atha ēkōnatriṁśaḥ sargaḥ
tathāgatāṁ tāṁ vyathitāmaninditāṁ
	vyapētaharṣāṁ paridīnamānasām ।
śubhāṁ nimittāni śubhāni bhējirē
	naraṁ śriyā juṣṭamivōpajīvinaḥ॥1॥
tasyāḥ śubhaṁ vāmamarālapakṣma
	rājīvr̥taṁ kr̥ṣṇaviśālaśuklam ।
prāspandataikaṁ nayanaṁ sukēśyā
	mīnāhataṁ padmamivābhitāmram ॥2॥
bhujaśca cārvañcitapīnavr̥ttaḥ
	parārdhyakālāgurucandanārhaḥ।
anuttamēnādhyuṣitaḥ priyēṇa
	cirēṇa vāmaḥ samavēpatāśu ॥3॥
gajēndrahastapratimaśca pīna-
	stayōrdvayōḥ saṁhatayōstu jātaḥ।
praspandamānaḥ punarūrurasyā
	rāmaṁ purastātsthitamācacakṣē ॥4॥
śubhaṁ punarhēmasamānavarṇa-
	mīṣadrajōdhvastamivāmalākṣyāḥ ।
vāsaḥ sthitāyāḥśikharāgradantyāḥ
	kiñcitparisraṁsata cārugātryāḥ॥5॥
ētairnimittairaparaiśca subhrūḥ
	sañcōditā prāgapi sādhusiddhaiḥ।
vātātapaklāntamiva praṇaṣṭaṁ
	varṣēṇa bījaṁ pratisañjaharṣa ॥6॥
tasyāḥ punarbimbaphalādharōṣṭhaṁ
	svakṣibhrukēśāntamarālapakṣma ।
vaktraṁ babhāsē smitaśukladaṁṣṭraṁ
	rāhōrmukhāccandra iva pramuktaḥ॥7॥
sā vītaśōkā vyapanītatandrī
	śāntajvarā harṣavivr̥ddhasattvā ।
aśōbhatāryā vadanēna śuklē
	śītāṁśunā rātririvōditēna ॥8॥
ityārṣē śrīmadrāmāyaṇē vālmīkīyē ādikāvyē sundarakāṇḍē ēkōnatriṁśaḥ sargaḥ