અથ મઙ્ગલશ્લોકાઃ
સ્વસ્તિ પ્રજાભ્યઃ પરિપાલયન્તાં
	ન્યાય્યેન માર્ગેણ મહીં મહીશાઃ ।
ગોબ્રાહ્મણેભ્યઃ શુભમસ્તુ નિત્યં
	લોકાઃ સમસ્તાઃ સુખિનો ભવન્તુ ॥
કાલે વર્ષતુ પર્જન્યઃ પૃથિવી સસ્યશાલિની ।
દેશોઽયં ક્ષોભરહિતો બ્રાહ્મણાઃ સન્તુ નિર્ભયાઃ ॥
અપુત્રાઃ પુત્રિણઃ સન્તુ પુત્રિણઃ સન્તુ પૌત્રિણઃ ।
અધનાઃ સધનાઃ સન્તુ જીવન્તુ શરદાં શતમ્ ॥
ચરિતં રઘુનાથસ્ય શતકોટિપ્રવિસ્તરમ્ ।
એકૈકમક્ષરં પ્રોક્તં મહાપાતકનાશનમ્ ॥
શ્રૃણ્વન્ રામાયણં ભક્ત્યા યઃ પાદં પદમેવ વા ।
સ યાતિ બ્રહ્મણઃ સ્થાનં બ્રહ્મણા પૂજ્યતે સદા ॥
રામાય રામભદ્રાય રામચન્દ્રાય વેધસે ।
રઘુનાથાય નાથાય સીતાયાઃ પતયે નમઃ ॥
યન્મઙ્ગલં સહસ્રાક્ષે સર્વદેવનમસ્કૃતે ।
વૃત્રનાશે સમભવત્તત્તે ભવતુ મઙ્ગલમ્ ॥
યન્મઙ્ગલં સુપર્ણસ્ય વિનતાકલ્પયત્ પુરા ।
અમૃતં પ્રાર્થયાનસ્ય તત્તે ભવતુ મઙ્ગલમ્ ॥
મઙ્ગલં કોસલેન્દ્રાય મહનીયગુણાત્મને ।
ચક્રવર્તિતનૂજાય સાર્વભૌમાય મઙ્ગલમ્ ॥
અમૃતોત્પાદને દૈત્યાન્ ઘ્નતો વજ્રધરસ્ય યત્ ।
અદિતિર્મઙ્ગલં પ્રાદાત્તત્તે ભવતુ મઙ્ગલમ્ ॥
ત્રીન્ વિક્રમાન્ પ્રક્રમતો વિષ્ણોરમિતતેજસઃ ।
યદાસીન્મઙ્ગલં રામ તત્તે ભવતુ મઙ્ગલમ્ ॥
ઋષયઃ સાગરા દ્વીપા વેદા લોકા દિશશ્ચ તે ।
મઙ્ગલાનિ મહાબાહો દિશન્તુ તવ સર્વદા ॥
કાયેન વાચા મનસેન્દ્રિયૈર્વા
	બુદ્ધ્યાત્મના વા પ્રકૃતેઃ સ્વભાવાત્ ।
કરોમિ યદ્ યત્ સકલં પરસ્મૈ
	નારાયણાયેતિ સમર્પયામિ ॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે મઙ્ગલશ્લોકાઃ