atha ēkōnaṣaṣṭitamaḥ sargaḥ
ētadākhyāya tatsarvaṁ hanūmānmārutātmajaḥ।
bhūyaḥ samupacakrāma vacanaṁ vaktumuttaram ॥1॥
saphalō rāghavōdyōgaḥ sugrīvasya ca sambhramaḥ।
śīlamāsādya sītāyā mama ca prīṇitaṁ manaḥ॥2॥
āryāyāḥ sadr̥śaṁ śīlaṁ sītāyāḥ plavagarṣabhāḥ।
tapasā dhārayēllōkānkruddhā vā nirdahēdapi ॥3॥
sarvathātiprakr̥ṣṭō’sau rāvaṇō rākṣasēśvaraḥ।
yasya tāṁ spr̥śatō gātraṁ tapasā na vināśitam ॥4॥
na tadagniśikhā kuryātsaṁspr̥ṣṭā pāṇinā satī ।
janakasya sutā kuryād yat krōdhakaluṣīkr̥tā ॥5॥
jāmbavatpramukhān sarvānanujñāpya mahākapīn ।
asminnēvaṅgatē kāryē bhavatāṁ ca nivēditē ।
nyāyyaṁ sma saha vaidēhyā draṣṭuṁ tau pārthivātmajau ॥6॥
ahamēkō’pi paryāptaḥ sarākṣasagaṇāṁ purīm ।
tāṁ laṅkāṁ tarasā hantuṁ rāvaṇaṁ ca mahābalam ॥7॥
kiṁ punaḥ sahitō vīrairbalavadbhiḥ kr̥tātmabhiḥ।
kr̥tāstraiḥ plavagaiḥ śaktairbhavardbhivijayaiṣibhiḥ॥8॥
ahaṁ tu rāvaṇaṁ yuddhē sasainyaṁ sapuraḥsaram ।
sahaputraṁ vadhiṣyāmi sahōdarayutaṁ yudhi ॥9॥
brāhmamastraṁ ca raudraṁ ca vāyavyaṁ vāruṇaṁ tathā ।
yadi śakrajitō’strāṇi durnirīkṣyāṇi saṁyugē ।
tānyahaṁ nihaniṣyāmi vidhamiṣyāmi rākṣasān ॥10॥
bhavatāmabhyanujñātō vikramō mē ruṇaddhi tam ।
mayātulā visr̥ṣṭā hi śailavr̥ṣṭirnirantarā ॥11॥
dēvānapi raṇē hanyātkiṁ punastānniśācarān ।
bhavatāmananujñātō vikramō mē ruṇaddhi mām ॥12॥
sāgarō’pyatiyādvēlāṁ mandaraḥ pracalēdapi ।
na jāmbavantaṁ samarē kampayēdarivāhinī ॥13॥
sarvarākṣasasaṅghānāṁ rākṣasā yē ca pūrvajāḥ।
alamēkō’pi nāśāya vīrō vālisutaḥ kapiḥ॥14॥
plavagasyōruvēgēna nīlasya ca mahātmanaḥ।
mandarō’pyavaśīryēta kiṁ punaryudhi rākṣasāḥ॥15॥
sadēvāsurayakṣēṣu gandharvōragapakṣiṣu ।
maindasya pratiyōddhāraṁ śaṁsata dvividasya vā ॥16॥
aśviputrau mahāvēgāvētau plavagasattamau ।
ētayōḥ pratiyōddhāraṁ na paśyāmi raṇājirē ॥17॥
mayaiva nihatā laṅkā dagdhā bhasmīkr̥tā purī ।
rājamārgēṣu sarvēṣu nāma viśrāvitaṁ mayā ॥18॥
jayatyatibalō rāmō lakṣmaṇaśca mahābalaḥ।
rājā jayati sugrīvō rāghavēṇābhipālitaḥ॥19॥
ahaṁ kōsalarājasya dāsaḥ pavanasambhavaḥ।
hanumāniti sarvatra nāma viśrāvitaṁ mayā ॥20॥
aśōkavanikāmadhyē rāvaṇasya durātmanaḥ।
adhastācchiṁśapāmūlē sādhvī karuṇamāsthitā ॥21॥
rākṣasībhiḥ parivr̥tā śōkasantāpakarśitā ।
mēgharēkhāparivr̥tā candrarēkhēva niṣprabhā ॥22॥
acintayantī vaidēhī rāvaṇaṁ baladarpitam ।
pativratā ca suśrōṇī avaṣṭabdhā ca jānakī ॥23॥
anuraktā hi vaidēhī rāmē sarvātmanā śubhā ।
ananyacittā rāmēṇa paulōmīva purandarē ॥24॥
tadēkavāsaḥsaṁvītā rajōdhvastā tathaiva ca ।
sā mayā rākṣasīmadhyē tarjyamānā muhurmuhuḥ॥25॥
rākṣasībhirvirūpābhirdr̥ṣṭā hi pramadāvanē ।
ēkavēṇīdharā dīnā bhartr̥cintāparāyaṇā ॥26॥
adhaḥśayyā vivarṇāṅgī padminīva himōdayē ।
rāvaṇādvinivr̥ttārthā martavyakr̥taniścayā ॥27॥
kathañcinmr̥gaśāvākṣī viśvāsamupapāditā ।
tataḥ sambhāṣitā caiva sarvamarthaṁ prakāśitā ॥28॥
rāmasugrīvasakhyaṁ ca śrutvā prītimupāgatā ।
niyataḥ samudācārō bhaktirbhartari cōttamā ॥29॥
yanna hanti daśagrīvaṁ sa mahātmā daśānanaḥ।
nimittamātraṁ rāmastu vadhē tasya bhaviṣyati ॥30॥
sā prakr̥tyaiva tanvaṅgī tadviyōgācca karśitā ।
pratipatpāṭhaśīlasya vidyēva tanutāṁ gatā ॥31॥
ēvamāstē mahābhāgā sītā śōkaparāyaṇā ।
yadatra pratikartavyaṁ tatsarvamupakalpyatām ॥32॥
ityārṣē śrīmadrāmāyaṇē vālmīkīyē ādikāvyē sundarakāṇḍē ēkōnaṣaṣṭitamaḥ sargaḥ