atha caturthaḥ sargaḥ
sa nirjitya purīṁ laṅkāṁ śrēṣṭhāṁ tāṁ kāmarūpiṇīm ।
vikramēṇa mahātējā hanumān kapisattamaḥ॥1॥
advārēṇa mahāvīryaḥ prākāramavapupluvē ।
niśi laṅkāṁ mahāsattvō vivēśa kapikuñjaraḥ॥2॥
praviśya nagarīṁ laṅkāṁ kapirājahitaṅkaraḥ।
cakrē’tha pādaṁ savyaṁ ca śatrūṇāṁ sa tu mūrdhani ॥3॥
praviṣṭaḥ sattvasampannō niśāyāṁ mārutātmajaḥ।
sa mahāpathamāsthāya muktapuṣpavirājitam ॥4॥
tatastu tāṁ purīṁ laṅkāṁ ramyāmabhiyayau kapiḥ।
hasitōtkr̥ṣṭaninadaistūryaghōṣapuraskr̥taiḥ॥5॥
vajrāṅkuśanikāśaiśca vajrajālavibhūṣitaiḥ।
gr̥hamēdhaiḥ purī ramyā babhāsē dyaurivāmbudaiḥ॥6॥
prajajvāla tadā laṅkā rakṣōgaṇagr̥haiḥ śubhaiḥ।
sitābhrasadr̥śaiścitraiḥ padmasvastikasaṁsthitaiḥ॥7॥
vardhamānagr̥haiścāpi sarvataḥ suvibhūṣitaiḥ।
tāṁ citramālyābharaṇāṁ kapirājahitaṅkaraḥ॥8॥
rāghavārthē caran śrīmān dadarśa ca nananda ca ।
bhavanādbhavanaṁ gacchan dadarśa kapikuñjaraḥ॥9॥
vividhākr̥tirūpāṇi bhavanāni tatastataḥ।
śuśrāva ruciraṁ gītaṁ tristhānasvarabhūṣitam ॥10॥
strīṇāṁ madanaviddhānāṁ divi cāpsarasāmiva ।
śuśrāva kāñcīninadaṁ nūpurāṇāṁ ca niḥsvanam ॥11॥
sōpānaninadāṁścāpi bhavanēṣu mahātmanām ।
āsphōṭitaninādāṁśca kṣvēḍitāṁśca tatastataḥ॥12॥
śuśrāva japatāṁ tatra mantrān rakṣōgr̥hēṣu vai ।
svādhyāya niratāṁścaiva yātudhānāndadarśa saḥ॥13॥
rāvaṇastavasaṁyuktāngarjatō rākṣasānapi ।
rājamārgaṁ samāvr̥tya sthitaṁ rakṣōgaṇaṁ mahat ॥14॥
dadarśa madhyamē gulmē rākṣasasya carān bahūn ।
dīkṣitān jaṭilān muṇḍān gōjināmbaravāsasaḥ॥15॥
darbhamuṣṭipraharaṇānagnikuṇḍāyudhāṁstathā ।
kūṭamudgarapāṇīṁśca daṇḍāyudhadharānapi ॥16॥
ēkākṣānēkavarṇāṁśca lambōdarapayōdharān ।
karālānbhugnavaktrāṁśca vikaṭānvāmanāṁstathā ॥17॥
dhanvinaḥ khaḍginaścaiva śataghnī musalāyudhān ।
parighōttamahastāṁśca vicitrakavacōjjvalān ॥18॥
nātistūlān nātikr̥śān nātidīrghātihrasvakān ।
nātigaurān nātikr̥ṣṇānnātikubjānna vāmanān ॥19॥
virūpānbahurūpāṁśca surūpāṁśca suvarcasaḥ।
patākinaścadhvajinō dadarśa vividhāyudhān ॥20॥
śaktivr̥kṣāyudhāṁścaiva paṭṭiśāśanidhāriṇaḥ।
kṣēpaṇīpāśahastāṁśca dadarśa sa mahākapiḥ॥21॥
sragviṇastvanuliptāṁśca varābharaṇabhūṣitān ।
nānavēṣasamāyuktān yathāsvairacarān bahūn ॥22॥
tīkṣṇaśūladharāṁścaiva vajriṇaśca mahābalān ।
śatasāhasramavyagramārakṣaṁ madhyamaṁ kapiḥ॥23॥
rakṣō’dhipatinirdiṣṭaṁ dadarśāntaḥ purāgrataḥ।
sa tadā tad gr̥haṁ dr̥ṣṭvā mahāhāṭakatōraṇam ॥24॥
rākṣasēndrasya vikhyātamadrimūrdhni pratiṣṭhitam ।
puṇḍarīkāvataṁsābhiḥ parikhābhiḥ samāvr̥tam ॥25॥
prākārāvr̥tamatyantaṁ dadarśa sa mahākapiḥ।
triviṣṭapanibhaṁ divyaṁ divyanādavināditam ॥26॥
vājihrēṣitasaṅghuṣṭaṁ nāditaṁ bhūṣaṇaistathā ।
rathairyānairvimānaiśca tathā hayagajaiḥ śubhaiḥ॥27॥
vāraṇaiśca caturdantaiḥ śvētābhranicayōpamaiḥ।
bhūṣitai ruciradvāraṁ mattaiśca mr̥gapakṣibhiḥ॥28॥
rakṣitaṁ sumahāvīryairyātudhānaiḥ sahasraśaḥ।
rākṣasādhipatērguptamāvivēśa gr̥haṁ kapiḥ॥29॥
sa hēmajāmbūnadacakravālaṁ
	mahārhamuktāmaṇi bhūṣitāntam ।
parārdhyakālāgurucandanārhaṁ
	sa rāvaṇāntaḥ puramāvivēśa ॥30॥
ityārṣē śrīmadrāmāyaṇē vālmīkīyē ādikāvyē sundarakāṇḍē caturthaḥ sargaḥ