atha saptadaśaḥ sargaḥ
tataḥ kumudaṣaṇḍābhō nirmalaṁ nirmalōdayaḥ।
prajagāma nabhaścandrō haṁsō nīlamivōdakam ॥1॥
sācivyamiva kurvansa prabhayā nirmalaprabhaḥ।
candramā raśmibhiḥ śītaiḥ siṣēvē pavanātmajam ॥2॥
sa dadarśa tataḥ sītāṁ pūrṇacandranibhānanām ।
śōkabhārairiva nyastāṁ bhārairnāvamivāmbhasi ॥3॥
didr̥kṣamāṇō vaidēhīṁ hanūmānmārutātmajaḥ।
sa dadarśāvidūrasthā rākṣasīrghōradarśanāḥ॥4॥
ēkākṣīmēkakarṇāṁ ca karṇaprāvaraṇāṁ tathā ।
akarṇāṁ śaṅkukarṇāṁ ca mastakōcchvāsanāsikām ॥5॥
atikāyōttamāṅgīṁ ca tanudīrghaśirōdharām ।
dhvastakēśīṁ tathākēśīṁ kēśakambaladhāriṇīm ॥6॥
lambakarṇalalāṭāṁ ca lambōdarapayōdharām ।
lambōṣṭhīṁ cibukōṣṭhīṁ ca lambāsyāṁ lambajānukām ॥7॥
hrasvāṁ dīrghāṁ ca kubjāṁ ca vikaṭāṁ vāmanāṁ tathā ।
karālāṁ bhugnavaktrāṁ ca piṅgākṣīṁ vikr̥tānanām ॥8॥
vikr̥tāḥ piṅgalāḥ kālīḥ krōdhanāḥ kalahapriyāḥ।
kālāyasamahāśūlakūṭamudgaradhāriṇīḥ॥9॥
varāhamr̥gaśārdūlamahiṣājaśivā mukhāḥ।
gajōṣṭrahayapādāśca nikhātaśirasō’parāḥ॥10॥
ēkahastaikapādāśca kharakarṇyaśvakarṇikāḥ।
gōkarṇīrhastikarṇīśca harikarṇīstathāparāḥ॥11॥
atināsāśca kāścicca tiryaṅnāsā anāsikāḥ।
gajasannibhanāsāśca lalāṭōcchvāsanāsikāḥ॥12॥
hastipādā mahāpādā gōpādāḥ pādacūlikāḥ।
atimātraśirōgrīvā atimātrakucōdarīḥ॥13॥
atimātrāsya nētrāśca dīrghajihvānanāstathā ।
ajāmukhīrhastimukhīrgōmukhīḥ sūkarīmukhīḥ॥14॥
hayōṣṭrakharavaktrāśca rākṣasīrghōradarśanāḥ।
śūlamudgarahastāśca krōdhanāḥ kalahapriyāḥ॥15॥
karālā dhūmrakēśinyō rākṣasīrvikr̥tānanāḥ।
pibantī satataṁ pānaṁ surāmāṁsasadāpriyāḥ॥16॥
māṁsaśōṇitadigdhāṅgīrmāṁsaśōṇitabhōjanāḥ।
tā dadarśa kapiśrēṣṭhō rōmaharṣaṇadarśanāḥ॥17॥
skandhavantamupāsīnāḥ parivārya vanaspatim ।
tasyādhastācca tāṁ dēvīṁ rājaputrīmaninditām ॥18॥
lakṣayāmāsa lakṣmīvānhanūmāñjanakātmajām ।
niṣprabhāṁ śōkasantaptāṁ malasaṅkulamūrdhajām ॥19॥
kṣīṇapuṇyāṁ cyutāṁ bhūmau tārāṁ nipatitāmiva ।
cāritrya vyapadēśāḍhyāṁ bhartr̥darśanadurgatām ॥20॥
bhūṣaṇairuttamairhīnāṁ bhartr̥vātsalyabhūṣitām ।
rākṣasādhipasaṁruddhāṁ bandhubhiśca vinākr̥tām ॥21॥
viyūthāṁ siṁhasaṁruddhāṁ baddhāṁ gajavadhūmiva ।
candrarēkhāṁ payōdāntē śāradābhrairivāvr̥tām ॥22॥
kliṣṭarūpāmasaṁsparśādayuktāmiva vallakīm ।
sa tāṁ bhartr̥hitē yuktāmayuktāṁ rakṣasāṁ vaśē ॥23॥
aśōkavanikāmadhyē śōkasāgaramāplutām ।
tābhiḥ parivr̥tāṁ tatra sagrahāmiva rōhiṇīm ॥24॥
dadarśa hanumāṁstatra latāmakusumāmiva ।
sā malēna ca digdhāṅgī vapuṣā cāpyalaṅkr̥tā ।
mr̥ṇālī paṅkadigdhēva vibhāti ca na bhāti ca ॥25॥
malinēna tu vastrēṇa parikliṣṭēna bhāminīm ।
saṁvr̥tāṁ mr̥gaśāvākṣīṁ dadarśa hanumānkapiḥ॥26॥
tāṁ dēvīṁ dīnavadanāmadīnāṁ bhartr̥tējasā ।
rakṣitāṁ svēna śīlēna sītāmasitalōcanām ॥27॥
tāṁ dr̥ṣṭvā hanumānsītāṁ mr̥gaśāvanibhēkṣaṇām ।
mr̥gakanyāmiva trastāṁ vīkṣamāṇāṁ samantataḥ॥28॥
dahantīmiva niḥśvāsairvr̥kṣānpallavadhāriṇaḥ।
saṅghātamiva śōkānāṁ duḥkhasyōrmimivōtthitām ॥29॥
tāṁ kṣamāṁ suvibhaktāṅgīṁ vinābharaṇaśōbhinīm ।
praharṣamatulaṁ lēbhē mārutiḥ prēkṣya maithilīm ॥30॥
harṣajāni ca sō’śrūṇi tāṁ dr̥ṣṭvā madirēkṣaṇām ।
mumōca hanumāṁstatra namaścakrē ca rāghavam ॥31॥
namaskr̥tvātha rāmāya lakṣmaṇāya ca vīryavān ।
sītādarśanasaṁhr̥ṣṭō hanumān saṁvr̥tō’bhavat ॥32॥
ityārṣē śrīmadrāmāyaṇē vālmīkīyē ādikāvyē sundarakāṇḍē saptadaśaḥ sargaḥ