atha pañcapañcāśaḥ sargaḥ
sandīpyamānāṁ vitrastāṁ trastarakṣōgaṇāṁ purīm ।
avēkṣya hānumām̐llaṅkāṁ cintayāmāsa vānaraḥ॥1॥
tasyābhūtsumahāṁstrāsaḥ kutsā cātmanyajāyata ।
laṅkāṁ pradahatā karma kiṁsvitkr̥tamidaṁ mayā ॥2॥
dhanyāḥ khalu mahātmānō yē buddhyā kōpamutthitam ।
nirundhanti mahātmānō dīptamagnimivāmbhasā ॥3॥
kruddhaḥ pāpaṁ na kuryātkaḥ kruddhō hanyādgurūnapi ।
kruddhaḥ paruṣayā vācā narassādhūnadhikṣipēt ॥4॥
vācyāvācyaṁ prakupitō na vijānāti karhicit ।
nākāryamasti kruddhasya nāvācyaṁ vidyatē kvacit ॥5॥
yaḥ samutpatitaṁ krōdhaṁ kṣamayaiva nirasyati ।
yathōragastvacaṁ jīrṇāṁ sa vai puruṣa ucyatē ॥6॥
dhigastu māṁ sudurbuddhiṁ nirlajjaṁ pāpakr̥ttamam ।
acintayatvā tāṁ sītāmagnidaṁ svāmighātakam ॥7॥
yadi dagdhā tviyaṁ sarvā nūnamāryāpi jānakī ।
dagdhā tēna mayā bharturhataṁ kāryamajānatā ॥8॥
yadarthamayamārambhastatkāryamavasāditam ।
mayā hi dahatā laṅkāṁ na sītā parirakṣitā ॥9॥
īṣatkāryamidaṁ kāryaṁ kr̥tamāsīnna saṁśayaḥ।
tasya krōdhābhibhūtēna mayā mūlakṣayaḥ kr̥taḥ॥10॥
vinaṣṭā jānakī vyaktaṁ na hyadagdhaḥ pradr̥śyatē ।
laṅkāyāḥ kaściduddēśaḥ sarvā bhasmīkr̥tā purī ॥11॥
yadi tadvihataṁ kāryaṁ mayā prajñāviparyayāt ।
ihaiva prāṇasaṁnyāsō mamāpi hyadya rōcatē ॥12॥
kimagnau nipatāmyadya āhōsvidvaḍavāmukhē ।
śarīramiha sattvānāṁ dadmi sāgaravāsinām ॥13॥
kathaṁ nu jīvatā śakyō mayā draṣṭuṁ harīśvaraḥ।
tau vā puruṣaśārdūlau kāryasarvasvaghātinā ॥14॥
mayā khalu tadēvēdaṁ rōṣadōṣātpradarśitam ।
prathitaṁ triṣu lōkēṣu kapitvamanavasthitam ॥15॥
dhigastu rājasaṁ bhāvamanīśamanavasthitam ।
īśvarēṇāpi yadrāgānmayā sītā na rakṣitā ॥16॥
vinaṣṭāyāṁ tu sītāyāṁ tāvubhau vinaśiṣyataḥ।
tayōrvināśē sugrīvaḥ sabandhurvinaśiṣyati ॥17॥
ētadēva vacaḥ śrutvā bharatō bhrātr̥vatsalaḥ।
dharmātmā sahaśatrughnaḥ kathaṁ śakṣyati jīvitum ॥18॥
ikṣvākuvaṁśē dharmiṣṭhē gatē nāśamasaṁśayam ।
bhaviṣyanti prajāḥ sarvāḥ śōkasantāpapīḍitāḥ॥19॥
tadahaṁ bhāgyarahitō luptadharmārthasaṅgrahaḥ।
rōṣadōṣaparītātmā vyaktaṁ lōkavināśanaḥ॥20॥
iti cintayatastasya nimittānyupapēdirē ।
pūrvamapyupalabdhāni sākṣātpunaracintayat ॥21॥
atha vā cārusarvāṅgī rakṣitā svēna tējasā ।
na naśiṣyati kalyāṇī nāgniragnau pravartatē ॥22॥
nahi dharmātmanastasya bhāryāmamitatējasaḥ।
svacaritrābhiguptāṁ tāṁ spraṣṭumarhati pāvakaḥ॥23॥
nūnaṁ rāmaprabhāvēṇa vaidēhyāḥ sukr̥tēna ca ।
yanmāṁ dahanakarmāyaṁ nādahaddhavyavāhanaḥ॥24॥
trayāṇāṁ bharatādīnāṁ bhrātr̥̄ṇāṁ dēvatā ca yā ।
rāmasya ca manaḥkāntā sā kathaṁ vinaśiṣyati ॥25॥
yadvā dahanakarmāyaṁ sarvatra prabhuravyayaḥ।
na mē dahati lāṅgūlaṁ kathamāryāṁ pradhakṣyati ॥26॥
punaścācintayattatra hanumānvismitastadā ।
hiraṇyanābhasya girērjalamadhyē pradarśanam ॥27॥
tapasā satyavākyēna ananyatvācca bhartari ।
asau vinirdahēdagniṁ na tāmagniḥ pradhakṣyati ॥28॥
sa tathā cintayaṁstatra dēvyā dharmaparigraham ।
śuśrāva hanumāṁstatra cāraṇānāṁ mahātmanām ॥29॥
ahō khalu kr̥taṁ karma durvigāhaṁ hanūmatā ।
agniṁ visr̥jatā tīkṣṇaṁ bhīmaṁ rākṣasasadmani ॥30॥
prapalāyitarakṣaḥ strībālavr̥ddhasamākulā ।
janakōlāhalādhmātā krandantīvādrikandaraiḥ ॥31॥
dagdhēyaṁ nagarī laṅkā sāṭṭaprākāratōraṇā ।
jānakī na ca dagdhēti vismayō’dbhuta ēva naḥ॥32॥
iti śuśrāva hanumān vācaṁ tāmamr̥tōpamām ।
babhūva cāsya manasō harṣastatkālasambhavaḥ॥33॥
sa nimittaiśca dr̥ṣṭārthaiḥ kāraṇaiśca mahāguṇaiḥ।
r̥ṣivākyaiśca hanumānabhavatprītamānasaḥ॥34॥
tataḥ kapiḥ prāptamanōrathārtha-
	stāmakṣatāṁ rājasutāṁ viditvā ।
pratyakṣatastāṁ punarēva dr̥ṣṭvā
	pratiprayāṇāya matiṁ cakāra ॥35॥
ityārṣē śrīmadrāmāyaṇē vālmīkīyē ādikāvyē sundarakāṇḍē pañcapañcāśaḥ sargaḥ