অথ চতুঃষষ্টিতমঃ সর্গঃ
সুগ্রীবেণৈবমুক্তস্তু হৃষ্টো দধিমুখঃ কপিঃ।
রাঘবং লক্ষ্মণং চৈব সুগ্রীবং চাভ্যবাদয়ৎ ॥১॥
স প্রণম্য চ সুগ্রীবং রাঘবৌ চ মহাবলৌ ।
বানরৈঃ সহিতঃ শূরৈর্দিবমেবোৎপপাত হ ॥২॥
স যথৈবাগতঃ পূর্বং তথৈব ত্বরিতং গতঃ।
নিপত্য গগনাদ্ভূমৌ তদ্বনং প্রবিবেশ হ ॥৩॥
স প্রবিষ্টো মধুবনং দদর্শ হরিয়ূথপান্ ।
বিমদানুদ্ধতান্সর্বান্মেহমানান্মধূদকম্ ॥৪॥
স তানুপাগমদ্বীরো বদ্ধ্বা করপুটাঞ্জলিম্ ।
উবাচ বচনং শ্লক্ষ্ণমিদং হৃষ্টবদঙ্গদম্ ॥৫॥
সৌম্য রোষো ন কর্তব্যো যদেভিঃ পরিবারণম্ ।
অজ্ঞানাদ্রক্ষিভিঃ ক্রোধাদ্ভবন্তঃ প্রতিষেধিতাঃ॥৬॥
শ্রান্তো দূরাদনুপ্রাপ্তো ভক্ষয়স্ব স্বকং মধু ।
যুবরাজস্ত্বমীশশ্চ বনস্যাস্য মহাবলা ॥৭॥
মৌর্খ্যাৎপূর্বং কৃতো রোষস্তদ্ভবান্ক্ষন্তুমর্হতি ।
যথৈব হি পিতা তেঽভূৎপূর্বং হরিগণেশ্বরঃ॥৮॥
তথা ত্বমপি সুগ্রীবো নান্যস্তু হরিসত্তম ।
আখ্যাতং হি ময়া গত্বা পিতৃব্যস্য তবানঘ ॥৯॥
ইহোপয়ানং সর্বেষামেতেষাং বনচারিণাম্ ।
ভবদাগমনং শ্রুত্বা সহৈভির্বনচারিভিঃ॥১০॥
প্রহৃষ্টো ন তু রুষ্টোঽসৌ বনং শ্রুত্বা প্রধর্ষিতম্ ।
প্রহৃষ্টো মাং পিতৃব্যস্তে সুগ্রীবো বানরেশ্বরঃ॥১১॥
শীঘ্রং প্রেষয় সর্বাংস্তানিতি হোবাচ পার্থিবঃ।
শ্রুত্বা দধিমুখস্যৈতদ্বচনং শ্লক্ষ্ণমঙ্গদঃ॥১২॥
অব্রবীত্তান্হরিশ্রেষ্ঠো বাক্যং বাক্যবিশারদঃ।
শঙ্কে শ্রুতোঽয়ং বৃত্তান্তো রামেণ হরিয়ূথপাঃ॥১৩॥
অয়ং চ হর্ষাদাখ্যাতি তেন জানামি হেতুনা ।
তৎক্ষমং নেহ নঃ স্থাতুং কৃতে কার্যে পরন্তপাঃ॥১৪॥
পীত্বা মধু যথাকামং বিক্রান্তা বনচারিণঃ।
কিং শেষং গমনং তত্র সুগ্রীবো যত্র বানরঃ॥১৫॥
সর্বে যথা মাং বক্ষ্যন্তি সমেত্য হরিপুঙ্গবাঃ।
তথাস্মি কর্তা কর্তব্যে ভবদ্ভিঃ পরবানহম্ ॥১৬॥
নাজ্ঞাপয়িতুমীশোঽহং যুবরাজোঽস্মি যদ্যপি ।
অয়ুক্তং কৃতকর্মাণো যূয়ং ধর্ষয়িতুং বলাৎ ॥১৭॥
ব্রুবতশ্চাঙ্গদস্যৈবং শ্রুত্বা বচনমুত্তমম্ ।
প্রহৃষ্টমনসো বাক্যমিদমূচুর্বনৌকসঃ॥১৮॥
এবং বক্ষ্যতি কো রাজন্প্রভুঃ সন্বানরর্ষভ ।
ঐশ্বর্যমদমত্তো হি সর্বোঽহমিতি মন্যতে ॥১৯॥
তব চেদং সুসদৃশং বাক্যং নান্যস্য কস্যচিৎ ।
সন্নতির্হি তবাখ্যাতি ভবিষ্যচ্ছুভয়োগ্যতাম্ ॥২০॥
সর্বে বয়মপি প্রাপ্তাস্তত্র গন্তুং কৃতক্ষণাঃ।
স যত্র হরিবীরাণাং সুগ্রীবঃ পতিরব্যযঃ॥২১॥
ত্বয়া হ্যনুক্তৈর্হরিভির্নৈব শক্যং পদাৎপদম্ ।
ক্বচিদ্গন্তুং হরিশ্রেষ্ঠ ব্রূমঃ সত্যমিদং তু তে ॥২২॥
এবং তু বদতাং তেষামঙ্গদঃ প্রত্যভাষত ।
সাধু গচ্ছাম ইত্যুক্ত্বা খমুৎপেতুর্মহাবলাঃ॥২৩॥
উৎপতন্তমনূৎপেতুঃ সর্বে তে হরিয়ূথপাঃ।
কৃত্বাঽঽকাশং নিরাকাশং যন্ত্রোৎক্ষিপ্তা ইবোপলাঃ॥২৪॥
অঙ্গদং পুরতঃ কৃত্বা হনূমন্তং চ বানরম্ ।
তেঽম্বরং সহসোৎপত্য বেগবন্তঃ প্লবঙ্গমাঃ॥২৫॥
বিনদন্তো মহানাদং ঘনা বাতেরিতা যথা ।
অঙ্গদে সমনুপ্রাপ্তে সুগ্রীবো বানরেশ্বরঃ॥২৬॥
উবাচ শোকসন্তপ্তং রামং কমললোচনম্ ।
সমাশ্বসিহি ভদ্রং তে দৃষ্টা দেবী ন সংশয়ঃ॥২৭॥
নাগন্তুমিহ শক্যং তৈরতীতসময়ৈরিহ ।
অঙ্গদস্য প্রহর্ষাচ্চ জানামি শুভদর্শন ॥২৮॥
ন মৎসকাশমাগচ্ছেৎকৃত্যে হি বিনিপাতিতে ।
যুবরাজো মহাবাহুঃ প্লবতামঙ্গদো বরঃ॥২৯॥
যদ্যপ্যকৃতকৃত্যানামীদৃশঃ স্যাদুপক্রমঃ।
ভবেত্তু দীনবদনো ভ্রান্তবিপ্লুতমানসঃ॥৩০॥
পিতৃপৈতামহং চৈতৎপূর্বকৈরভিরক্ষিতম্ ।
ন মে মধুবনং হন্যাদদৃষ্ট্বা জনকাত্মজাম্ ॥৩১॥
কৌসল্যা সুপ্রজা রাম সমাশ্বসিহি সুব্রত ।
দৃষ্টা দেবী ন সন্দেহো ন চান্যেন হনূমতা ॥৩২॥
নহ্যন্যঃ কর্মণো হেতুঃ সাধনেঽস্য হনূমতঃ।
হনূমতীহ সিদ্ধিশ্চ মতিশ্চ মতিসত্তম ॥৩৩॥
ব্যবসায়শ্চ শৌর্যং চ শ্রুতং চাপি প্রতিষ্ঠিতম্ ।
জাম্ববান্যত্র নেতা স্যাদঙ্গদশ্চ হরীশ্বরঃ॥৩৪॥
হনূমাংশ্চাপ্যধিষ্ঠাতা ন তত্র গতিরন্যথা ।
মা ভূশ্চিন্তাসমায়ুক্তঃ সম্প্রত্যমিতবিক্রম ॥৩৫॥
যদা হি দর্পিতোদগ্নাঃ সঙ্গতাঃ কাননৌকসঃ।
নৈষামকৃতকর্যাণামীদৃশঃ স্যাদুপক্রমঃ॥৩৬॥
বনভঙ্গেন জানামি মধূনাং ভক্ষণেন চ ।
ততঃ কিলকিলাশব্দং শুশ্রাবাসন্নমম্বরে ॥৩৭॥
হনূমৎকর্মদৃপ্তানাং নদতাং কাননৌকসাম্ ।
কিষ্কিন্ধামুপয়াতানাং সিদ্ধিং কথয়তামিব ॥৩৮॥
ততঃ শ্রুত্বা নিনাদং তং কপীনাং কপিসত্তমঃ।
আয়তাঞ্চিতলাঙ্গূলঃ সোঽভবদ্ধৃষ্টমানসঃ॥৩৯॥
আজগ্মুস্তেঽপি হরয়ো রামদর্শনকাঙ্ক্ষিণঃ।
অঙ্গদং পুরতঃ কৃত্বা হনূমন্তং চ বানরম্ ॥৪০॥
তেঽঙ্গদপ্রমুখা বীরাঃ প্রহৃষ্টাশ্চ মুদান্বিতাঃ।
নিপেতুর্হরিরাজস্য সমীপে রাঘবস্য চ ॥৪১॥
হনূমাংশ্চ মহাবাহুঃ প্রণম্য শিরসা ততঃ।
নিয়তামক্ষতাং দেবীং রাঘবায় ন্যবেদয়ৎ ॥৪২॥
দৃষ্টা দেবীতি হনুমদ্বদনাদমৃতোপমম্ ।
আকর্ণ্য বচনং রামো হর্ষমাপ সলক্ষ্মণঃ॥৪৩॥
নিশ্চিতার্থং ততস্তস্মিন্সুগ্রীবং পবনাত্মজে ।
লক্ষ্মণঃ প্রীতিমান্প্রীতং বহুমানাদবৈক্ষত ॥৪৪॥
প্রীত্যা চ পরয়োপেতো রাঘবঃ পরবীরহা ।
বহুমানেন মহতা হনূমন্তমবৈক্ষত ॥৪৫॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে চতুঃষষ্টিতমঃ সর্গঃ