atha pañcaṣaṣṭitamaḥ sargaḥ
tataḥ prasravaṇaṁ śailaṁ tē gatvā citrakānanam ।
praṇamya śirasā rāmaṁ lakṣmaṇaṁ ca mahābalam ॥1॥
yuvarājaṁ puraskr̥tya sugrīvamabhivādya ca ।
pravr̥ttimatha sītāyāḥ pravaktumupacakramuḥ॥2॥
rāvaṇāntaḥpurē rōdhaṁ rākṣasībhiśca tarjanam ।
rāmē samanurāgaṁ ca yathā ca niyamaḥ kr̥taḥ॥3॥
ētadākhyāya tē sarvaṁ harayō rāmasaṁnidhau ।
vaidēhīmakṣatāṁ śrutvā rāmastūttaramabravīt ॥4॥
kva sītā vartatē dēvī kathaṁ ca mayi vartatē ।
ētanmē sarvamākhyāta vaidēhīṁ prati vānarāḥ॥5॥
rāmasya gaditaṁ śrutvā harayō rāmasaṁnidhau ।
cōdayanti hanūmantaṁ sītāvr̥ttāntakōvidam ॥6॥
śrutvā tu vacanaṁ tēṣāṁ hanūmānmārutātmajaḥ।
praṇamya śirasā dēvyai sītāyai tāṁ diśaṁ prati ॥7॥
uvāca vākyaṁ vākyajñaḥ sītāyā darśanaṁ yathā ।
taṁ maṇiṁ kāñcanaṁ divyaṁ dīpyamānaṁ svatējasā ॥8॥
datvā rāmāya hanumāṁstataḥ prāñjalirabravīt ।
samudraṁ laṅghayitvāhaṁ śatayōjanamāyatam ॥9॥
agacchaṁ jānakīṁ sītāṁ mārgamāṇō didr̥kṣayā ।
tatra laṅkēti nagarī rāvaṇasya durātmanaḥ॥10॥
dakṣiṇasya samudrasya tīrē vasati dakṣiṇē ।
tatra sītā mayā dr̥ṣṭā rāvaṇāntaḥpurē satī ॥11॥
tvayi saṁnyasya jīvantī rāmā rāma manōratham ।
dr̥ṣṭvā mē rākṣasīmadhyē tarjyamānā muhurmuhuḥ॥12॥
rākṣasībhirvirūpābhī rakṣitā pramadāvanē ।
duḥkhamāpadyatē dēvī tvayā vīra sukhōcitā ॥13॥
rāvaṇāntaḥpurē ruddhā rākṣasībhiḥ surakṣitā ।
ēkavēṇīdharā dīnā tvayi cintāparāyaṇā ॥14॥
adhaḥśayyā vivarṇāṅgī padminīva himāgamē ।
rāvaṇādvinivr̥ttārthā martavyakr̥taniścayā ॥15॥
dēvī kathañcitkākutstha tvanmanā mārgitā mayā ।
ikṣvākuvaṁśavikhyātiṁ śanaiḥ kīrtayatānagha ॥16॥
sā mayā naraśārdūla śanairviśvāsitā tadā ।
tataḥ sambhāṣitā dēvī sarvamarthaṁ ca darśitā ॥17॥
rāmasugrīvasakhyaṁ ca śrutvā harṣamupāgatā ।
niyataḥ samudācārō bhaktiścāsyāḥ sadā tvayi ॥18॥
ēvaṁ mayā mahābhāga dr̥ṣṭā janakanandinī ।
ugrēṇa tapasā yuktā tvadbhaktyā puruṣarṣabha ॥19॥
abhijñānaṁ ca mē dattaṁ yathāvr̥ttaṁ tavāntikē ।
citrakūṭē mahāprājña vāyasaṁ prati rāghava ॥20॥
vijñāpyaḥ punarapyēṣa rāmō vāyusuta tvayā ।
akhilēna yathā ddr̥ṣṭamiti māmāha jānakī ॥21॥
ayaṁ cāsmai pradātavyō yatnātsuparirakṣitaḥ।
bruvatā vacanānyēvaṁ sugrīvasyōpaśr̥ṇvataḥ॥22॥
ēṣa cūḍāmaṇiḥ śrīmānmayā tē yatnarakṣitaḥ।
manaḥśilāyāstilakaṁ tat smarasvēti cābravīt ॥23॥
ēṣa niryātitaḥ śrīmānmayā tē vārisambhavaḥ।
ēnaṁ dr̥ṣṭvā pramōdiṣyē vyasanē tvāmivānagha ॥24॥
jīvitaṁ dhārayiṣyāmi māsaṁ daśarathātmaja ।
ūrdhvaṁ māsānna jīvēyaṁ rakṣasāṁ vaśamāgatā ॥25॥
iti māmabravītsītā kr̥śāṅgī dharmacāriṇī ।
rāvaṇāntaḥpurē ruddhā mr̥gīvōtphullalōcanā ॥26॥
ētadēva mayā’’khyātaṁ sarvaṁ rāghava yadyathā ।
sarvathā sāgarajalē santāraḥ pravidhīyatām ॥27॥
tau jātāśvāsau rājaputrau viditvā
	taccābhijñānaṁ rāghavāya pradāya ।
dēvyā cākhyātaṁ sarvamēvānupūrvyād
	vācā sampūrṇaṁ vāyuputraḥ śaśaṁsa ॥28॥
ityārṣē śrīmadrāmāyaṇē vālmīkīyē ādikāvyē sundarakāṇḍē pañcaṣaṣṭitamaḥ sargaḥ