অথ পঞ্চষষ্টিতমঃ সর্গঃ ততঃ প্রস্রবণং শৈলং তে গত্বা চিত্রকাননম্ । প্রণম্য শিরসা রামং লক্ষ্মণং চ মহাবলম্ ॥১॥ যুবরাজং পুরস্কৃত্য সুগ্রীবমভিবাদ্য চ । প্রবৃত্তিমথ সীতায়াঃ প্রবক্তুমুপচক্রমুঃ॥২॥ রাবণান্তঃপুরে রোধং রাক্ষসীভিশ্চ তর্জনম্ । রামে সমনুরাগং চ যথা চ নিয়মঃ কৃতঃ॥৩॥ এতদাখ্যায় তে সর্বং হরয়ো রামসংনিধৌ । বৈদেহীমক্ষতাং শ্রুত্বা রামস্তূত্তরমব্রবীৎ ॥৪॥ ক্ব সীতা বর্ততে দেবী কথং চ ময়ি বর্ততে । এতন্মে সর্বমাখ্যাত বৈদেহীং প্রতি বানরাঃ॥৫॥ রামস্য গদিতং শ্রুত্বা হরয়ো রামসংনিধৌ । চোদয়ন্তি হনূমন্তং সীতাবৃত্তান্তকোবিদম্ ॥৬॥ শ্রুত্বা তু বচনং তেষাং হনূমান্মারুতাত্মজঃ। প্রণম্য শিরসা দেব্যৈ সীতায়ৈ তাং দিশং প্রতি ॥৭॥ উবাচ বাক্যং বাক্যজ্ঞঃ সীতায়া দর্শনং যথা । তং মণিং কাঞ্চনং দিব্যং দীপ্যমানং স্বতেজসা ॥৮॥ দত্বা রামায় হনুমাংস্ততঃ প্রাঞ্জলিরব্রবীৎ । সমুদ্রং লঙ্ঘয়িত্বাহং শতয়োজনমায়তম্ ॥৯॥ অগচ্ছং জানকীং সীতাং মার্গমাণো দিদৃক্ষয়া । তত্র লঙ্কেতি নগরী রাবণস্য দুরাত্মনঃ॥১০॥ দক্ষিণস্য সমুদ্রস্য তীরে বসতি দক্ষিণে । তত্র সীতা ময়া দৃষ্টা রাবণান্তঃপুরে সতী ॥১১॥ ত্বয়ি সংন্যস্য জীবন্তী রামা রাম মনোরথম্ । দৃষ্ট্বা মে রাক্ষসীমধ্যে তর্জ্যমানা মুহুর্মুহুঃ॥১২॥ রাক্ষসীভির্বিরূপাভী রক্ষিতা প্রমদাবনে । দুঃখমাপদ্যতে দেবী ত্বয়া বীর সুখোচিতা ॥১৩॥ রাবণান্তঃপুরে রুদ্ধা রাক্ষসীভিঃ সুরক্ষিতা । একবেণীধরা দীনা ত্বয়ি চিন্তাপরায়ণা ॥১৪॥ অধঃশয়্যা বিবর্ণাঙ্গী পদ্মিনীব হিমাগমে । রাবণাদ্বিনিবৃত্তার্থা মর্তব্যকৃতনিশ্চয়া ॥১৫॥ দেবী কথঞ্চিৎকাকুৎস্থ ত্বন্মনা মার্গিতা ময়া । ইক্ষ্বাকুবংশবিখ্যাতিং শনৈঃ কীর্তয়তানঘ ॥১৬॥ সা ময়া নরশার্দূল শনৈর্বিশ্বাসিতা তদা । ততঃ সম্ভাষিতা দেবী সর্বমর্থং চ দর্শিতা ॥১৭॥ রামসুগ্রীবসখ্যং চ শ্রুত্বা হর্ষমুপাগতা । নিয়তঃ সমুদাচারো ভক্তিশ্চাস্যাঃ সদা ত্বয়ি ॥১৮॥ এবং ময়া মহাভাগ দৃষ্টা জনকনন্দিনী । উগ্রেণ তপসা যুক্তা ত্বদ্ভক্ত্যা পুরুষর্ষভ ॥১৯॥ অভিজ্ঞানং চ মে দত্তং যথাবৃত্তং তবান্তিকে । চিত্রকূটে মহাপ্রাজ্ঞ বায়সং প্রতি রাঘব ॥২০॥ বিজ্ঞাপ্যঃ পুনরপ্যেষ রামো বায়ুসুত ত্বয়া । অখিলেন যথা দ্দৃষ্টমিতি মামাহ জানকী ॥২১॥ অয়ং চাস্মৈ প্রদাতব্যো যত্নাৎসুপরিরক্ষিতঃ। ব্রুবতা বচনান্যেবং সুগ্রীবস্যোপশৃণ্বতঃ॥২২॥ এষ চূডামণিঃ শ্রীমান্ময়া তে যত্নরক্ষিতঃ। মনঃশিলায়াস্তিলকং তৎ স্মরস্বেতি চাব্রবীৎ ॥২৩॥ এষ নির্যাতিতঃ শ্রীমান্ময়া তে বারিসম্ভবঃ। এনং দৃষ্ট্বা প্রমোদিষ্যে ব্যসনে ত্বামিবানঘ ॥২৪॥ জীবিতং ধারয়িষ্যামি মাসং দশরথাত্মজ । ঊর্ধ্বং মাসান্ন জীবেয়ং রক্ষসাং বশমাগতা ॥২৫॥ ইতি মামব্রবীৎসীতা কৃশাঙ্গী ধর্মচারিণী । রাবণান্তঃপুরে রুদ্ধা মৃগীবোৎফুল্ললোচনা ॥২৬॥ এতদেব ময়াঽঽখ্যাতং সর্বং রাঘব যদ্যথা । সর্বথা সাগরজলে সন্তারঃ প্রবিধীয়তাম্ ॥২৭॥ তৌ জাতাশ্বাসৌ রাজপুত্রৌ বিদিত্বা তচ্চাভিজ্ঞানং রাঘবায় প্রদায় । দেব্যা চাখ্যাতং সর্বমেবানুপূর্ব্যাদ্ বাচা সম্পূর্ণং বায়ুপুত্রঃ শশংস ॥২৮॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে পঞ্চষষ্টিতমঃ সর্গঃ