atha tricatvāriṁśaḥ sargaḥ
tataḥ sa kiṅkarān hatvā hanūmān dhyānamāsthitaḥ।
vanaṁ bhagnaṁ mayā caityaprāsādō na vināśitaḥ॥1॥
tasmātprāsādamadyaivamimaṁ vidhvaṁsayāmyaham ।
iti sañcintya hanumānmanasādarśayan balam ॥2॥
caityaprāsādamutplutya mēruśr̥ṅgamivōnnatam ।
ārurōha hariśrēṣṭhō hanūmānmārutātmajaḥ॥3॥
āruhya girisaṅkāśaṁ prāsādaṁ hariyūthapaḥ।
babhau sa sumahātējāḥ pratisūrya ivōditaḥ॥4॥
sampradhr̥ṣya tu durdharṣaścaityaprāsādamunnatam ।
hanūmānprajvalam̐llakṣmyā pāriyātrōpamō’bhavat ॥5॥
sa bhūtvā sumahākāyaḥ prabhāvān mārutātmajaḥ।
dhr̥ṣṭamāsphōṭayāmāsa laṅkāṁ śabdēna pūrayan ॥6॥
tasyāsphōṭitaśabdēna mahatā śrōtraghātinā ।
pēturvihaṅgamāstatra caityapālāśca mōhitāḥ॥7॥
astravijjayatāṁ rāmō lakṣmaṇaśca mahābalaḥ।
rājā jayati sugrīvō rāghavēṇābhipālitaḥ॥8॥
dāsō’haṁ kōsalēndrasya rāmasyākliṣṭakarmaṇaḥ।
hanumāñśatrusainyānāṁ nihantā mārutātmajaḥ॥9॥
na rāvaṇasahasraṁ mē yuddhē pratibalaṁ bhavēt ।
śilābhistu praharataḥ pādapaiśca sahasraśaḥ॥10॥
ardayitvā purīṁ laṅkāmabhivādya ca maithilīm ।
samr̥ddhārthō gamiṣyāmi miṣatāṁ sarvarakṣasām ॥11॥
ēvamuktvā mahākāyaścaityasthō hariyūthapaḥ।
nanāda bhīmanirhrādō rakṣasāṁ janayanbhayam ॥12॥
tēna nādēna mahatā caityapālāḥ śataṁ yayuḥ।
gr̥hītvā vividhānastrānprāsānkhaḍgānparaśvadhān ॥13॥
visr̥jantō mahākāyā mārutiṁ paryavārayan ।
tē gadābhirvicitrābhiḥ parighaiḥ kāñcanāṅgadaiḥ॥14॥
ājagmurvānaraśrēṣṭhaṁ bāṇaiścādityasannibhaiḥ।
āvarta iva gaṅgāyāstōyasya vipulō mahān ॥15॥
parikṣipya hariśrēṣṭhaṁ sa babhau rakṣasāṁ gaṇaḥ।
tatō vātātmajaḥ kruddhō bhīmarūpaṁ samāsthitaḥ॥16॥
prāsādasya mahāṁstasya stambhaṁ hēmapariṣkr̥tam ।
utpāṭayitvā vēgēna hanūmānmārutātmajaḥ॥17॥
tatastaṁ bhrāmayāmāsa śatadhāraṁ mahābalaḥ।
tatra cāgnissamabhavatprāsādaścāpyadahyata ॥18॥
dahyamānaṁ tatō dr̥ṣṭvā prāsādaṁ hariyūthapaḥ।
sa rākṣasaśataṁ hatvā vajrēṇēndra ivāsurān ॥19॥
antarikṣasthitaḥ śrīmānidaṁ vacanamabravīt ।
mādr̥śānāṁ sahasrāṇi visr̥ṣṭāni mahātmanām ॥20॥
balināṁ vānarēndrāṇāṁ sugrīvavaśavartinām ।
aṭanti vasudhāṁ kr̥tsnāṁ vayamanyē ca vānarāḥ॥21॥
daśanāgabalāḥ kēcitkēciddaśaguṇōttarāḥ।
kēcinnāgasahasrasya babhūvustulyavikramāḥ॥22॥
santi caughabalāḥ kēcit santi vāyubalōpamāḥ।
apramēyabalāḥ kēcit tatrāsanhariyūthapāḥ॥23॥
īdr̥gvidhaistu haribhirvr̥tō dantanakhāyudhaiḥ।
śataiḥ śatasahasraiśca kōṭībhiścāyutairapi ॥24॥
āgamiṣyati sugrīvaḥ sarvēṣāṁ vō niṣūdanaḥ।
nēyamasti purī laṅkā na yūyaṁ na ca rāvaṇaḥ।
yasya tvikṣvākuvīrēṇa baddhaṁ vairaṁ mahātmanā ॥25॥
ityārṣē śrīmadrāmāyaṇē vālmīkīyē ādikāvyē sundarakāṇḍē tricatvāriṁśaḥ sargaḥ