atha ṣaṣṭitamaḥ sargaḥ
tasya tadvacanaṁ śrutvā vālisūnurabhāṣata ।
aśviputrau mahāvēgau balavantau plavaṅgamau ॥1॥
pitāmahavarōtsēkāt paramaṁ darpamāsthitau ।
aśvinōrmānanārthaṁ hi sarvalōkapitāmahaḥ॥2॥
sarvāvadhyatvamatulamanayōrdattavānpurā ।
varōtsēkēna mattau ca pramathya mahatīṁ camūm ॥3॥
surāṇāmamr̥taṁ vīrau pītavantau mahābalau ।
ētāvēva hi saṅkruddhau savājirathakuñjarām ॥4॥
laṅkāṁ nāśayituṁ śaktau sarvē tiṣṭhantu vānarāḥ।
ahamēkō’pi paryāptaḥ sarākṣasagaṇāṁ purīm ॥5॥
tāṁ laṅkāṁ tarasā hantuṁ rāvaṇaṁ ca mahābalam ।
kiṁ punaḥ sahitō vīrairbalavadbhiḥ kr̥tātmabhiḥ॥6॥
kr̥tāstraiḥ plavagaiḥ śaktairbhavadbhirvijayaiṣibhiḥ।
vāyusūnōrbalēnaiva dagdhā laṅkēti naḥ śrutam ॥7॥
dr̥ṣṭvā dēvī na cānītā iti tatra nivēditum ।
na yuktamiva paśyāmi bhavadbhiḥ khyātapauruṣaiḥ॥8॥
nahi vaḥ plavanē kaścinnāpi kaścit parākramē ।
tulyaḥ sāmaradaityēṣu lōkēṣu harisattamāḥ॥9॥
jitvā laṅkāṁ sarakṣaughāṁ hatvā taṁ rāvaṇaṁ raṇē ।
sītāmādāya gacchāmaḥ siddhārthā hr̥ṣṭamānasāḥ॥10॥
tēṣvēvaṁ hatavīrēṣu rākṣasēṣu hanūmatā ।
kimanyadatra kartavyaṁ gr̥hītvā yāma jānakīm ॥11॥
rāmalakṣmaṇayōrmadhyē nyasyāma janakātmajām ।
kiṁ vyalīkaistu tān sarvān vānarān vānararṣabhān ॥12॥
vayamēva hi gatvā tān hatvā rākṣasapuṅgavān ।
rāghavaṁ draṣṭumarhāmaḥ sugrīvaṁ sahalakṣmaṇam ॥13॥
tamēvaṁ kr̥tasaṅkalpaṁ jāmbavānharisattamaḥ।
uvāca paramaprītō vākyamarthavadarthavit ॥14॥
naiṣā buddhirmahābuddhē yad bravīṣi mahākapē ।
vicētuṁ vayamājñaptā dakṣiṇāṁ diśamuttamām ॥15॥
nānētuṁ kapirājēna naiva rāmēṇa dhīmatā ।
kathañcinnirjitāṁ sītāmasmābhirnābhirōcayēt ॥16॥
rāghavō nr̥paśārdūlaḥ kulaṁ vyapadiśan svakam ।
pratijñāya svayaṁ rājā sītāvijayamagrataḥ॥17॥
sarvēṣāṁ kapimukhyānāṁ kathaṁ mithyā kariṣyati ।
viphalaṁ karma ca kr̥taṁ bhavēt tuṣṭirna tasya ca ॥18॥
vr̥thā ca darśitaṁ vīryaṁ bhavēd vānarapuṅgavāḥ।
tasmād gacchāma vai sarvē yatra rāmaḥ salakṣmaṇaḥ।
sugrīvaśca mahātējāḥ kāryasyāsya nivēdanē ॥19॥
na tāvadēṣā matirakṣamā nō
	yathā bhavānpaśyati rājaputra ।
yathā tu rāmasya matirniviṣṭā
	tathā bhavānpaśyatu kāryasiddhim ॥20॥
ityārṣē śrīmadrāmāyaṇē vālmīkīyē ādikāvyē sundarakāṇḍē ṣaṣṭitamaḥ sargaḥ