atha aṣṭamaḥ sargaḥ
sa tasya madhyē bhavanasya saṁsthitō
	mahadvimānaṁ maṇiratnacitritam ।
prataptajāmbūnadajālakr̥trimaṁ
	dadarśa dhīmān pavanātmajaḥ kapiḥ॥1॥
tadapramēyapratikārakr̥trimaṁ
	kr̥taṁ svayaṁ sādhviti viśvakarmaṇā ।
divaṁ gatē vāyupathē pratiṣṭhitaṁ
	vyarājatādityapathasya lakṣma tat ॥2॥
na tatra kiñcinna kr̥taṁ prayatnatō
	na tatra kiñcinna mahārharatnavat ।
na tē viśēṣā niyatāḥ surēṣvapi
	na tatra kiñcinna mahāviśēṣavat ॥3॥
tapaḥ samādhānaparākramārjitaṁ
	manaḥ samādhānavicāracāriṇam ।
anēkasaṁsthānaviśēṣanirmitaṁ
	tatastatastulyaviśēṣanirmitam ॥4॥
manaḥ samādhāya tu śīghragāminaṁ
	durāsadaṁ mārutatulyagāminam ।
mahātmanāṁ puṇyakr̥tāṁ maharddhināṁ
	yaśasvināmagryamudāmivālayam ॥5॥
viśēṣamālambya viśēṣasaṁsthitaṁ
	vicitrakūṭaṁ bahukūṭamaṇḍitam ।
manō’bhirāmaṁ śaradindunirmalaṁ
	vicitrakūṭaṁ śikharaṁ girēryathā ॥6॥
vahanti yatkuṇḍalaśōbhitānanā
	mahāśanā vyōmacarāniśācarāḥ।
vivr̥ttavidhvastaviśālalōcanā
	mahājavā bhūtagaṇāḥ sahasraśaḥ॥7॥
vasantapuṣpōtkaracārudarśanaṁ
	vasantamāsādapi cārudarśanam ।
sa puṣpakaṁ tatra vimānamuttamaṁ
	dadarśa tadvānaravīrasattamaḥ॥8॥
ityārṣē śrīmadrāmāyaṇē vālmīkīyē ādikāvyē sundarakāṇḍē aṣṭamaḥ sargaḥ