અથ સપ્તમઃ સર્ગઃ સ વેશ્મજાલં બલવાન્દદર્શ વ્યાસક્તવૈદૂર્યસુવર્ણજાલમ્ । યથા મહત્પ્રાવૃષિ મેઘજાલં વિદ્યુત્પિનદ્ધં સવિહઙ્ગજાલમ્ ॥૧॥ નિવેશનાનાં વિવિધાશ્ચ શાલાઃ પ્રધાનશઙ્ખાયુધચાપશાલાઃ। મનોહરાશ્ચાપિ પુનર્વિશાલા દદર્શ વેશ્માદ્રિષુ ચન્દ્રશાલાઃ॥૨॥ ગૃહાણિ નાનાવસુરાજિતાનિ દેવાસુરૈશ્ચાપિ સુપૂજિતાનિ । સર્વૈશ્ચ દોષૈઃ પરિવર્જિતાનિ કપિર્દદર્શ સ્વબલાર્જિતાનિ ॥૩॥ તાનિ પ્રયત્નાભિસમાહિતાનિ મયેન સાક્ષાદિવ નિર્મિતાનિ । મહીતલે સર્વગુણોત્તરાણિ દદર્શ લઙ્કાધિપતેર્ગૃહાણિ ॥૪॥ તતો દદર્શોચ્છ્રિતમેઘરૂપં મનોહરં કાઞ્ચનચારુરૂપમ્ । રક્ષોઽધિપસ્યાત્મબલાનુરૂપં ગૃહોત્તમં હ્યપ્રતિરૂપરૂપમ્ ॥૫॥ મહીતલે સ્વર્ગમિવ પ્રકીર્ણં શ્રિયા જ્વલન્તં બહુરત્નકીર્ણમ્ । નાનાતરૂણાં કુસુમાવકીર્ણં ગિરેરિવાગ્રં રજસાવકીર્ણમ્ ॥૬॥ નારીપ્રવેકૈરિવ દીપ્યમાનં તડિદ્ભિરમ્ભોધરમર્ચ્યમાનમ્ । હંસપ્રવેકૈરિવ વાહ્યમાનં શ્રિયા યુતં ખે સુકૃતં વિમાનમ્ ॥૭॥ યથા નગાગ્રં બહુધાતુચિત્રં યથા નભશ્ચ ગ્રહચન્દ્રચિત્રમ્ । દદર્શ યુક્તીકૃતચારુમેઘ- ચિત્રં વિમાનં બહુરત્નચિત્રમ્ ॥૮॥ મહી કૃતા પર્વતરાજિપૂર્ણા શૈલાઃ કૃતા વૃક્ષવિતાનપૂર્ણાઃ। વૃક્ષાઃ કૃતાઃ પુષ્પવિતાનપૂર્ણાઃ પુષ્પં કૃતં કેસરપત્રપૂર્ણમ્ ॥૯॥ કૃતાનિ વેશ્માનિ ચ પાણ્ડુરાણિ તથા સુપુષ્પાણ્યપિ પુષ્કરાણિ । પુનશ્ચ પદ્માનિ સકેસરાણિ વનાનિ ચિત્રાણિ સરોવરાણિ ॥૧૦॥ પુષ્પાહ્વયં નામ વિરાજમાનં રત્નપ્રભાભિશ્ચ વિઘૂર્ણમાનમ્ । વેશ્મોત્તમાનામપિ ચોચ્ચમાનં મહાકપિસ્તત્ર મહાવિમાનમ્ ॥૧૧॥ કૃતાશ્ચ વૈદૂર્યમયા વિહઙ્ગા રૂપ્યપ્રવાલૈશ્ચ તથા વિહઙ્ગાઃ। ચિત્રાશ્ચ નાનાવસુભિર્ભુજઙ્ગા જાત્યાનુરૂપાસ્તુરગાઃ શુભાઙ્ગાઃ॥૧૨॥ પ્રવાલજામ્બૂનદપુષ્પપક્ષાઃ સલીલમાવર્જિતજિહ્મપક્ષાઃ। કામસ્ય સાક્ષાદિવ ભાન્તિ પક્ષાઃ કૃતા વિહઙ્ગાઃ સુમુખાઃ સુપક્ષાઃ॥૧૩॥ નિયુજ્યમાનાશ્ચ ગજાઃ સુહસ્તાઃ સકેસરાશ્ચોત્પલપત્રહસ્તાઃ। બભૂવ દેવી ચ કૃતાસુહસ્તા લક્ષ્મીસ્તથા પદ્મિનિ પદ્મહસ્તા ॥૧૪॥ ઇતીવ તદ્ગૃહમભિગમ્ય શોભનં સવિસ્મયો નગમિવ ચારુકન્દરં । પુનશ્ચ તત્પરમસુગન્ધિ સુન્દરં હિમાત્યયે નગમિવ ચારુકન્દરં ॥૧૫॥ તતઃ સ તાં કપિરભિપત્ય પૂજિતાં ચરન્પુરીં દશમુખબાહુપાલિતામ્ । અદૃશ્ય તાં જનકસુતાં સુપૂજિતાં સુદુઃખિતાં પતિગુણવેગનિર્જિતામ્ ॥૧૬॥ તતસ્તદા બહુવિધભાવિતાત્મનઃ કૃતાત્મનો જનકસુતાં સુવર્ત્મનઃ। અપશ્યતોઽભવદતિદુઃખિતં મનઃ સચક્ષુષઃ પ્રવિચરતો મહાત્મનઃ॥૧૭॥ ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે સપ્તમઃ સર્ગઃ