atha ṣaṭpañcāśaḥ sargaḥ
tatastu śiṁśapāmūlē jānakīṁ paryavasthitām ।
abhivādyābravīddiṣṭyā paśyāmi tvāmihākṣatām ॥1॥
tatastaṁ prasthitaṁ sītā vīkṣamāṇā punaḥ punaḥ।
bhartr̥snēhānvitā vākyaṁ hanūmantamabhāṣata ॥2॥
yadi tvaṁ manyasē tāta vasaikāhamihānagha ।
kvacit susaṁvr̥tē dēśē viśrāntaḥ śvō gamiṣyasi ॥3॥
mama caivālpabhāgyāyāḥ sāṁnidhyāt tava vānara ।
śōkasyāsyāpramēyasya muhūrtaṁ syādapi kṣayaḥ॥4॥
gatē hi hariśārdūla punaḥ samprāptayē tvayi ।
prāṇēṣvapi na viśvāsō mama vānarapugaṁva ॥5॥
adarśanaṁ ca tē vīra bhūyō māṁ dārayiṣyati ।
duḥkhād duḥkhataraṁ prāptāṁ durmanaḥśōkakarśitām ॥6॥
ayaṁ ca vīra sandēhastiṣṭhatīva mamāgrataḥ।
sumahatsu sahāyēṣu haryr̥kṣēṣu mahābalaḥ॥7॥
kathaṁ nu khalu duṣpāraṁ santariṣyati sāgaram ।
tāni haryukṣasainyāni tau vā naravarātmajau ॥8॥
trayāṇāmēva bhūtānāṁ sāgarasyāpi laṅghanē ।
śaktiḥ syād vainatēyasya tava vā mārutasya vā ॥9॥
tadatra kāryanirbandhē samutpannē durāsadē ।
kiṁ paśyasi samādhānaṁ tvaṁ hi kāryaviśāradaḥ॥10॥
kāmamasya tvamēvaikaḥ kāryasya parisādhanē ।
paryāptaḥ paravīraghna yaśasyastē phalōdayaḥ॥11॥
balaistu saṅkulāṁ kr̥tvā laṅkāṁ parabalārdanaḥ।
māṁ nayēdyadi kākutsthastat tasya sadr̥śaṁ bhavēt ॥12॥
tadyathā tasya vikrāntamanurūpaṁ mahātmanaḥ।
bhavatyāhavaśūrasya tathā tvamupapādaya ॥13॥
tadarthōpahitaṁ vākyaṁ praśritaṁ hētusaṁhitam ।
niśamya hanumān vīrō vākyamuttaramabravīt ॥14॥
dēvi haryr̥kṣasainyānāmīśvaraḥ plavatāṁ varaḥ।
sugrīvaḥ sattvasampannastavārthē kr̥taniścayaḥ॥15॥
sa vānarasahasrāṇāṁ kōṭībhirabhisaṁvr̥taḥ।
kṣipramēṣyati vaidēhi sugrīvaḥ plavagādhipaḥ॥16॥
tau ca vīrau naravarau sahitau rāmalakṣmaṇau ।
āgamya nagarīṁ laṅkāṁ sāyakairvidhamiṣyataḥ॥17॥
sagaṇaṁ rākṣasaṁ hatvā nacirād raghunandanaḥ।
tvāmādāya varārōhē svāṁ purīṁ prati yāsyati ॥18॥
samāśvasihi bhadraṁ tē bhava tvaṁ kālakāṅkṣiṇī ।
kṣipraṁ drakṣyasi rāmēṇa nihataṁ rāvaṇaṁ raṇē ॥19॥
nihatē rākṣasēndrē ca saputrāmātyabāndhavē ।
tvaṁ samēṣyasi rāmēṇa śaśāṅkēnēva rōhiṇī ॥20॥
kṣipramēṣyati kākutsthō haryr̥kṣapravarairyutaḥ।
yastē yudhi vijityārīñchōkaṁ vyapanayiṣyati ॥21॥
ēvamāśvāsya vaidēhīṁ hanūmānmārutātmajaḥ।
gamanāya matiṁ kr̥tvā vaidēhīmabhyavādayat ॥22॥
rākṣasān pravarān hatvā nāma viśrāvya cātmanaḥ।
samāśvāsya ca vaidēhīṁ darśayitvā paraṁ balam ॥23॥
nagarīmākulāṁ kr̥tvā vañcayitvā ca rāvaṇam ।
darśayitvā balaṁ ghōraṁ vaidēhīmabhivādya ca ॥24॥
pratigantuṁ manaścakrē punarmadhyēna sāgaram ।
tataḥ sa kapiśārdūlaḥ svāmisandarśanōtsukaḥ॥25॥
ārurōha giriśrēṣṭhamariṣṭamarimardanaḥ।
tuṅgapadmakajuṣṭābhirnīlābhirvanarājibhiḥ॥26॥
sōttarīyamivāmbhōdaiḥ śr̥ṅgāntaravilambibhiḥ।
bōdhyamānamiva prītyā divākarakaraiḥ śubhaiḥ॥27॥
unmiṣantamivōddhūtairlōcanairiva dhātubhiḥ।
tōyaughaniḥsvanairmandraiḥ prādhītamiva parvatam ॥28॥
pragītamiva vispaṣṭaṁ nānāprasravaṇasvanaiḥ।
dēvadārubhiruddhūtairūrdhvabāhumiva sthitam ॥29॥
prapātajalanirghōṣaḥ prākruṣṭamiva sarvataḥ।
vēpamānamiva śyāmaiḥ kampamānaiḥ śaradvanaiḥ॥30॥
vēṇubhirmārutōddhūtaiḥ kūjantamiva kīcakaiḥ।
niḥśvasantamivāmarṣād ghōrairāśīviṣōttamaiḥ॥31॥
nīhārakr̥tagambhīrairdhyāyantamiva gahvaraiḥ।
mēghapādanibhaiḥ pādaiḥ prakrāntamiva sarvataḥ॥32॥
jr̥mbhamāṇamivākāśē śikharairabhramālibhiḥ।
kūṭaiśca bahudhā kīrṇaṁ śōbhitaṁ bahukandaraiḥ॥33॥
sālatālaiśca karṇaiśca vaṁśaiśca bahubhirvr̥tam ।
latāvitānairvitataiḥ puṣpavadbhiralaṅkr̥tam ॥34॥
nānāmr̥gagaṇaiḥ kīrṇaṁ dhātuniṣyandabhūṣitam ।
bahuprasravaṇōpētaṁ śilāsañcayasaṅkaṭam ॥35॥
maharṣiyakṣagandharvakiṁnarōragasēvitam ।
latāpādapasambādhaṁ siṁhādhiṣṭhitakandaram ॥36॥
vyāghrādibhiḥ samākīrṇaṁ svādumūlaphaladrumam ।
ārurōhānilasutaḥ parvataṁ plavagōttamaḥ॥37॥
rāmadarśanaśīghrēṇa praharṣēṇābhicōditaḥ।
tēna pādatalakrāntā ramyēṣu girisānuṣu ॥38॥
saghōṣāḥ samaśīryanta śilāścūrṇīkr̥tāstataḥ।
sa tamāruhya śailēndraṁ vyavardhata mahākapiḥ॥39॥
dakṣiṇāduttaraṁ pāraṁ prārthayam̐llavaṇāmbhasaḥ।
adhiruhya tatō vīraḥ parvataṁ pavanātmajaḥ॥40॥
dadarśa sāgaraṁ bhīmaṁ mīnōraganiṣēvitam ।
sa māruta ivākāśaṁ mārutasyātmasambhavaḥ॥41॥
prapēdē hariśārdūlō dakṣiṇāduttarāṁ diśam ।
sa tadā pīḍitastēna kapinā parvatōttamaḥ॥42॥
rarāsa vividhairbhūtaiḥ prāviśadvasudhātalam ।
kampamānaiśca śikharaiḥ patadbhirapi ca drumaiḥ॥43॥
tasyōruvēgōnmathitāḥ pādapāḥ puṣpaśālinaḥ।
nipēturbhūtalē bhagnāḥ śakrāyudhahatā iva ॥44॥
kandarōdarasaṁsthānāṁ pīḍitānāṁ mahaujasām ।
siṁhānāṁ ninadō bhīmō nabhō bhindan hi śuśruvē ॥45॥
trastavyāviddhavasanā vyākulīkr̥tabhūṣaṇāḥ।
vidyādharyaḥ samutpētuḥ sahasā dharaṇīdharāt ॥46॥
atipramāṇā balinō dīptajihvā mahāviṣāḥ।
nipīḍitaśirōgrīvā vyavēṣṭanta mahāhayaḥ॥47॥
kiṁnarōragagandharvayakṣavidyādharāstathā ।
pīḍitaṁ taṁ nagavaraṁ tyaktvā gaganamāsthitāḥ॥48॥
sa ca bhūmidharaḥ śrīmānbalinā tēna pīḍitaḥ।
savr̥kṣaśikharōdagraḥ pravivēśa rasātalam ॥49॥
daśayōjanavistārastriṁśadyōjanamucchritaḥ।
dharaṇyāṁ samatāṁ yātaḥ sa babhūva dharādharaḥ॥50॥
sa lilaṅghayiṣurbhīmaṁ salīlaṁ lavaṇārṇavam ।
kallōlāsphālavēlāntamutpapāta nabhō hariḥ॥51॥
ityārṣē śrīmadrāmāyaṇē vālmīkīyē ādikāvyē sundarakāṇḍē ṣaṭpañcāśaḥ sargaḥ