atha maṅgalaślōkāḥ
svasti prajābhyaḥ paripālayantāṁ
	nyāyyēna mārgēṇa mahīṁ mahīśāḥ ।
gōbrāhmaṇēbhyaḥ śubhamastu nityaṁ
	lōkāḥ samastāḥ sukhinō bhavantu ॥
kālē varṣatu parjanyaḥ pr̥thivī sasyaśālinī ।
dēśō’yaṁ kṣōbharahitō brāhmaṇāḥ santu nirbhayāḥ ॥
aputrāḥ putriṇaḥ santu putriṇaḥ santu pautriṇaḥ ।
adhanāḥ sadhanāḥ santu jīvantu śaradāṁ śatam ॥
caritaṁ raghunāthasya śatakōṭipravistaram ।
ēkaikamakṣaraṁ prōktaṁ mahāpātakanāśanam ॥
śrr̥ṇvan rāmāyaṇaṁ bhaktyā yaḥ pādaṁ padamēva vā ।
sa yāti brahmaṇaḥ sthānaṁ brahmaṇā pūjyatē sadā ॥
rāmāya rāmabhadrāya rāmacandrāya vēdhasē ।
raghunāthāya nāthāya sītāyāḥ patayē namaḥ ॥
yanmaṅgalaṁ sahasrākṣē sarvadēvanamaskr̥tē ।
vr̥tranāśē samabhavattattē bhavatu maṅgalam ॥
yanmaṅgalaṁ suparṇasya vinatākalpayat purā ।
amr̥taṁ prārthayānasya tattē bhavatu maṅgalam ॥
maṅgalaṁ kōsalēndrāya mahanīyaguṇātmanē ।
cakravartitanūjāya sārvabhaumāya maṅgalam ॥
amr̥tōtpādanē daityān ghnatō vajradharasya yat ।
aditirmaṅgalaṁ prādāttattē bhavatu maṅgalam ॥
trīn vikramān prakramatō viṣṇōramitatējasaḥ ।
yadāsīnmaṅgalaṁ rāma tattē bhavatu maṅgalam ॥
r̥ṣayaḥ sāgarā dvīpā vēdā lōkā diśaśca tē ।
maṅgalāni mahābāhō diśantu tava sarvadā ॥
kāyēna vācā manasēndriyairvā
	buddhyātmanā vā prakr̥tēḥ svabhāvāt ।
karōmi yad yat sakalaṁ parasmai
	nārāyaṇāyēti samarpayāmi ॥
ityārṣē śrīmadrāmāyaṇē vālmīkīyē ādikāvyē sundarakāṇḍē maṅgalaślōkāḥ