atha aṣṭaṣaṣṭitamaḥ sargaḥ
athāhamuttaraṁ dēvyā punaruktaḥ sasambhramam ।
tava snēhānnaravyāghra sauhārdādanumānya ca ॥1॥
ēvaṁ bahuvidhaṁ vācyō rāmō dāśarathistvayā ।
yathā māmāpnuyācchīghraṁ hatvā rāvaṇamāhavē ॥2॥
yadi vā manyasē vīra vasaikāhamarindama ।
kasmiṁścitsaṁvr̥tē dēśē viśrāntaḥ śvō gamiṣyasi ॥3॥
mama cāpyalpabhāgyāyāḥ sāṁnidhyāttava vānara ।
asya śōkavipākasya muhūrtaṁ syādvimōkṣaṇam ॥4॥
gatē hi tvayi vikrāntē punarāgamanāya vai ।
prāṇānāmapi sandēhō mama syānnātra saṁśayaḥ॥5॥
tavādarśanajaḥ śōkō bhūyō māṁ paritāpayēt ।
duḥkhādduḥkhaparābhūtāṁ durgatāṁ duḥkhabhāginīm ॥6॥
ayaṁ ca vīra sandēhastiṣṭhatīva mamāgrataḥ।
sumahāṁstvatsahāyēṣu haryr̥kṣēṣu harīśvara ॥7॥
kathaṁ nu khalu duṣpāraṁ tariṣyanti mahōdadhim ।
tāni haryr̥kṣasainyāni tau vā naravarātmajau ॥8॥
trayāṇāmēva bhūtānāṁ sāgarasyāsya laṅghanē ।
śaktiḥ syādvainatēyasya vāyōrvā tava cānagha ॥9॥
tadasminkāryaniryōgē vīraivaṁ duratikramē ।
kiṁ paśyasi samādhānaṁ brūhi kāryavidāṁ vara ॥10॥
kāmamasya tvamēvaikaḥ kāryasya parisādhanē ।
paryāptaḥ paravīraghna yaśasyastē balōdayaḥ॥11॥
balaiḥ samagrairyadi māṁ hatvā rāvaṇamāhavē ।
vijayī svapurīṁ rāmō nayēttatsyādyaśaskaram ॥12॥
yathāhaṁ tasya vīrasya vanādupadhinā hr̥tā ।
rakṣasā tadbhayādēva tathā nārhati rāghavaḥ॥13॥
balaistu saṅkulāṁ kr̥tvā laṅkāṁ parabalārdanaḥ।
māṁ nayēdyadi kākutsthastattasya sadr̥śaṁ bhavēt ॥14॥
tadyathā tasya vikrāntamanurūpaṁ mahātmanaḥ।
bhavatyāhavaśūrasya tathā tvamupapādaya ॥15॥
tadarthōpahitaṁ vākyaṁ praśritaṁ hētusaṁhitam ।
niśamyāhaṁ tataḥ śēṣaṁ vākyamuttaramabruvam ॥16॥
dēvi haryr̥kṣasainyānāmīśvaraḥ plavatāṁ varaḥ।
sugrīvaḥ sattvasampannastvadarthē kr̥taniścayaḥ॥17॥
tasya vikramasampannāḥ sattvavantō mahābalāḥ।
manaḥsaṅkalpasadr̥śā nidēśē harayaḥ sthitāḥ॥18॥
yēṣāṁ nōpari nādhastānna tiryaksajjatē gatiḥ।
na ca karmasu sīdanti mahatsvamitatējasaḥ॥19॥
asakr̥ttairmahābhāgairvānarairbalasaṁyutaiḥ।
pradakṣiṇīkr̥tā bhūmirvāyumārgānusāribhiḥ॥20॥
madviśiṣṭāśca tulyāśca santi tatra vanaukasaḥ।
mattaḥ pratyavaraḥ kaścinnāsti sugrīvasaṁnidhau ॥21॥
ahaṁ tāvadiha prāptaḥ kiṁ punastē mahābalāḥ।
nahi prakr̥ṣṭāḥ prēṣyantē prēṣyantē hītarē janāḥ॥22॥
tadalaṁ paritāpēna dēvi manyurapaitu tē ।
ēkōtpātēna tē laṅkāmēṣyanti hariyūthapāḥ॥23॥
mama pr̥ṣṭhagatau tau ca candrasūryāvivōditau ।
tvatsakāśaṁ mahābhāgē nr̥siṁhāvāgamiṣyataḥ॥24॥
arighnaṁ siṁhasaṅkāśaṁ kṣipraṁ drakṣyasi rāghavam ।
lakṣmaṇaṁ ca dhanuṣmantaṁ laṅkādvāramupāgatam ॥25॥
nakhadaṁṣṭrāyudhānvīrān siṁhaśārdūlavikramān ।
vānarān vāraṇēndrābhān kṣipraṁ drakṣyasi saṅgatān ॥26॥
śailāmbudanikāśānāṁ laṅkāmalayasānuṣu ।
nardatāṁ kapimukhyānāṁ nacirācchrōṣyasē svanam ॥27॥
nivr̥ttavanavāsaṁ ca tvayā sārdhamarindamam ।
abhiṣiktamayōdhyāyāṁ kṣipraṁ drakṣyasi rāghavam ॥28॥
tatō mayā vāgbhiradīnabhāṣiṇā
	śivābhiriṣṭābhirabhiprasāditā ।
uvāha śāntiṁ mama maithilātmajā
	tavātiśōkēna tathātipīḍitā ॥29॥
ityārṣē śrīmadrāmāyaṇē vālmīkīyē ādikāvyē sundarakāṇḍē aṣṭaṣaṣṭitamaḥ sargaḥ