মুর্মধুবনং যত্র নদীবেগ ইব দ্রুমম্ ।
তে প্রবিষ্টা মধুবনং পালানাক্রম্য শক্তিতঃ॥৬॥
অতিসর্গাচ্চ পটবো দৃষ্ট্বা শ্রুত্বা চ মৈথিলীম্ ।
পপুঃ সর্বে মধু তদা রসবৎফলমাদদুঃ॥৭॥
উৎপত্য চ ততঃ সর্বে বনপালান্সমাগতান্ ।
তে তাডয়ন্তঃ শতশঃ সক্তা মধুবনে তদা ॥৮॥
মধূনি দ্রোণমাত্রাণি বাহুভিঃ পরিগৃহ্য তে ।
পিবন্তি কপয়ঃ কেচিৎ সঙ্ঘশস্তত্র হৃষ্টবৎ ॥৯॥
ঘ্নন্তি স্ম সহিতাঃ সর্বে ভক্ষয়ন্তি তথাপরে ।
কেচিৎপীত্বাপবিধ্যন্তি মধূনি মধুপিঙ্গলাঃ॥১০॥
মধূচ্চিষ্টেন কেচিচ্চ জঘ্নুরন্যোন্যমুৎকটাঃ।
অপরে বৃক্ষমূলেষু শাখা গৃহ্য ব্যবস্থিতাঃ॥১১॥
অত্যর্থং চ মদগ্লানাঃ পর্ণান্যাস্তীর্য শেরতে ।
উন্মত্তবেগাঃ প্লবগা মধুমত্তাশ্চ হৃষ্টবৎ ॥১২॥
ক্ষিপন্ত্যপি তথান্যোন্যং স্খলন্তি চ তথাপরে ।
কেচিৎক্ষ্বেডান্প্রকুর্বন্তি কেচিৎকূজন্তি হৃষ্টবৎ ॥১৩॥
হরয়ো মধুনা মত্তাঃ কেচিৎসুপ্তা মহীতলে ।
ধৃষ্টাঃ কেচিদ্ধসন্ত্যন্যে কেচিৎ কুর্বন্তি চেতরৎ ॥১৪॥
কৃত্বা কেচিদ্বদন্ত্যন্যে কেচিদ্বুধ্যন্তি চেতরৎ ।
যেঽপ্যত্র মধুপালাঃ স্যুঃ প্রেষ্যা দধিমুখস্য তু ॥১৫॥
তেঽপি তৈর্বানরৈর্ভীমৈঃ প্রতিষিদ্ধা দিশো গতাঃ।
জানুভিশ্চ প্রঘৃষ্টাশ্চ দেবমার্গং চ দর্শিতাঃ॥১৬॥
অব্রুবন্পরমোদ্বিগ্না গত্বা দধিমুখং বচঃ।
হনূমতা দত্তবরৈর্হতং মধুবনং বলাৎ ।
বয়ং চ জানুভির্ঘৃষ্টা দেবমার্গং চ দর্শিতাঃ॥১৭॥
তদা দধিমুখঃ ক্রুদ্ধো বনপস্তত্র বানরঃ।
হতং মধুবনং শ্রুত্বা সান্ত্বয়ামাস তান্হরীন্ ॥১৮॥
এতাগচ্ছত গচ্ছামো বানরানতিদর্পিতান্ ।
বলেনাবারয়িষ্যামি প্রভুঞ্জানান্ মধূত্তমম্ ॥১৯॥
শ্রুত্বা দধিমুখস্যেদং বচনং বানরর্ষভাঃ।
পুনর্বীরা মধুবনং তেনৈব সহিতা যয়ুঃ॥২০॥
মধ্যে চৈষাং দধিমুখঃ সুপ্রগৃহ্য মহাতরুম্ ।
সমভ্যধাবন্ বেগেন সর্বে তে চ প্লবঙ্গমাঃ॥২১॥
তে শিলাঃ পাদপাংশ্চৈব পাষাণানপি বানরাঃ।
গৃহীত্বাভ্যাগমন্ক্রুদ্ধা যত্র তে কপিকুঞ্জরাঃ॥২২॥
বলান্নিবারয়ন্তশ্চ আসেদুর্হরয়ো হরীন্ ।
সন্দষ্টৌষ্ঠপুটাঃ ক্রুদ্ধা ভর্ত্সয়ন্তো মুহুর্মুহুঃ॥২৩॥
অথ দৃষ্ট্বা দধিমুখং ক্রুদ্ধং বানরপুঙ্গবাঃ।
অভ্যধাবন্ত বেগেন হনূমৎপ্রমুখাস্তদা ॥২৪॥
সবৃক্ষং তং মহাবাহুমাপতন্তং মহাবলম্ ।
বেগবন্তং বিজগ্রাহ বাহুভ্যাং কুপিতোঽঙ্গদঃ॥২৫॥
মদান্ধো ন কৃপাং চক্রে আর্যকোঽয়ং মমেতি সঃ।
অথৈনং নিষ্পিপেষাশু বেগন বসুধাতলে ॥২৬॥
স ভগ্নবাহূরুমুখো বিহ্বলঃ শোণিতোক্ষিতঃ।
প্রমুমোহ মহাবীরো মুহূর্তং কপিকুঞ্জরঃ॥২৭॥
স কথঞ্চিদ্বিমুক্তস্তৈর্বানরৈর্বানরর্ষভঃ।
উবাচৈকান্তমাগত্য স্বান্ ভৃত্যান্ সমুপাগতান্ ॥২৮॥
এতাগচ্ছত গচ্ছামো ভর্তা নো যত্র বানরঃ।
সুগ্রীবো বিপুলগ্রীবঃ সহ রামেণ তিষ্ঠতি ॥২৯॥
সর্বং চৈবাঙ্গদে দোষং শ্রাবয়িষ্যাম পার্থিবে ।
অমর্ষী বচনং শ্রুত্বা ঘাতয়িষ্যতি বানরান্ ॥৩০॥
ইষ্টং মধুবনং হ্যেতৎসুগ্রীবস্য মহাত্মনঃ।
পিতৃপৈতামহং দিব্যং দেবৈরপি দুরাসদম্ ॥৩১॥
স বানরানিমান্সর্বান্মধুলুব্ধান্গতায়ুষঃ।
ঘাতয়িষ্যতি দণ্ডেন সুগ্রীবঃ সসুহৃজ্জনান্ ॥৩২॥
বধ্যা হ্যেতে দুরাত্মানো নৃপাজ্ঞাপরিপন্থিনঃ।
অমর্ষপ্রভবো রোষঃ সফলো মে ভবিষ্যতি ॥৩৩॥
এবমুক্ত্বা দধিমুখো বনপালান্মহাবলঃ।
জগাম সহসোৎপত্য বনপালৈঃ সমন্বিতঃ॥৩৪॥
নিমেষান্তরমাত্রেণ স হি প্রাপ্তো বনালয়ঃ।
সহস্রাংশুসুতো ধীমান্সুগ্রীবো যত্র বানরঃ॥৩৫॥
রামং চ লক্ষ্মণং চৈব দৃষ্ট্বা সুগ্রীবমেব চ ।
সমপ্রতিষ্ঠাং জগতীমাকাশান্নিপপাত হ ॥৩৬॥
স নিপত্য মহাবীরঃ সর্বৈস্তৈঃ পরিবারিতঃ।
হরির্দধিমুখঃ পালৈঃ পালানাং পরমেশ্বরঃ॥৩৭॥
স দীনবদনো ভূত্বা কৃত্বা শিরসি চাঞ্জলিম্ ।
সুগ্রীবস্যাশু তৌ মূর্ধ্না চরণৌ প্রত্যপীডয়ৎ ॥৩৮॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে দ্বিষষ্টিতমঃ সর্গঃ