atha ēkōnaviṁśaḥ sargaḥ
tasminnēva tataḥ kālē rājaputrī tvaninditā ।
rūpayauvanasampannaṁ bhūṣaṇōttamabhūṣitam ॥1॥
tatō dr̥ṣṭvaiva vaidēhī rāvaṇaṁ rākṣasādhipam ।
prāvēpata varārōhā pravātē kadalī yathā ॥2॥
ūrubhyāmudaraṁ chādya bāhubhyāṁ ca payōdharau ।
upaviṣṭā viśālākṣī rudatī varavarṇinī ॥3॥
daśagrīvastu vaidēhīṁ rakṣitāṁ rākṣasīgaṇaiḥ।
dadarśa dīnāṁ duḥkhārtāṁ nāvaṁ sannāmivārṇavē ॥4॥
asaṁvr̥tāyāmāsīnāṁ dharaṇyāṁ saṁśitavratām ।
chinnāṁ prapatitāṁ bhūmau śākhāmiva vanaspatēḥ॥5॥
malamaṇḍanadigdhāṅgīṁ maṇḍanārhāmamaṇḍanām ।
mr̥ṇālī paṅkadigdhēva vibhāti na vibhāti ca ॥6॥
samīpaṁ rājasiṁhasya rāmasya viditātmanaḥ।
saṅkalpahayasaṁyuktairyāntīmiva manōrathaiḥ॥7॥
śuṣyantīṁ rudatīmēkāṁ dhyānaśōkaparāyaṇām ।
duḥkhasyāntamapaśyantīṁ rāmāṁ rāmamanuvratām ॥8॥
cēṣṭamānāmathāviṣṭāṁ pannagēndravadhūmiva ।
dhūpyamānāṁ grahēṇēva rōhiṇīṁ dhūmakētunā ॥9॥
vr̥ttaśīlē kulē jātāmācāravati dhārmikē ।
punaḥ saṁskāramāpannāṁ jātamiva ca duṣkulē ॥10॥
sannāmiva mahākīrtiṁ śraddhāmiva vimānitām ।
prajñāmiva parikṣīṇāmāśāṁ pratihatāmiva ॥11॥
āyatīmiva vidhvastāmājñāṁ pratihatāmiva ।
dīptāmiva diśaṁ kālē pūjāmapahatāmiva ॥12॥
paurṇamāsīmiva niśāṁ tamōgrastēndumaṇḍalām ।
padminīmiva vidhvastāṁ hataśūrāṁ camūmiva ॥13॥
prabhāmiva tamōdhvastāmupakṣīṇāmivāpagām ।
vēdīmiva parāmr̥ṣṭāṁ śāntāmagniśikhāmiva ॥14॥
utkr̥ṣṭaparṇakamalāṁ vitrāsitavihaṅgamām ।
hastihastaparāmr̥ṣṭāmākulāmiva padminīm ॥15॥
patiśōkāturāṁ śuṣkāṁ nadīṁ visrāvitāmiva ।
parayā mr̥jayā hīnāṁ kr̥ṣṇapakṣē niśāmiva ॥16॥
sukumārīṁ sujātāṅgīṁ ratnagarbhagr̥hōcitām ।
tapyamānāmivōṣṇēna mr̥ṇālīmacirōddhr̥tām ॥17॥
gr̥hītāmālitāṁ stambhē yūthapēna vinākr̥tām ।
niḥśvasantīṁ suduḥkhārtāṁ gajarājavadhūmiva ॥18॥
ēkayā dīrghayā vēṇyā śōbhamānāmayatnataḥ।
nīlayā nīradāpāyē vanarājyā mahīmiva ॥19॥
upavāsēna śōkēna dhyānēna ca bhayēna ca ।
parikṣīṇāṁ kr̥śāṁ dīnāmalpāhārāṁ tapōdhanām ॥20॥
āyācamānāṁ duḥkhārtāṁ prāñjaliṁ dēvatāmiva ।
bhāvēna raghumukhyasya daśagrīvaparābhavam ॥21॥
samīkṣamāṇāṁ rudatīmaninditāṁ
	supakṣmatāmrāyataśuklalōcanām ।
anuvratāṁ rāmamatīva maithilīṁ
	pralōbhayāmāsa vadhāya rāvaṇaḥ॥22॥
ityārṣē śrīmadrāmāyaṇē vālmīkīyē ādikāvyē sundarakāṇḍē ēkōnaviṁśaḥ sargaḥ