atha dvātriṁśaḥ sargaḥ
tataḥ śākhāntarē līnaṁ dr̥ṣṭvā calitamānasā ।
vēṣṭitārjunavastraṁ taṁ vidyutsaṅghātapiṅgalam ॥1॥
sā dadarśa kapiṁ tatra praśritaṁ priyavādinam ।
phullāśōkōtkarābhāsaṁ taptacāmīkarēkṣaṇam ॥2॥
sātha dr̥ṣṭvā hariśrēṣṭhaṁ vinītavadavasthitam ।
maithilī cintayāmāsa vismayaṁ paramaṁ gatā ॥3॥
ahō bhīmamidaṁ sattvaṁ vānarasya durāsadam ।
durnirīkṣyamidaṁ matvā punarēva mumōha sā ॥4॥
vilalāpa bhr̥śaṁ sītā karuṇaṁ bhayamōhitā ।
rāma rāmēti duḥkhārtā lakṣmaṇēti ca bhāminī ॥5॥
rurōda sahasā sītā mandamandasvarā satī ।
sātha dr̥ṣṭvā harivaraṁ vinītavadupāgatam ।
maithilī cintayāmāsa svapnō’yamiti bhāminī ॥6॥
sā vīkṣamāṇā pr̥thubhugnavaktraṁ
	śākhāmr̥gēndrasya yathōktakāram ।
dadarśa piṅgapravaraṁ mahārhaṁ
	vātātmajaṁ buddhimatāṁ variṣṭham ॥7॥
sā taṁ samīkṣyaiva bhr̥śaṁ vipannā
	gatāsukalpēva babhūva sītā ।
cirēṇa sañjñāṁ pratilabhya caivaṁ
	vicintayāmāsa viśālanētrā ॥8॥
svapnō mayāyaṁ vikr̥tō’dya dr̥ṣṭaḥ
	śākhāmr̥gaḥ śāstragaṇairniṣiddhaḥ।
svastyastu rāmāya sa lakṣmaṇāya
	tathā piturmē janakasya rājñaḥ॥9॥
svapnō hi nāyaṁ nahi mē’sti nidrā
	śōkēna duḥkhēna ca pīḍitāyāḥ।
sukhaṁ hi mē nāsti yatō vihīnā
	tēnēndupūrṇapratimānanēna ॥10॥
rāmēti rāmēti sadaiva buddhyā
	vicintya vācā bruvatī tamēva ।
tasyānurūpaṁ ca kathāṁ tadartha-
	mēvaṁ prapaśyāmi tathā śr̥ṇōmi ॥11॥
ahaṁ hi tasyādya manōbhavēna
	sampīḍitā tadgatasarvabhāvā ।
vicintayantī satataṁ tamēva
	tathaiva paśyāmi tathā śr̥ṇōmi ॥12॥
manōrathaḥ syāditi cintayāmi
	tathāpi buddhyāpi vitarkayāmi ।
kiṁ kāraṇaṁ tasya hi nāsti
	rūpaṁ suvyaktarūpaśca vadatyayaṁ mām ॥13॥
namō’stu vācaspatayē savajriṇē
	svayambhuvē caiva hutāśanāya ।
anēna cōktaṁ yadidaṁ mamāgratō
	vanaukasā tacca tathāstu nānyathā ॥14॥
ityārṣē śrīmadrāmāyaṇē vālmīkīyē ādikāvyē sundarakāṇḍē dvātriṁśaḥ sargaḥ