અથ અષ્ટમઃ સર્ગઃ સ તસ્ય મધ્યે ભવનસ્ય સંસ્થિતો મહદ્વિમાનં મણિરત્નચિત્રિતમ્ । પ્રતપ્તજામ્બૂનદજાલકૃત્રિમં દદર્શ ધીમાન્ પવનાત્મજઃ કપિઃ॥૧॥ તદપ્રમેયપ્રતિકારકૃત્રિમં કૃતં સ્વયં સાધ્વિતિ વિશ્વકર્મણા । દિવં ગતે વાયુપથે પ્રતિષ્ઠિતં વ્યરાજતાદિત્યપથસ્ય લક્ષ્મ તત્ ॥૨॥ ન તત્ર કિઞ્ચિન્ન કૃતં પ્રયત્નતો ન તત્ર કિઞ્ચિન્ન મહાર્હરત્નવત્ । ન તે વિશેષા નિયતાઃ સુરેષ્વપિ ન તત્ર કિઞ્ચિન્ન મહાવિશેષવત્ ॥૩॥ તપઃ સમાધાનપરાક્રમાર્જિતં મનઃ સમાધાનવિચારચારિણમ્ । અનેકસંસ્થાનવિશેષનિર્મિતં તતસ્તતસ્તુલ્યવિશેષનિર્મિતમ્ ॥૪॥ મનઃ સમાધાય તુ શીઘ્રગામિનં દુરાસદં મારુતતુલ્યગામિનમ્ । મહાત્મનાં પુણ્યકૃતાં મહર્દ્ધિનાં યશસ્વિનામગ્ર્યમુદામિવાલયમ્ ॥૫॥ વિશેષમાલમ્બ્ય વિશેષસંસ્થિતં વિચિત્રકૂટં બહુકૂટમણ્ડિતમ્ । મનોઽભિરામં શરદિન્દુનિર્મલં વિચિત્રકૂટં શિખરં ગિરેર્યથા ॥૬॥ વહન્તિ યત્કુણ્ડલશોભિતાનના મહાશના વ્યોમચરાનિશાચરાઃ। વિવૃત્તવિધ્વસ્તવિશાલલોચના મહાજવા ભૂતગણાઃ સહસ્રશઃ॥૭॥ વસન્તપુષ્પોત્કરચારુદર્શનં વસન્તમાસાદપિ ચારુદર્શનમ્ । સ પુષ્પકં તત્ર વિમાનમુત્તમં દદર્શ તદ્વાનરવીરસત્તમઃ॥૮॥ ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે અષ્ટમઃ સર્ગઃ