atha catuścatvāriṁśaḥ sargaḥ
sandiṣṭō rākṣasēndrēṇa prahastasya sutō balī ।
jambumālī mahādaṁṣṭrō nirjagāma dhanurdharaḥ॥1॥
raktamālyāmbaradharaḥ sragvī rucirakuṇḍalaḥ।
mahānvivr̥ttanayanaścaṇḍaḥ samaradurjayaḥ॥2॥
dhanuḥ śakradhanuḥ prakhyaṁ mahad rucirasāyakam ।
visphārayāṇō vēgēna vajrāśanisamasvanam ॥3॥
tasya visphāraghōṣēṇa dhanuṣō mahatā diśaḥ।
pradiśaśca nabhaścaiva sahasā samapūryata ॥4॥
rathēna kharayuktēna tamāgatamudīkṣya saḥ।
hanūmānvēgasampannō jaharṣa ca nanāda ca ॥5॥
taṁ tōraṇaviṭaṅkasthaṁ hanūmantaṁ mahākapim ।
jambumālī mahātējā vivyādha niśitaiḥ śaraiḥ॥6॥
ardhacandrēṇa vadanē śirasyēkēna karṇinā ।
bāhvōrvivyādha nārācairdaśabhistu kapīśvaram ॥7॥
tasya tacchuśubhē tāmraṁ śarēṇābhihataṁ mukham ।
śaradīvāmbujaṁ phullaṁ viddhaṁ bhāskararaśminā ॥8॥
tattasya raktaṁ raktēna rañjitaṁ śuśubhē mukham ।
yathā’’kāśē mahāpadmaṁ siktaṁ kāñcanabindubhiḥ॥9॥
cukōpa bāṇābhihatō rākṣasasya mahākapiḥ।
tataḥ pārśvē’tivipulāṁ dadarśa mahatīṁ śilām ॥10॥
tarasā tāṁ samutpāṭya cikṣēpa javavad balī ।
tāṁ śarairdaśabhiḥ kruddhastāḍayāmāsa rākṣasaḥ॥11॥
vipannaṁ karma taddr̥ṣṭvā hanūmāṁścaṇḍavikramaḥ।
sālaṁ vipulamutpāṭya bhrāmayāmāsa vīryavān ॥12॥
bhrāmayantaṁ kapiṁ dr̥ṣṭvā sālavr̥kṣaṁ mahābalam ।
cikṣēpa subahūnbāṇāñjambumālī mahābalaḥ॥13॥
sālaṁ caturbhiścicchēda vānaraṁ pañcabhirbhujē ।
urasyēkēna bāṇēna daśabhistu stanāntarē ॥14॥
sa śaraiḥ pūritatanuḥ krōdhēna mahatā vr̥taḥ।
tamēva parighaṁ gr̥hya bhrāmayāmāsa vēgitaḥ॥15॥
ativēgō’tivēgēna bhrāmayitvā balōtkaṭaḥ।
parighaṁ pātayāmāsa jambumālērmahōrasi ॥16॥
tasya caiva śirō nāsti na bāhū jānunī na ca ।
na dhanurna rathō nāśvāstatrādr̥śyanta nēṣavaḥ॥17॥
sa hatastarasā tēna jambumālī mahārathaḥ।
papāta nihatō bhūmau cūrṇitāṅga iva drumaḥ॥18॥
jambumāliṁ sunihataṁ kiṅkarāṁśca mahābalān ।
cukrōdha rāvaṇaḥ śrutvā krōdhasaṁraktalōcanaḥ॥19॥
sa rōṣasaṁvartitatāmralōcanaḥ
	prahastaputrē nihatē mahābalē ।
amātyaputrānativīryavikramān
	samādidēśāśu niśācarēśvaraḥ॥20॥
ityārṣē śrīmadrāmāyaṇē vālmīkīyē ādikāvyē sundarakāṇḍē catuścatvāriṁśaḥ sargaḥ