atha saptamaḥ sargaḥ sa vēśmajālaṁ balavāndadarśa vyāsaktavaidūryasuvarṇajālam । yathā mahatprāvr̥ṣi mēghajālaṁ vidyutpinaddhaṁ savihaṅgajālam ॥1॥ nivēśanānāṁ vividhāśca śālāḥ pradhānaśaṅkhāyudhacāpaśālāḥ। manōharāścāpi punarviśālā dadarśa vēśmādriṣu candraśālāḥ॥2॥ gr̥hāṇi nānāvasurājitāni dēvāsuraiścāpi supūjitāni । sarvaiśca dōṣaiḥ parivarjitāni kapirdadarśa svabalārjitāni ॥3॥ tāni prayatnābhisamāhitāni mayēna sākṣādiva nirmitāni । mahītalē sarvaguṇōttarāṇi dadarśa laṅkādhipatērgr̥hāṇi ॥4॥ tatō dadarśōcchritamēgharūpaṁ manōharaṁ kāñcanacārurūpam । rakṣō’dhipasyātmabalānurūpaṁ gr̥hōttamaṁ hyapratirūparūpam ॥5॥ mahītalē svargamiva prakīrṇaṁ śriyā jvalantaṁ bahuratnakīrṇam । nānātarūṇāṁ kusumāvakīrṇaṁ girērivāgraṁ rajasāvakīrṇam ॥6॥ nārīpravēkairiva dīpyamānaṁ taḍidbhirambhōdharamarcyamānam । haṁsapravēkairiva vāhyamānaṁ śriyā yutaṁ khē sukr̥taṁ vimānam ॥7॥ yathā nagāgraṁ bahudhātucitraṁ yathā nabhaśca grahacandracitram । dadarśa yuktīkr̥tacārumēgha- citraṁ vimānaṁ bahuratnacitram ॥8॥ mahī kr̥tā parvatarājipūrṇā śailāḥ kr̥tā vr̥kṣavitānapūrṇāḥ। vr̥kṣāḥ kr̥tāḥ puṣpavitānapūrṇāḥ puṣpaṁ kr̥taṁ kēsarapatrapūrṇam ॥9॥ kr̥tāni vēśmāni ca pāṇḍurāṇi tathā supuṣpāṇyapi puṣkarāṇi । punaśca padmāni sakēsarāṇi vanāni citrāṇi sarōvarāṇi ॥10॥ puṣpāhvayaṁ nāma virājamānaṁ ratnaprabhābhiśca vighūrṇamānam । vēśmōttamānāmapi cōccamānaṁ mahākapistatra mahāvimānam ॥11॥ kr̥tāśca vaidūryamayā vihaṅgā rūpyapravālaiśca tathā vihaṅgāḥ। citrāśca nānāvasubhirbhujaṅgā jātyānurūpāsturagāḥ śubhāṅgāḥ॥12॥ pravālajāmbūnadapuṣpapakṣāḥ salīlamāvarjitajihmapakṣāḥ। kāmasya sākṣādiva bhānti pakṣāḥ kr̥tā vihaṅgāḥ sumukhāḥ supakṣāḥ॥13॥ niyujyamānāśca gajāḥ suhastāḥ sakēsarāścōtpalapatrahastāḥ। babhūva dēvī ca kr̥tāsuhastā lakṣmīstathā padmini padmahastā ॥14॥ itīva tadgr̥hamabhigamya śōbhanaṁ savismayō nagamiva cārukandaraṁ । punaśca tatparamasugandhi sundaraṁ himātyayē nagamiva cārukandaraṁ ॥15॥ tataḥ sa tāṁ kapirabhipatya pūjitāṁ caranpurīṁ daśamukhabāhupālitām । adr̥śya tāṁ janakasutāṁ supūjitāṁ suduḥkhitāṁ patiguṇavēganirjitām ॥16॥ tatastadā bahuvidhabhāvitātmanaḥ kr̥tātmanō janakasutāṁ suvartmanaḥ। apaśyatō’bhavadatiduḥkhitaṁ manaḥ sacakṣuṣaḥ pravicaratō mahātmanaḥ॥17॥ ityārṣē śrīmadrāmāyaṇē vālmīkīyē ādikāvyē sundarakāṇḍē saptamaḥ sargaḥ