অথ ষট্ষষ্টিতমঃ সর্গঃ
এবমুক্তো হনুমতা রামো দশরথাত্মজঃ।
তং মণিং হৃদয়ে কৃত্বা রুরোদ সহলক্ষ্মণঃ॥১॥
তং তু দৃষ্ট্বা মণিশ্রেষ্ঠং রাঘবঃ শোককর্শিতঃ।
নেত্রাভ্যামশ্রুপূর্ণাভ্যাং সুগ্রীবমিদমব্রবীৎ ॥২॥
যথৈব ধেনুঃ স্রবতি স্নেহাদ্ বৎসস্য বৎসলা ।
তথা মমাপি হৃদয়ং মণিশ্রেষ্ঠস্য দর্শনাৎ ॥৩॥
মণিরত্নমিদং দত্তং বৈদেহ্যাঃ শ্বশুরেণ মে ।
বধূকালে যথা বদ্ধমধিকং মূর্ধ্নি শোভতে ॥৪॥
অয়ং হি জলসম্ভূতো মণিঃ প্রবরপূজিতঃ।
যজ্ঞে পরমতুষ্টেন দত্তঃ শক্রেণ ধীমতা ॥৫॥
ইমং দৃষ্ট্বা মণিশ্রেষ্ঠং তথা তাতস্য দর্শনম্ ।
অদ্যাস্ম্যবগতঃ সৌম্য বৈদেহস্য তথা বিভোঃ॥৬॥
অয়ং হি শোভতে তস্যাঃ প্রিয়ায়া মূর্ধ্নি মে মণিঃ।
অদ্যাস্য দর্শনেনাহং প্রাপ্তাং তামিব চিন্তয়ে ॥৭॥
কিমাহ সীতা বৈদেহী ব্রূহি সৌম্য পুনঃ পুনঃ।
পরাসুমিব তোয়েন সিঞ্চন্তী বাক্যবারিণা ॥৮॥
ইতস্তু কিং দুঃখতরং যদিমং বারিসম্ভবম্ ।
মণিং পশ্যামি সৌমিত্রে বৈদেহীমাগতাং বিনা ॥৯॥
চিরং জীবতি বৈদেহী যদি মাসং ধরিষ্যতি ।
ক্ষণং বীর ন জীবেয়ং বিনা তামসিতেক্ষণাম্ ॥১০॥
নয় মামপি তং দেশং যত্র দৃষ্টা মম প্রিয়া ।
ন তিষ্ঠেয়ং ক্ষণমপি প্রবৃত্তিমুপলভ্য চ ॥১১॥
কথং সা মম সুশ্রোণি ভীরু ভীরুঃ সতী তদা ।
ভয়াবহানাং ঘোরাণাং মধ্যে তিষ্ঠতি রক্ষসাম্ ॥১২॥
শারদস্তিমিরোন্মুক্তো নূনং চন্দ্র ইবাম্বুদৈঃ।
আবৃতো বদনং তস্যা ন বিরাজতি সাম্প্রতম্ ॥১৩॥
কিমাহ সীতা হনুমংস্তত্ত্বতঃ কথয়স্ব মে ।
এতেন খলু জীবিষ্যে ভেষজেনাতুরো যথা ॥১৪॥
মধুরা মধুরালাপা কিমাহ মম ভামিনী ।
মদ্বিহীনা বরারোহা হনুমন্কথয়স্ব মে ।
দুঃখাদ্দুঃখতরং প্রাপ্য কথং জীবতি জানকী ॥১৫॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ষট্ষষ্টিতমঃ সর্গঃ