atha ēkōnapañcāśaḥ sargaḥ
tataḥ sa karmaṇā tasya vismitō bhīmavikramaḥ।
hanumān krōdhatāmrākṣō rakṣō’dhipamavaikṣata ॥1॥
bhrājamānaṁ mahārhēṇa kāñcanēna virājatā ।
muktājālavr̥tēnātha mukuṭēna mahādyutim ॥2॥
vajrasaṁyōgasaṁyuktairmahārhamaṇivigrahaiḥ।
haimairābharaṇaiścitrairmanasēva prakalpitaiḥ॥3॥
mahārhakṣaumasaṁvītaṁ raktacandanarūṣitam ।
svanuliptaṁ vicitrābhirvividhābhiśca bhaktibhiḥ॥4॥
vicitraṁ darśanīyaiśca raktākṣairbhīmadarśanaiḥ।
dīptatīkṣṇamahādaṁṣṭraṁ pralambaṁ daśanacchadaiḥ॥5॥
śirōbhirdaśabhirvīrō bhrājamānaṁ mahaujasaṁ ।
nānāvyālasamākīrṇaiḥ śikharairiva mandaram ॥6॥
nīlāñjanacayaprakhyaṁ hārēṇōrasi rājatā ।
pūrṇacandrābhavaktrēṇa sabālārkamivāmbudam ॥7॥
bāhubhirbaddhakēyūraiścandanōttamarūṣitaiḥ।
bhrājamānāṅgadairbhīmaiḥ pañcaśīrṣairivōragaiḥ॥8॥
mahati sphāṭikē citrē ratnasaṁyōgacitritē ।
uttamāstaraṇāstīrṇē sūpaviṣṭaṁ varāsanē ॥9॥
alaṅkr̥tābhiratyarthaṁ pramadābhiḥ samantataḥ।
vālavyajanahastābhirārātsamupasēvitam ॥10॥
durdharēṇa prahastēna mahāpārśvēna rakṣasā ।
mantribhirmantratattvajñairnikumbhēna ca mantriṇā ॥11॥
upōpaviṣṭaṁ rakṣōbhiścaturbhirbaladarpitam ।
kr̥tsnaṁ parivr̥taṁ lōkaṁ caturbhiriva sāgaraiḥ॥12॥
mantribhirmantratattvajñairanyaiśca śubhadarśibhiḥ।
āśvāsyamānaṁ sacivaiḥ surairiva surēśvaram ॥13॥
apaśyadrākṣasapatiṁ hanūmānatitējasaṁ ।
vēṣṭhitaṁ mēruśikharē satōyamiva tōyadam ॥14॥
sa taiḥ sampīḍyamānō’pi rakṣōbhirbhīmavikramaiḥ।
vismayaṁ paramaṁ gatvā rakṣō’dhipamavaikṣata ॥15॥
bhrājamānaṁ tatō dr̥ṣṭvā hanumānrākṣasēśvaram ।
manasā cintayāmāsa tējasā tasya mōhitaḥ॥16॥
ahō rūpamahō dhairyamahō sattvamahō dyutiḥ।
ahō rākṣasarājasya sarvalakṣaṇayuktatā ॥17॥
yadyadharmō na balavānsyādayaṁ rākṣasēśvaraḥ।
syādayaṁ suralōkasya saśakrasyāpi rakṣitā ॥18॥
asya krūrairnr̥śaṁsaiśca karmabhirlōkakutsitaiḥ।
sarvē bibhyati khalvasmāllōkāḥ sāmaradānavāḥ॥19॥
ayaṁ hyutsahatē kruddhaḥ kartumēkārṇavaṁ jagat ।
iti cintāṁ bahuvidhāmakarōnmatimānkapiḥ।
dr̥ṣṭvā rākṣasarājasya prabhāvamamitaujasaḥ॥20॥
ityārṣē śrīmadrāmāyaṇē vālmīkīyē ādikāvyē sundarakāṇḍē ēkōnapañcāśaḥ sargaḥ