atha pañcacatvāriṁśaḥ sargaḥ
tatastē rākṣasēndrēṇa cōditā mantriṇaḥ sutāḥ।
niryayurbhavanāttasmātsapta saptārcivarcasaḥ॥1॥
mahadbalaparīvārā dhanuṣmantō mahābalāḥ।
kr̥tāstrāstravidāṁ śrēṣṭhāḥ parasparajayaiṣiṇaḥ॥2॥
hēmajālaparikṣiptairdhvajavadbhiḥ patākibhiḥ।
tōyadasvananirghōṣairvājiyuktairmahārathaiḥ॥3॥
taptakāñcanacitrāṇi cāpānyamitavikramāḥ।
visphārayantaḥ saṁhr̥ṣṭāstaḍidvanta ivāmbudāḥ॥4॥
jananyastāstatastēṣāṁ viditvā kiṅkarānhatān ।
babhūvuḥ śōkasambhrāntāḥ sabāndhavasuhr̥jjanāḥ॥5॥
tē parasparasaṅgharṣāt taptakāñcanabhūṣaṇāḥ।
abhipēturhanūmantaṁ tōraṇasthamavasthitam ॥6॥
sr̥jantō bāṇavr̥ṣṭiṁ tē rathagarjitaniḥsvanāḥ।
prāvr̥ṭkāla ivāmbhōdā vicērurnairr̥tāmbudāḥ॥7॥
avakīrṇastatastābhirhanūmāñśaravr̥ṣṭibhiḥ।
abhavatsaṁvr̥tākāraḥ śailarāḍiva vr̥ṣṭibhiḥ॥8॥
sa śarānvañcayāmāsa tēṣāmāśucaraḥ kapiḥ।
rathavēgāṁśca vīrāṇāṁ vicaranvimalē’mbarē ॥9॥
sa taiḥ krīḍandhanuṣmadbhirvyōmni vīraḥ prakāśatē ।
dhanuṣmadbhiryathā mēghairmārutaḥ prabhurambarē ॥10॥
sa kr̥tvā ninadaṁ ghōraṁ trāsayaṁstāṁ mahācamūm ।
cakāra hanumānvēgaṁ tēṣu rakṣaḥsu vīryavān ॥11॥
talēnābhihanatkāṁścitpādaiḥ kāṁścitparantapaḥ।
muṣṭibhiścāhanatkāṁścinnakhaiḥ kāṁścidvyadārayat ॥12॥
pramamāthōrasā kāṁścidūrubhyāmaparānapi।
kēcit tasyaiva nādēna tatraiva patitā bhuvi ॥13॥
tatastēṣvavapannēṣu bhūmau nipatitēṣu ca ।
tatsainyamagamatsarvaṁ diśō daśa bhayārditam ॥14॥
vinēdurvisvaraṁ nāgā nipēturbhuvi vājinaḥ।
bhagnanīḍadhvajacchatrairbhūśca kīrṇābhavadrathaiḥ॥15॥
sravatā rudhirēṇātha sravantyō darśitāḥ pathi ।
vividhaiśca svanairlaṅkā nanāda vikr̥taṁ tadā ॥16॥
sa tānpravr̥ddhānvinihatya rākṣasān
	mahābalaścaṇḍaparākramaḥ kapiḥ।
yuyutsuranyaiḥ punarēva rākṣasai-
	stadēva vīrō’bhijagāma tōraṇam ॥17॥
ityārṣē śrīmadrāmāyaṇē vālmīkīyē ādikāvyē sundarakāṇḍē pañcacatvāriṁśaḥ sargaḥ