অথ অষ্টষষ্টিতমঃ সর্গঃ অথাহমুত্তরং দেব্যা পুনরুক্তঃ সসম্ভ্রমম্ । তব স্নেহান্নরব্যাঘ্র সৌহার্দাদনুমান্য চ ॥১॥ এবং বহুবিধং বাচ্যো রামো দাশরথিস্ত্বয়া । যথা মামাপ্নুয়াচ্ছীঘ্রং হত্বা রাবণমাহবে ॥২॥ যদি বা মন্যসে বীর বসৈকাহমরিন্দম । কস্মিংশ্চিৎসংবৃতে দেশে বিশ্রান্তঃ শ্বো গমিষ্যসি ॥৩॥ মম চাপ্যল্পভাগ্যায়াঃ সাংনিধ্যাত্তব বানর । অস্য শোকবিপাকস্য মুহূর্তং স্যাদ্বিমোক্ষণম্ ॥৪॥ গতে হি ত্বয়ি বিক্রান্তে পুনরাগমনায় বৈ । প্রাণানামপি সন্দেহো মম স্যান্নাত্র সংশয়ঃ॥৫॥ তবাদর্শনজঃ শোকো ভূয়ো মাং পরিতাপয়েৎ । দুঃখাদ্দুঃখপরাভূতাং দুর্গতাং দুঃখভাগিনীম্ ॥৬॥ অয়ং চ বীর সন্দেহস্তিষ্ঠতীব মমাগ্রতঃ। সুমহাংস্ত্বৎসহায়েষু হর্যৃক্ষেষু হরীশ্বর ॥৭॥ কথং নু খলু দুষ্পারং তরিষ্যন্তি মহোদধিম্ । তানি হর্যৃক্ষসৈন্যানি তৌ বা নরবরাত্মজৌ ॥৮॥ ত্রয়াণামেব ভূতানাং সাগরস্যাস্য লঙ্ঘনে । শক্তিঃ স্যাদ্বৈনতেয়স্য বায়োর্বা তব চানঘ ॥৯॥ তদস্মিন্কার্যনির্যোগে বীরৈবং দুরতিক্রমে । কিং পশ্যসি সমাধানং ব্রূহি কার্যবিদাং বর ॥১০॥ কামমস্য ত্বমেবৈকঃ কার্যস্য পরিসাধনে । পর্যাপ্তঃ পরবীরঘ্ন যশস্যস্তে বলোদয়ঃ॥১১॥ বলৈঃ সমগ্রৈর্যদি মাং হত্বা রাবণমাহবে । বিজয়ী স্বপুরীং রামো নয়েত্তৎস্যাদ্যশস্করম্ ॥১২॥ যথাহং তস্য বীরস্য বনাদুপধিনা হৃতা । রক্ষসা তদ্ভয়াদেব তথা নার্হতি রাঘবঃ॥১৩॥ বলৈস্তু সঙ্কুলাং কৃত্বা লঙ্কাং পরবলার্দনঃ। মাং নয়েদ্যদি কাকুৎস্থস্তত্তস্য সদৃশং ভবেৎ ॥১৪॥ তদ্যথা তস্য বিক্রান্তমনুরূপং মহাত্মনঃ। ভবত্যাহবশূরস্য তথা ত্বমুপপাদয় ॥১৫॥ তদর্থোপহিতং বাক্যং প্রশ্রিতং হেতুসংহিতম্ । নিশম্যাহং ততঃ শেষং বাক্যমুত্তরমব্রুবম্ ॥১৬॥ দেবি হর্যৃক্ষসৈন্যানামীশ্বরঃ প্লবতাং বরঃ। সুগ্রীবঃ সত্ত্বসম্পন্নস্ত্বদর্থে কৃতনিশ্চয়ঃ॥১৭॥ তস্য বিক্রমসম্পন্নাঃ সত্ত্ববন্তো মহাবলাঃ। মনঃসঙ্কল্পসদৃশা নিদেশে হরয়ঃ স্থিতাঃ॥১৮॥ যেষাং নোপরি নাধস্তান্ন তির্যক্সজ্জতে গতিঃ। ন চ কর্মসু সীদন্তি মহৎস্বমিততেজসঃ॥১৯॥ অসকৃত্তৈর্মহাভাগৈর্বানরৈর্বলসংয়ুতৈঃ। প্রদক্ষিণীকৃতা ভূমির্বায়ুমার্গানুসারিভিঃ॥২০॥ মদ্বিশিষ্টাশ্চ তুল্যাশ্চ সন্তি তত্র বনৌকসঃ। মত্তঃ প্রত্যবরঃ কশ্চিন্নাস্তি সুগ্রীবসংনিধৌ ॥২১॥ অহং তাবদিহ প্রাপ্তঃ কিং পুনস্তে মহাবলাঃ। নহি প্রকৃষ্টাঃ প্রেষ্যন্তে প্রেষ্যন্তে হীতরে জনাঃ॥২২॥ তদলং পরিতাপেন দেবি মন্যুরপৈতু তে । একোৎপাতেন তে লঙ্কামেষ্যন্তি হরিয়ূথপাঃ॥২৩॥ মম পৃষ্ঠগতৌ তৌ চ চন্দ্রসূর্যাবিবোদিতৌ । ত্বৎসকাশং মহাভাগে নৃসিংহাবাগমিষ্যতঃ॥২৪॥ অরিঘ্নং সিংহসঙ্কাশং ক্ষিপ্রং দ্রক্ষ্যসি রাঘবম্ । লক্ষ্মণং চ ধনুষ্মন্তং লঙ্কাদ্বারমুপাগতম্ ॥২৫॥ নখদংষ্ট্রায়ুধান্বীরান্ সিংহশার্দূলবিক্রমান্ । বানরান্ বারণেন্দ্রাভান্ ক্ষিপ্রং দ্রক্ষ্যসি সঙ্গতান্ ॥২৬॥ শৈলাম্বুদনিকাশানাং লঙ্কামলয়সানুষু । নর্দতাং কপিমুখ্যানাং নচিরাচ্ছ্রোষ্যসে স্বনম্ ॥২৭॥ নিবৃত্তবনবাসং চ ত্বয়া সার্ধমরিন্দমম্ । অভিষিক্তময়োধ্যায়াং ক্ষিপ্রং দ্রক্ষ্যসি রাঘবম্ ॥২৮॥ ততো ময়া বাগ্ভিরদীনভাষিণা শিবাভিরিষ্টাভিরভিপ্রসাদিতা । উবাহ শান্তিং মম মৈথিলাত্মজা তবাতিশোকেন তথাতিপীডিতা ॥২৯॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে অষ্টষষ্টিতমঃ সর্গঃ