અથ ચતુર્થઃ સર્ગઃ
સ નિર્જિત્ય પુરીં લઙ્કાં શ્રેષ્ઠાં તાં કામરૂપિણીમ્ ।
વિક્રમેણ મહાતેજા હનુમાન્ કપિસત્તમઃ॥૧॥
અદ્વારેણ મહાવીર્યઃ પ્રાકારમવપુપ્લુવે ।
નિશિ લઙ્કાં મહાસત્ત્વો વિવેશ કપિકુઞ્જરઃ॥૨॥
પ્રવિશ્ય નગરીં લઙ્કાં કપિરાજહિતઙ્કરઃ।
ચક્રેઽથ પાદં સવ્યં ચ શત્રૂણાં સ તુ મૂર્ધનિ ॥૩॥
પ્રવિષ્ટઃ સત્ત્વસમ્પન્નો નિશાયાં મારુતાત્મજઃ।
સ મહાપથમાસ્થાય મુક્તપુષ્પવિરાજિતમ્ ॥૪॥
તતસ્તુ તાં પુરીં લઙ્કાં રમ્યામભિયયૌ કપિઃ।
હસિતોત્કૃષ્ટનિનદૈસ્તૂર્યઘોષપુરસ્કૃતૈઃ॥૫॥
વજ્રાઙ્કુશનિકાશૈશ્ચ વજ્રજાલવિભૂષિતૈઃ।
ગૃહમેધૈઃ પુરી રમ્યા બભાસે દ્યૌરિવામ્બુદૈઃ॥૬॥
પ્રજજ્વાલ તદા લઙ્કા રક્ષોગણગૃહૈઃ શુભૈઃ।
સિતાભ્રસદૃશૈશ્ચિત્રૈઃ પદ્મસ્વસ્તિકસંસ્થિતૈઃ॥૭॥
વર્ધમાનગૃહૈશ્ચાપિ સર્વતઃ સુવિભૂષિતૈઃ।
તાં ચિત્રમાલ્યાભરણાં કપિરાજહિતઙ્કરઃ॥૮॥
રાઘવાર્થે ચરન્ શ્રીમાન્ દદર્શ ચ નનન્દ ચ ।
ભવનાદ્ભવનં ગચ્છન્ દદર્શ કપિકુઞ્જરઃ॥૯॥
વિવિધાકૃતિરૂપાણિ ભવનાનિ તતસ્તતઃ।
શુશ્રાવ રુચિરં ગીતં ત્રિસ્થાનસ્વરભૂષિતમ્ ॥૧૦॥
સ્ત્રીણાં મદનવિદ્ધાનાં દિવિ ચાપ્સરસામિવ ।
શુશ્રાવ કાઞ્ચીનિનદં નૂપુરાણાં ચ નિઃસ્વનમ્ ॥૧૧॥
સોપાનનિનદાંશ્ચાપિ ભવનેષુ મહાત્મનામ્ ।
આસ્ફોટિતનિનાદાંશ્ચ ક્ષ્વેડિતાંશ્ચ તતસ્તતઃ॥૧૨॥
શુશ્રાવ જપતાં તત્ર મન્ત્રાન્ રક્ષોગૃહેષુ વૈ ।
સ્વાધ્યાય નિરતાંશ્ચૈવ યાતુધાનાન્દદર્શ સઃ॥૧૩॥
રાવણસ્તવસંયુક્તાન્ગર્જતો રાક્ષસાનપિ ।
રાજમાર્ગં સમાવૃત્ય સ્થિતં રક્ષોગણં મહત્ ॥૧૪॥
દદર્શ મધ્યમે ગુલ્મે રાક્ષસસ્ય ચરાન્ બહૂન્ ।
દીક્ષિતાન્ જટિલાન્ મુણ્ડાન્ ગોજિનામ્બરવાસસઃ॥૧૫॥
દર્ભમુષ્ટિપ્રહરણાનગ્નિકુણ્ડાયુધાંસ્તથા ।
કૂટમુદ્ગરપાણીંશ્ચ દણ્ડાયુધધરાનપિ ॥૧૬॥
એકાક્ષાનેકવર્ણાંશ્ચ લમ્બોદરપયોધરાન્ ।
કરાલાન્ભુગ્નવક્ત્રાંશ્ચ વિકટાન્વામનાંસ્તથા ॥૧૭॥
ધન્વિનઃ ખડ્ગિનશ્ચૈવ શતઘ્ની મુસલાયુધાન્ ।
પરિઘોત્તમહસ્તાંશ્ચ વિચિત્રકવચોજ્જ્વલાન્ ॥૧૮॥
નાતિસ્તૂલાન્ નાતિકૃશાન્ નાતિદીર્ઘાતિહ્રસ્વકાન્ ।
નાતિગૌરાન્ નાતિકૃષ્ણાન્નાતિકુબ્જાન્ન વામનાન્ ॥૧૯॥
વિરૂપાન્બહુરૂપાંશ્ચ સુરૂપાંશ્ચ સુવર્ચસઃ।
પતાકિનશ્ચધ્વજિનો દદર્શ વિવિધાયુધાન્ ॥૨૦॥
શક્તિવૃક્ષાયુધાંશ્ચૈવ પટ્ટિશાશનિધારિણઃ।
ક્ષેપણીપાશહસ્તાંશ્ચ દદર્શ સ મહાકપિઃ॥૨૧॥
સ્રગ્વિણસ્ત્વનુલિપ્તાંશ્ચ વરાભરણભૂષિતાન્ ।
નાનવેષસમાયુક્તાન્ યથાસ્વૈરચરાન્ બહૂન્ ॥૨૨॥
તીક્ષ્ણશૂલધરાંશ્ચૈવ વજ્રિણશ્ચ મહાબલાન્ ।
શતસાહસ્રમવ્યગ્રમારક્ષં મધ્યમં કપિઃ॥૨૩॥
રક્ષોઽધિપતિનિર્દિષ્ટં દદર્શાન્તઃ પુરાગ્રતઃ।
સ તદા તદ્ ગૃહં દૃષ્ટ્વા મહાહાટકતોરણમ્ ॥૨૪॥
રાક્ષસેન્દ્રસ્ય વિખ્યાતમદ્રિમૂર્ધ્નિ પ્રતિષ્ઠિતમ્ ।
પુણ્ડરીકાવતંસાભિઃ પરિખાભિઃ સમાવૃતમ્ ॥૨૫॥
પ્રાકારાવૃતમત્યન્તં દદર્શ સ મહાકપિઃ।
ત્રિવિષ્ટપનિભં દિવ્યં દિવ્યનાદવિનાદિતમ્ ॥૨૬॥
વાજિહ્રેષિતસઙ્ઘુષ્ટં નાદિતં ભૂષણૈસ્તથા ।
રથૈર્યાનૈર્વિમાનૈશ્ચ તથા હયગજૈઃ શુભૈઃ॥૨૭॥
વારણૈશ્ચ ચતુર્દન્તૈઃ શ્વેતાભ્રનિચયોપમૈઃ।
ભૂષિતૈ રુચિરદ્વારં મત્તૈશ્ચ મૃગપક્ષિભિઃ॥૨૮॥
રક્ષિતં સુમહાવીર્યૈર્યાતુધાનૈઃ સહસ્રશઃ।
રાક્ષસાધિપતેર્ગુપ્તમાવિવેશ ગૃહં કપિઃ॥૨૯॥
સ હેમજામ્બૂનદચક્રવાલં
	મહાર્હમુક્તામણિ ભૂષિતાન્તમ્્ ।
પરાર્ધ્યકાલાગુરુચન્દનાર્હં
	સ રાવણાન્તઃ પુરમાવિવેશ ॥૩૦॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે ચતુર્થઃ સર્ગઃ