atha ṣaṭṣaṣṭitamaḥ sargaḥ
ēvamuktō hanumatā rāmō daśarathātmajaḥ।
taṁ maṇiṁ hr̥dayē kr̥tvā rurōda sahalakṣmaṇaḥ॥1॥
taṁ tu dr̥ṣṭvā maṇiśrēṣṭhaṁ rāghavaḥ śōkakarśitaḥ।
nētrābhyāmaśrupūrṇābhyāṁ sugrīvamidamabravīt ॥2॥
yathaiva dhēnuḥ sravati snēhād vatsasya vatsalā ।
tathā mamāpi hr̥dayaṁ maṇiśrēṣṭhasya darśanāt ॥3॥
maṇiratnamidaṁ dattaṁ vaidēhyāḥ śvaśurēṇa mē ।
vadhūkālē yathā baddhamadhikaṁ mūrdhni śōbhatē ॥4॥
ayaṁ hi jalasambhūtō maṇiḥ pravarapūjitaḥ।
yajñē paramatuṣṭēna dattaḥ śakrēṇa dhīmatā ॥5॥
imaṁ dr̥ṣṭvā maṇiśrēṣṭhaṁ tathā tātasya darśanam ।
adyāsmyavagataḥ saumya vaidēhasya tathā vibhōḥ॥6॥
ayaṁ hi śōbhatē tasyāḥ priyāyā mūrdhni mē maṇiḥ।
adyāsya darśanēnāhaṁ prāptāṁ tāmiva cintayē ॥7॥
kimāha sītā vaidēhī brūhi saumya punaḥ punaḥ।
parāsumiva tōyēna siñcantī vākyavāriṇā ॥8॥
itastu kiṁ duḥkhataraṁ yadimaṁ vārisambhavam ।
maṇiṁ paśyāmi saumitrē vaidēhīmāgatāṁ vinā ॥9॥
ciraṁ jīvati vaidēhī yadi māsaṁ dhariṣyati ।
kṣaṇaṁ vīra na jīvēyaṁ vinā tāmasitēkṣaṇām ॥10॥
naya māmapi taṁ dēśaṁ yatra dr̥ṣṭā mama priyā ।
na tiṣṭhēyaṁ kṣaṇamapi pravr̥ttimupalabhya ca ॥11॥
kathaṁ sā mama suśrōṇi bhīru bhīruḥ satī tadā ।
bhayāvahānāṁ ghōrāṇāṁ madhyē tiṣṭhati rakṣasām ॥12॥
śāradastimirōnmuktō nūnaṁ candra ivāmbudaiḥ।
āvr̥tō vadanaṁ tasyā na virājati sāmpratam ॥13॥
kimāha sītā hanumaṁstattvataḥ kathayasva mē ।
ētēna khalu jīviṣyē bhēṣajēnāturō yathā ॥14॥
madhurā madhurālāpā kimāha mama bhāminī ।
madvihīnā varārōhā hanumankathayasva mē ।
duḥkhādduḥkhataraṁ prāpya kathaṁ jīvati jānakī ॥15॥
ityārṣē śrīmadrāmāyaṇē vālmīkīyē ādikāvyē sundarakāṇḍē ṣaṭṣaṣṭitamaḥ sargaḥ