અથ ધ્યાનશ્લોકાઃ
શુક્લામ્બરધરં વિષ્ણું શશિવર્ણં ચતુર્ભુજમ્ ।
પ્રસન્નવદનં ધ્યાયેત્ સર્વવિઘ્નોપશાન્તયે ॥
વાગીશાદ્યાઃ સુમનસઃ સર્વાર્થાનામુપક્રમે ।
યં નત્વા કૃતકૃત્યાઃ સ્યુસ્તં નમામિ ગજાનનમ્ ॥
દોર્ભિર્યુક્તા ચતુર્ભિઃ સ્ફટિકમણિમયીમક્ષમાલાં દધાના
હસ્તેનૈકેન પદ્મં સિતમપિ ચ શુકં પુસ્તકં ચાપરેણ ।
ભાસા કુન્દેન્દુશઙ્ખસ્ફટિકમણિનિભા ભાસમાનાસમાના
સા મે વાગ્દેવતેયં નિવસતુ વદને સર્વદા સુપ્રસન્ના ॥
ગુરુર્બ્રહ્મા ગુરુર્વિષ્ણુઃ ગુરુર્દેવો મહેશ્વરઃ ।
ગુરુઃ સાક્ષાત્ પરં બ્રહ્મ તસ્મૈ શ્રીગુરવે નમઃ ॥
કૂજન્તં રામરામેતિ મધુરં મધુરાક્ષરમ્ ।
આરુહ્ય કવિતાશાખાં વન્દે વાલ્મીકિકોકિલમ્ ॥
વાલ્મીકેર્મુનિસિમ્હસ્ય કવિતાવનચારિણઃ ।
શૃણ્વન્ રામકથાનાદં કો ન યાતિ પરાં ગતિમ્ ॥
યઃ પિબન્ સતતં રામચરિતામૃતસાગરમ્ ।
અતૃપ્તસ્તં મુનિં વન્દે પ્રાચેતસમકલ્મષમ્ ॥
ગોષ્પદીકૃતવારાશિં મશકીકૃતરાક્ષસમ્ ।
રામાયણમહામાલારત્નં વન્દેઽનિલાત્મજમ્ ॥
અઞ્જનાનન્દનં વીરં જાનકીશોકનાશનમ્ ।
કપીશમક્ષહન્તારં વન્દે લઙ્કાભયઙ્કરમ્ ॥
ઉલ્લઙ્્ઘ્ય સિન્ધોઃ સલિલં સલીલં
	યઃ શોકવહ્નિં જનકાત્મજાયાઃ ।
આદાય તેનૈવ દદાહ લઙ્કાં
	નમામિ તં પ્રાઞ્જલિરાઞ્જનેયમ્ ॥
આઞ્જનેયમતિપાટલાનનં કાઞ્ચનાદ્રિકમનીયવિગ્રહમ્ ।
પારિજાતતરુમૂલવાસિનં ભાવયામિ પવમાનનન્દનમ્ ॥
યત્ર યત્ર રઘુનાથકીર્તનં તત્ર તત્ર કૃતમસ્તકાઞ્જલિમ્ ।
બાષ્પવારિપરિપૂર્ણલોચનં મારુતિં નમત રાક્ષસાન્તકમ્ ॥
મનોજવં મારુતતુલ્યવેગં જિતેન્દ્રિયં બુદ્ધિમતાં વરિષ્ઠમ્ ।
વાતાત્મજં વાનરયૂથમુખ્યં શ્રીરામદૂતં શિરસા નમામિ ॥
યઃ કર્ણાઞ્જલિસમ્પુટૈરહરહઃ સમ્યક્ પિબત્યાદરાત્
વાલ્મીકેર્વદનારવિન્દગલિતં રામાયણાખ્યં મધુ ।
જન્મવ્યાધિજરાવિપત્તિમરણૈરત્યન્તસોપદ્રવં
સંસારં સ વિહાય ગચ્છતિ પુમાન્ વિષ્ણોઃ પદં શાશ્વતમ્ ॥
તદુપગતસમાસસન્ધિયોગં સમમધુરોપનતાર્થવાક્યબદ્ધમ્ ।
રઘુવરચરિતં મુનિપ્રણીતં દશશિરસશ્ચ વધં નિશામયધ્વમ્ ॥
વાલ્મીકિગિરિસમ્ભૂતા રામસાગરગામિની ।
પુનાતુ ભુવનં પુણ્યા રામાયણમહાનદી ॥
શ્લોકસારસમાકીર્ણં સર્ગકલ્લોલસઙ્કુલમ્ ।
કાણ્ડગ્રાહમહામીનં વન્દે રામાયણાર્ણવમ્ ॥
વેદવેદ્યે પરે પુંસિ જાતે દશરથાત્મજે ।
વેદઃ પ્રાચેતસાદાસીત્ સાક્ષાદ્રામાયણાત્મના ॥
વૈદેહીસહિતં સુરદ્રુમતલે હૈમે મહામણ્ટપે
મધ્યે પુષ્પકમાસને મણિમયે વીરાસને સુસ્થિતમ્ ।
અગ્રે વાચયતિ પ્રભઞ્જનસુતે તત્ત્વં મુનિભ્યઃ પરં
વ્યાખ્યાન્તં ભરતાદિભિઃ પરિવૃતં રામં ભજે શ્યામલમ્ ॥
વામે ભૂમિસુતા પુરશ્ચ હનુમાન્ પશ્ચાત્ સુમિત્રાસુતઃ
શત્રુઘ્નો ભરતશ્ચ પાર્શ્વદલયોર્વાય્વાદિકોણેષુ ચ ।
સુગ્રીવશ્ચ વિભીષણશ્ચ યુવરાટ્ તારાસુતો જામ્બવાન્
મધ્યે નીલસરોજકોમલરુચિં રામં ભજે શ્યામલમ્ ॥
નમોઽસ્તુ રામાય સલક્ષ્મણાય
	દેવ્યૈ ચ તસ્યૈ જનકાત્મજાયૈ ।
નમોઽસ્તુ રુદ્રેન્દ્રયમાનિલેભ્યો
	નમોઽસ્તુ ચન્દ્રાર્કમરુદ્ગણેભ્યઃ ॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે ધ્યાનશ્લોકાઃ