atha viṁśaḥ sargaḥ
sa tāṁ parivr̥tāṁ dīnāṁ nirānandāṁ tapasvinīm ।
sākārairmadhurairvākyairnyadarśayata rāvaṇaḥ॥1॥
māṁ dr̥ṣṭvā nāganāsōrugūhamānā stanōdaram ।
adarśanamivātmānaṁ bhayānnētuṁ tvamicchasi ॥2॥
kāmayē tvāṁ viśālākṣi bahumanyasva māṁ priyē ।
sarvāṅgaguṇasampannē sarvalōkamanōharē ॥3॥
nēha kēcinmanuṣyā vā rākṣasāḥ kāmarūpiṇaḥ।
vyapasarpatu tē sītē bhayaṁ mattaḥ samutthitam ॥4॥
svadharmō rakṣasāṁ bhīru sarvadaiva na saṁśayaḥ।
gamanaṁ vā parastrīṇāṁ haraṇaṁ sampramathya vā ॥5॥
ēvaṁ caivamakāmāṁ tvāṁ na ca sprakṣyāmi maithili ।
kāmaṁ kāmaḥ śarīrē mē yathākāmaṁ pravartatām ॥6॥
dēvi nēha bhayaṁ kāryaṁ mayi viśvasihi priyē ।
praṇayasva ca tattvēna maivaṁ bhūḥ śōkalālasā ॥7॥
ēkavēṇī dharāśayyā dhyānaṁ malinamambaram ।
asthānē’pyupavāsaśca naitānyaupayikāni tē ॥8॥
vicitrāṇi ca mālyāni candanānyagarūṇi ca ।
vividhāni ca vāsāṁsi divyānyābharaṇāni ca ॥9॥
mahārhāṇi ca pānāni śayanānyāsanāni ca ।
gītaṁ nr̥tyaṁ ca vādyaṁ ca labha māṁ prāpya maithili ॥10॥
strīratnamasi maivaṁ bhūḥ kuru gātrēṣu bhūṣaṇam ।
māṁ prāpya hi kathaṁ vā syāstvamanarhā suvigrahē ॥11॥
idaṁ tē cāru sañjātaṁ yauvanaṁ hyativartatē ।
yadatītaṁ punarnaiti srōtaḥ srōtasvināmiva ॥12॥
tvāṁ kr̥tvōparatō manyē rūpakartā sa viśvakr̥t ।
nahi rūpōpamā hyanyā tavāsti śubhadarśanē ॥13॥
tvāṁ samāsādya vaidēhi rūpayauvanaśālinīm ।
kaḥ punarnātivartēta sākṣādapi pitāmahaḥ॥14॥
yadyatpaśyāmi tē gātraṁ śītāṁśusadr̥śānanē ।
tasmiṁstasminpr̥thuśrōṇi cakṣurmama nibadhyatē ॥15॥
bhava maithili bhāryā mē mōhamētaṁ visarjaya ।
bahvīnāmuttamastrīṇāṁ mamāgramahiṣī bhava ॥16॥
lōkēbhyō yāni ratnāni sampramathyāhr̥tāni mē ।
tāni tē bhīru sarvāṇi rājyaṁ caiva dadāmi tē ॥17॥
vijitya pr̥thivīṁ sarvāṁ nānānagaramālinīm
janakāya pradāsyāmi tava hētōrvilāsini ॥18॥
nēha paśyāmi lōkē’nyaṁ yō mē pratibalō bhavēt ।
paśya mē sumahadvīryamapratidvandvamāhavē ॥19॥
asakr̥tsaṁyugē bhagnā mayā vimr̥ditadhvajāḥ।
aśaktāḥ pratyanīkēṣu sthātuṁ mama surāsurāḥ॥20॥
iccha māṁ kriyatāmadya pratikarma tavōttamam ।
suprabhāṇyavasajjantāṁ tavāṅgē bhūṣaṇāni hi ॥21॥
sādhu paśyāmi tē rūpaṁ suyuktaṁ pratikarmaṇā ।
pratikarmābhisaṁyuktā dākṣiṇyēna varānanē ॥22॥
bhuṅkṣva bhōgānyathākāmaṁ piba bhīru ramasva ca ।
yathēṣṭaṁ ca prayaccha tvaṁ pr̥thivīṁ vā dhanāni ca ॥23॥
lalasva mayi visrabdhā dhr̥ṣṭamājñāpayasva ca ।
matprasādāllalantyāśca lalatāṁ bāndhavastava ॥24॥
r̥ddhiṁ mamānupaśya tvaṁ śriyaṁ bhadrē yaśasvini ।
kiṁ kariṣyasi rāmēṇa subhagē cīravāsinā ॥25॥
nikṣiptavijayō rāmō gataśrīrvanagōcaraḥ।
vratī sthaṇḍilaśāyī ca śaṅkē jīvati vā na vā ॥26॥
na hi vaidēhi rāmastvāṁ draṣṭuṁ vāpyupalabhyatē ।
purō balākairasitairmēghairjyōtsnāmivāvr̥tām ॥27॥
na cāpi mama hastāttvāṁ prāptumarhati rāghavaḥ।
hiraṇyakaśipuḥ kīrtimindrahastagatāmiva ॥28॥
cārusmitē cārudati cārunētrē vilāsini ।
manō harasi mē bhīru suparṇaḥ pannagaṁ yathā ॥29॥
kliṣṭakauśēyavasanāṁ tanvīmapyanalaṅkr̥tām ।
tvāṁ dr̥ṣṭvā svēṣu dārēṣu ratiṁ nōpalabhāmyaham ॥30॥
antaḥpuranivāsinyaḥ striyaḥ sarvaguṇānvitāḥ।
yāvatyō mama sarvāsāmaiśvaryaṁ kuru jānaki ॥31॥
mama hyasitakēśāntē trailōkyapravarastriyaḥ।
tāstvāṁ paricariṣyanti śriyamapsarasō yathā ॥32॥
yāni vaiśravaṇē subhru ratnāni ca dhanāni ca ।
tāni lōkāṁśca suśrōṇi mayā bhuṅkṣva yathāsukham ॥33॥
na rāmastapasā dēvi na balēna ca vikramaiḥ।
na dhanēna mayā tulyastējasā yaśasāpi vā ॥34॥
piba vihara ramasva bhuṅkṣva bhōgān
	dhananicayaṁ pradiśāmi mēdinīṁ ca ।
mayi lala lalanē yathāsukhaṁ tvaṁ
	tvayi ca samētya lalantu bāndhavāstē ॥35॥
kusumitatarujālasantatāni
	bhramarayutāni samudratīrajāni ।
kanakavimalahārabhūṣitāṅgī
	vihara mayā saha bhīru kānanāni ॥36॥
ityārṣē śrīmadrāmāyaṇē vālmīkīyē ādikāvyē sundarakāṇḍē viṁśaḥ sargaḥ