অথ ত্রিষষ্টিতমঃ সর্গঃ ততো মূর্ধ্না নিপতিতং বানরং বানরর্ষভঃ। দৃষ্ট্বৈবোদ্বিগ্নহৃদয়ো বাক্যমেতদুবাচ হ ॥১॥ উত্তিষ্ঠোত্তিষ্ঠ কস্মাত্ত্বং পাদয়োঃ পতিতো মম । অভয়ং তে প্রদাস্যামি সত্যমেবাভিধীয়তাম্ ॥২॥ কিং সম্ভ্রমাদ্ধিতং কৃৎস্রং ব্রূহি যদ্ বক্তুমর্হসি । কচ্চিন্মধুবনে স্বস্তি শ্রোতুমিচ্ছামি বানর ॥৩॥ স সমাশ্বাসিতস্তেন সুগ্রীবেণ মহাত্মনা । উত্থায় স মহাপ্রাজ্ঞো বাক্যং দধিমুখোঽব্রবীৎ ॥৪॥ নৈবর্ক্ষরজসা রাজন্ন ত্বয়া ন চ বালিনা । বনং নিসৃষ্টপূর্বং তে নাশিতং তত্তু বানরৈঃ॥৫॥ ন্যবারয়মহং সর্বান্ সহৈভির্বনচারিভিঃ। অচিন্তয়িত্বা মাং হৃষ্টা ভক্ষয়ন্তি পিবন্তি চ ॥৬॥ এভিঃ প্রধর্ষণায়াং চ বারিতং বনপালকৈঃ। মামপ্যচিন্তয়ন্ দেব ভক্ষয়ন্তি বনৌকসঃ॥৭॥ শিষ্টমত্রাপবিধ্যন্তি ভক্ষয়ন্তি তথাপরে । নিবার্যমাণাস্তে সর্বে ভ্রুকুটিং দর্শয়ন্তি হি ॥৮॥ ইমে হি সংরব্ধতরাস্তদা তৈঃ সম্প্রধর্ষিতাঃ। নিবার্যন্তে বনাত্তস্মাৎক্রুদ্ধৈর্বানরপুঙ্গবৈঃ॥৯॥ ততস্তৈর্বহুভির্বীরৈর্বানরৈর্বানরর্ষভাঃ। সংরক্তনয়নৈঃ ক্রোধাদ্ধরয়ঃ সম্প্রধর্ষিতাঃ॥১০॥ পাণিভির্নিহতাঃ কেচিৎকেচিজ্জানুভিরাহতাঃ। প্রকৃষ্টাশ্চ তদা কামং দেবমার্গং চ দর্শিতাঃ॥১১॥ এবমেতে হতাঃ শূরাস্ত্বয়ি তিষ্ঠতি ভর্তরি । কৃৎস্নং মধুবনং চৈব প্রকামং তৈশ্চ ভক্ষ্যতে ॥১২॥ এবং বিজ্ঞাপ্যমানং তং সুগ্রীবং বানরর্ষভম্ । অপৃচ্ছত্তং মহাপ্রাজ্ঞো লক্ষ্মণঃ পরবীরহা ॥১৩॥ কিময়ং বানরো রাজন্বনপঃ প্রত্যুপস্থিতঃ। কিং চার্থমভিনির্দিশ্য দুঃখিতো বাক্যমব্রবীৎ ॥১৪॥ এবমুক্তস্তু সুগ্রীবো লক্ষ্মণেন মহাত্মনা । লক্ষ্মণং প্রত্যুবাচেদং বাক্যং বাক্যবিশারদঃ॥১৫॥ আর্য লক্ষ্মণ সম্প্রাহ বীরো দধিমুখঃ কপিঃ। অঙ্গদপ্রমুখৈর্বীরৈর্ভক্ষিতং মধু বানরৈঃ॥১৬॥ নৈষামকৃতকার্যাণামীদৃশঃ স্যাদ্ ব্যতিক্রমঃ। বনং যদভিপন্নাস্তে সাধিতং কর্ম তদ্ ধ্রুবম্ ॥১৭॥ বারয়ন্তো ভৃশং প্রাপ্তাঃ পালা জানুভিরাহতাঃ। তথা ন গণিতশ্চায়ং কপির্দধিমুখো বলী ॥১৮॥ পতির্মম বনস্যায়মস্মাভিঃ স্থাপিতঃ স্বয়ম্ । দৃষ্টা দেবী ন সন্দেহো ন চান্যেন হনূমতা ॥১৯॥ ন হ্যন্যঃ সাধনে হেতুঃ কর্মণোঽস্য হনূমতঃ। কার্যসিদ্ধির্হনুমতি মতিশ্চ হরিপুঙ্গবে ॥২০॥ ব্যবসায়শ্চ বীর্যং চ শ্রুতং চাপি প্রতিষ্ঠিতম্ । জাম্ববান্যত্র নেতা স্যাদঙ্গদশ্চ মহাবলঃ॥২১॥ হনূমাংশ্চাপ্যধিষ্ঠাতা ন তত্র গতিরন্যথা । অঙ্গদপ্রমুখৈর্বীরৈর্হতং মধুবনং কিল ॥২২॥ বিচিত্য দক্ষিণামাশামাগতৈর্হরিপুঙ্গবৈঃ। আগতৈশ্চাপ্রধৃষ্যং তদ্ধতং মধুবনং হি তৈঃ॥২৩॥ ধর্ষিতং চ বনং কৃৎস্নমুপয়ুক্তং তু বানরৈঃ। পাতিতা বনপালাস্তে তদা জানুভিরাহতাঃ॥২৪॥ এতদর্থময়ং প্রাপ্তো বক্তুং মধুরবাগিহ । নাম্না দধিমুখো নাম হরিঃ প্রখ্যাতবিক্রমঃ॥২৫॥ দৃষ্টা সীতা মহাবাহো সৌমিত্রে পশ্য তত্ত্বতঃ। অভিগম্য যথা সর্বে পিবন্তি মধু বানরাঃ॥২৬॥ ন চাপ্যদৃষ্ট্বা বৈদেহীং বিশ্রুতাঃ পুরুষর্ষভ । বনং দত্তবরং দিব্যং ধর্ষয়েয়ুর্বনৌকসঃ॥২৭॥ ততঃ প্রহৃষ্টো ধর্মাত্মা লক্ষ্মণঃ সহরাঘবঃ। শ্রুত্বা কর্ণসুখাং বাণীং সুগ্রীববদনাচ্চ্যুতাম্ ॥২৮॥ প্রাহৃষ্যত ভৃশং রামো লক্ষ্মণশ্চ মহায়শাঃ। শ্রুত্বা দধিমুখস্যৈবং সুগ্রীবস্তু প্রহৃষ্য চ ॥২৯॥ বনপালং পুনর্বাক্যং সুগ্রীবঃ প্রত্যভাষত । প্রীতোঽস্মি সোঽহং যদ্ভুক্তং বনং তৈঃ কৃতকর্মভিঃ॥৩০॥ ধর্ষিতং মর্ষণীয়ং চ চেষ্টিতং কৃতকর্মণাম্ । গচ্ছ শীঘ্রং মধুবনং সংরক্ষস্ব ত্বমেব হি । শীঘ্রং প্রেষয় সর্বাংস্তান্ হনূমৎপ্রমুখান্ কপীন্ ॥৩১॥ ইচ্ছামি শীঘ্রং হনুমৎপ্রধানা ন্শাখামৃগাংস্তান্মৃগরাজদর্পান্ । প্রষ্টুং কৃতার্থান্সহ রাঘবাভ্যাং শ্রোতুং চ সীতাধিগমে প্রয়ত্নম্ ॥৩২॥ প্রীতিস্ফীতাক্ষৌ সম্প্রহৃষ্টৌ কুমারৌ দৃষ্ট্বা সিদ্ধার্থৌ বানরাণাং চ রাজা । অঙ্গৈঃ প্রহৃষ্টৈঃ কার্যসিদ্ধিং বিদিত্বা বাহ্বোরাসন্নামতিমাত্রং ননন্দ ॥৩৩॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ত্রিষষ্টিতমঃ সর্গঃ