অথ সপ্তষষ্টিতমঃ সর্গঃ এবমুক্তস্তু হনুমান্রাঘবেণ মহাত্মনা । সীতায়া ভাষিতং সর্বং ন্যবেদয়ত রাঘবে ॥১॥ ইদমুক্তবতী দেবী জানকী পুরুষর্ষভ । পূর্ববৃত্তমভিজ্ঞানং চিত্রকূটে যথাতথম্ ॥২॥ সুখসুপ্তা ত্বয়া সার্ধং জানকী পূর্বমুত্থিতা । বায়সঃ সহসোৎপত্য বিদদার স্তনান্তরম্ ॥৩॥ পর্যায়েণ চ সুপ্তস্ত্বং দেব্যঙ্কে ভরতাগ্রজ । পুনশ্চ কিল পক্ষী স দেব্যা জনয়তি ব্যথা ॥৪॥ ততঃ পুনরুপাগম্য বিদদার ভৃশং কিল । ততস্ত্বং বোধিতস্তস্যাঃ শোণিতেন সমুক্ষিতঃ॥৫॥ বায়সেন চ তেনৈবং সততং বাধ্যমানয়া । বোধিতঃ কিল দেব্যা ত্বং সুখসুপ্তঃ পরন্তপ ॥৬॥ তাং চ দৃষ্ট্বা মহাবাহো দারিতাং চ স্তনান্তরে । আশীবিষ ইব ক্রুদ্ধস্ততো বাক্যং ত্বমূচিবান্ ॥৭॥ নখাগ্রৈঃ কেন তে ভীরু দারিতং বৈ স্তনান্তরম্ । কঃ ক্রীডতি সরোষেণ পঞ্চবক্ত্রেণ ভোগিনা ॥৮॥ নিরীক্ষমাণঃ সহসা বায়সং সমুদৈক্ষথাঃ। নখৈঃ সরুধিরৈস্তীক্ষ্ণৈস্তামেবাভিমুখং স্থিতম্ ॥৯॥ সুতঃ কিল স শক্রস্য বায়সঃ পততাং বরঃ। ধরান্তরগতঃ শীঘ্রং পবনস্য গতৌ সমঃ॥১০॥ ততস্তস্মিন্মহাবাহো কোপসংবর্তিতেক্ষণঃ। বায়সে ত্বং ব্যধাঃ ক্রূরাং মতিং মতিমতাং বর ॥১১॥ স দর্ভসংস্তরাদ্গৃহ্য ব্রহ্মাস্ত্রেণন্যযোজয়ঃ। স দীপ্ত ইব কালাগ্নির্জজ্বালাভিমুখং খগম্ ॥১২॥ স ত্বং প্রদীপ্তং চিক্ষেপ দর্ভং তং বায়সং প্রতি । ততস্তু বায়সং দীপ্তঃ স দর্ভোঽনুজগাম হ ॥১৩॥ ভীতৈশ্চ সম্পরিত্যক্তঃ সুরৈঃ সর্বৈশ্চ বায়সঃ। ত্রীঁল্লোকান্সম্পরিক্রম্য ত্রাতারং নাধিগচ্ছতি ॥১৪॥ পুনরপ্যাগতস্তত্র ত্বৎসকাশমরিন্দম । ত্বং তং নিপতিতং ভূমৌ শরণ্যঃ শরণাগতম্ ॥১৫॥ বধার্হমপি কাকুৎস্থ কৃপয়া পরিপালয়ঃ। মোঘমস্ত্রং ন শক্যং তু কর্তুমিত্যেব রাঘব ॥১৬॥ ভবাংস্তস্যাক্ষি কাকস্য হিনস্তি স্ম স দক্ষিণম্ । রাম ত্বাং স নমস্কৃত্য রাজ্ঞো দশরথস্য চ ॥১৭॥ বিসৃষ্টস্তু তদা কাকঃ প্রতিপেদে স্বমালয়ম্ । এবমস্ত্রবিদাং শ্রেষ্ঠঃ সত্ত্ববাঞ্ছীলবানপি ॥১৮॥ কিমর্থমস্ত্রং রক্ষঃসু ন যোজয়সি রাঘব । ন দানবা ন গন্ধর্বা নাসুরা ন মরুদ্গণাঃ॥১৯॥ তব রাম রণে শক্তাস্তথা  প্রতিসমাসিতুম্ । তব বীর্যবতঃ কচ্চিন্ময়ি যদ্যস্তি সম্ভ্রমঃ॥২০॥ ক্ষিপ্রং সুনিশিতৈর্বার্ণৈহন্যতাং যুধি রাবণঃ। ভ্রাতুরাদেশমাজ্ঞায় লক্ষ্মণো বা পরন্তপঃ॥২১॥ স কিমর্থং নরবরো ন মাং রক্ষতি রাঘবঃ। শক্তৌ তৌ পুরুষব্যাঘ্রৌ বায়্বগ্নিসমতেজসৌ ॥২২॥ সুরাণামপি দুর্ধর্ষৌ কিমর্থং মামুপেক্ষতঃ। মমৈব দুষ্কৃতং কিঞ্চিন্মহদস্তি ন সংশয়ঃ॥২৩॥ সমর্থৌ সহিতৌ যন্মাং ন রক্ষেতে পরন্তপৌ । বৈদেহ্যা বচনং শ্রুত্বা করুণং সাধুভাষিতম্ ॥২৪॥ পুনরপ্যহমার্যাং তামিদং বচনমব্রুবম্ । ত্বচ্ছোকবিমুখো রামো দেবি সত্যেন তে শপে ॥২৫॥ রামে দুঃখাভিভূতে চ লক্ষ্মণঃ পরিতপ্যতে । কথঞ্চিদ্ভবতী দৃষ্টা ন কালঃ পরিশোচিতুম্ ॥২৬॥ অস্মিন্ মুহূর্তে দুঃখানামন্তং দ্রক্ষ্যসি ভামিনি । তাবুভৌ নরশার্দূলৌ রাজপুত্রৌ পরন্তপৌ ॥২৭॥ ত্বদ্দর্শনকৃতোৎসাহৌ লঙ্কাং ভস্মীকরিষ্যতঃ। হত্বা চ সমরে রৌদ্রং রাবণং সহবান্ধবম্ ॥২৮॥ রাঘবস্ত্বাং বরারোহে স্বপুরীং নয়িতা ধ্রুবম্ । যত্তু রামো বিজানীয়াদভিজ্ঞানমনিন্দিতে ॥২৯॥ প্রীতিসঞ্জননং তস্য প্রদাতুং তত্ত্বমর্হসি । সাভিবীক্ষ্য দিশঃ সর্বা বেণ্যুদ্গ্রথনমুত্তমম্ ॥৩০॥ মুক্ত্বা বস্ত্রাদ্দদৌ মহ্যং মণিমেতং মহাবল । প্রতিগৃহ্য মণিং দোর্ভ্যাং তব হেতো রঘুপ্রিয় ॥৩১॥ শিরসা সম্প্রণম্যৈনামহমাগমনে ত্বরে । গমনে চ কৃতোৎসাহমবেক্ষ্য বরবর্ণিনী ॥৩২॥ বিবর্ধমানং চ হি মামুবাচ জনকাত্মজা । অশ্রুপূর্ণমুখী দীনা বাষ্পগদ্গদভাষিণী ॥৩৩॥ মমোৎপতনসম্ভ্রান্তা শোকবেগসমাহতা । মামুবাচ ততঃ সীতা সভাগ্যোঽসি মহাকপে ॥৩৪॥ যদ্ দ্রক্ষ্যসি মহাবাহুং রামং কমললোচনম্ । লক্ষ্মণং চ মহাবাহুং দেবরং মে যশস্বিনম্ ॥৩৫॥ সীতয়াপ্যেবমুক্তোঽহমব্রুবং মৈথিলীং তথা । পৃষ্টমারোহ মে দেবি ক্ষিপ্রং জনকনন্দিনি ॥৩৬॥ যাবত্তে দর্শয়াম্যদ্য সসুগ্রীবং সলক্ষ্মণম্ । রাঘবং চ মহাভাগে ভর্তারমসিতেক্ষণে ॥৩৭॥ সাব্রবীন্মাং ততো দেবী নৈষ ধর্মো মহাকপে । যত্তে পৃষ্টং সিষেবেঽহং স্ববশা হরিপুঙ্গব ॥৩৮॥ পুরা চ যদহং বীর স্পৃষ্টা গাত্রেষু রক্ষসা । তত্রাহং কিং করিষ্যামি কালেনোপনিপীডিতা ॥৩৯॥ গচ্ছ ত্বং কপিশার্দূল যত্র তৌ নৃপতেঃ সুতৌ । ইত্যেবং সা সমাভাষ্য ভূয়ঃ সন্দেষ্টুমাস্থিতা ॥৪০॥ হনুমন্সিংহসঙ্কাশৌ তাবুভৌ রামলক্ষ্মণৌ । সুগ্রীবং চ সহামাত্যং সর্বান্ব্রূয়া অনাময়ম্ ॥৪১॥ যথা চ স মহাবাহুর্মাং তারয়তি রাঘবঃ। অস্মাদ্দুঃখাম্বুসংরোধাৎ তৎ ত্বমাখ্যাতুমর্হসি ॥৪২॥ ইমং চ তীব্রং মম শোকবেগং রক্ষোভিরেভিঃ পরিভর্ত্সনং চ । ব্রূয়াস্তু রামস্য গতঃ সমীপং শিবশ্চ তেঽধ্বাস্তু হরিপ্রবীর ॥৪৩॥ এতত্তবার্যা নৃপ সংয়তা সা সীতা বচঃ প্রাহ বিষাদপূর্বম্ । এতচ্চ বুদ্ধ্বা গদিতং যথা ত্বং শ্রদ্ধৎস্ব সীতাং কুশলাং সমগ্রাম্ ॥৪৪॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে সপ্তষষ্টিতমঃ সর্গঃ