atha dhyānaślōkāḥ
śuklāmbaradharaṁ viṣṇuṁ śaśivarṇaṁ caturbhujam ।
prasannavadanaṁ dhyāyēt sarvavighnōpaśāntayē ॥
vāgīśādyāḥ sumanasaḥ sarvārthānāmupakramē ।
yaṁ natvā kr̥takr̥tyāḥ syustaṁ namāmi gajānanam ॥
dōrbhiryuktā caturbhiḥ sphaṭikamaṇimayīmakṣamālāṁ dadhānā
hastēnaikēna padmaṁ sitamapi ca śukaṁ pustakaṁ cāparēṇa ।
bhāsā kundēnduśaṅkhasphaṭikamaṇinibhā bhāsamānāsamānā
sā mē vāgdēvatēyaṁ nivasatu vadanē sarvadā suprasannā ॥
gururbrahmā gururviṣṇuḥ gururdēvō mahēśvaraḥ ।
guruḥ sākṣāt paraṁ brahma tasmai śrīguravē namaḥ ॥
kūjantaṁ rāmarāmēti madhuraṁ madhurākṣaram ।
āruhya kavitāśākhāṁ vandē vālmīkikōkilam ॥
vālmīkērmunisimhasya kavitāvanacāriṇaḥ ।
śr̥ṇvan rāmakathānādaṁ kō na yāti parāṁ gatim ॥
yaḥ piban satataṁ rāmacaritāmr̥tasāgaram ।
atr̥ptastaṁ muniṁ vandē prācētasamakalmaṣam ॥
gōṣpadīkr̥tavārāśiṁ maśakīkr̥tarākṣasam ।
rāmāyaṇamahāmālāratnaṁ vandē’nilātmajam ॥
añjanānandanaṁ vīraṁ jānakīśōkanāśanam ।
kapīśamakṣahantāraṁ vandē laṅkābhayaṅkaram ॥
ullaṅghya sindhōḥ salilaṁ salīlaṁ
	yaḥ śōkavahniṁ janakātmajāyāḥ ।
ādāya tēnaiva dadāha laṅkāṁ
	namāmi taṁ prāñjalirāñjanēyam ॥
āñjanēyamatipāṭalānanaṁ kāñcanādrikamanīyavigraham ।
pārijātatarumūlavāsinaṁ bhāvayāmi pavamānanandanam ॥
yatra yatra raghunāthakīrtanaṁ tatra tatra kr̥tamastakāñjalim ।
bāṣpavāriparipūrṇalōcanaṁ mārutiṁ namata rākṣasāntakam ॥
manōjavaṁ mārutatulyavēgaṁ jitēndriyaṁ buddhimatāṁ variṣṭham ।
vātātmajaṁ vānarayūthamukhyaṁ śrīrāmadūtaṁ śirasā namāmi ॥
yaḥ karṇāñjalisampuṭairaharahaḥ samyak pibatyādarāt
vālmīkērvadanāravindagalitaṁ rāmāyaṇākhyaṁ madhu ।
janmavyādhijarāvipattimaraṇairatyantasōpadravaṁ
saṁsāraṁ sa vihāya gacchati pumān viṣṇōḥ padaṁ śāśvatam ॥
tadupagatasamāsasandhiyōgaṁ samamadhurōpanatārthavākyabaddham ।
raghuvaracaritaṁ munipraṇītaṁ daśaśirasaśca vadhaṁ niśāmayadhvam ॥
vālmīkigirisambhūtā rāmasāgaragāminī ।
punātu bhuvanaṁ puṇyā rāmāyaṇamahānadī ॥
ślōkasārasamākīrṇaṁ sargakallōlasaṅkulam ।
kāṇḍagrāhamahāmīnaṁ vandē rāmāyaṇārṇavam ॥
vēdavēdyē parē puṁsi jātē daśarathātmajē ।
vēdaḥ prācētasādāsīt sākṣādrāmāyaṇātmanā ॥
vaidēhīsahitaṁ suradrumatalē haimē mahāmaṇṭapē
madhyē puṣpakamāsanē maṇimayē vīrāsanē susthitam ।
agrē vācayati prabhañjanasutē tattvaṁ munibhyaḥ paraṁ
vyākhyāntaṁ bharatādibhiḥ parivr̥taṁ rāmaṁ bhajē śyāmalam ॥
vāmē bhūmisutā puraśca hanumān paścāt sumitrāsutaḥ
śatrughnō bharataśca pārśvadalayōrvāyvādikōṇēṣu ca ।
sugrīvaśca vibhīṣaṇaśca yuvarāṭ tārāsutō jāmbavān
madhyē nīlasarōjakōmalaruciṁ rāmaṁ bhajē śyāmalam ॥
namō’stu rāmāya salakṣmaṇāya
	dēvyai ca tasyai janakātmajāyai ।
namō’stu rudrēndrayamānilēbhyō
	namō’stu candrārkamarudgaṇēbhyaḥ ॥
ityārṣē śrīmadrāmāyaṇē vālmīkīyē ādikāvyē sundarakāṇḍē dhyānaślōkāḥ