અથ દ્વાદશઃ સર્ગઃ
સ તસ્ય મધ્યે ભવનસ્ય સંસ્થિતો
	લતાગૃહાંશ્ચિત્રગૃહાન્નિશાગૃહાન્ ।
જગામ સીતાં પ્રતિદર્શનોત્સુકો
	ન ચૈવ તાં પશ્યતિ ચારુદર્શનામ્ ॥૧॥
સ ચિન્તયામાસ તતો મહાકપિઃ
	પ્રિયામપશ્યન્રઘુનન્દનસ્ય તામ્ ।
ધ્રુવં ન સીતા ધ્રિયતે યથા ન મે
	વિચિન્વતો દર્શનમેતિ મૈથિલી ॥૨॥
સા રાક્ષસાનાં પ્રવરેણ જાનકી
	સ્વશીલસંરક્ષણતત્પરા સતી ।
અનેન નૂનં પ્રતિ દુષ્ટકર્મણા
	હતા ભવેદાર્યપથે પરે સ્થિતા ॥૩॥
વિરૂપરૂપા વિકૃતા વિવર્ચસો
	મહાનના દીર્ઘવિરૂપદર્શનાઃ।
સમીક્ષ્ય તા રાક્ષસરાજયોષિતો
	ભયાદ્વિનષ્ટા જનકેશ્વરાત્મજા ॥૪॥
સીતામદૃષ્ટ્વા હ્યનવાપ્ય પૌરુષં
	વિહૃત્ય કાલં સહ વાનરૈશ્ચિરમ્ ।
ન મેઽસ્તિ સુગ્રીવસમીપગા ગતિઃ
	સુતીક્ષ્ણદણ્ડો બલવાંશ્ચ વાનરઃ॥૫॥
દૃષ્ટમન્તઃપુરં સર્વં દૃષ્ટા રાવણયોષિતઃ।
ન સીતા દૃશ્યતે સાધ્વી વૃથા જાતો મમ શ્રમઃ॥૬॥
કિં નુ માં વાનરાઃ સર્વે ગતં વક્ષ્યન્તિ સઙ્ગતાઃ।
ગત્વા તત્ર ત્વયા વીર કિં કૃતં તદ્વદસ્વ નઃ॥૭॥
અદૃષ્ટ્વા કિં પ્રવક્ષ્યામિ તામહં જનકાત્મજામ્ ।
ધ્રુવં પ્રાયમુપાસિષ્યે કાલસ્ય વ્યતિવર્તને ॥૮॥
કિં વા વક્ષ્યતિ વૃદ્ધશ્ચ જામ્બવાનઙ્ગદશ્ચ સઃ।
ગતં પારં સમુદ્રસ્ય વાનરાશ્ચ સમાગતાઃ॥૯॥
અનિર્વેદઃ શ્રિયો મૂલમનિર્વેદઃ પરં સુખમ્ ।
અનિર્વેદો હિ સતતં સર્વાર્થેષુ પ્રવર્તકઃ॥૧૦॥
કરોતિ સફલં જન્તોઃ કર્મ યચ્ચ કરોતિ સઃ।
તસ્માદનિર્વેદકરં યત્નં ચેષ્ટેઽહમુત્તમમ્ ॥૧૧॥
ભૂયસ્તત્ર વિચેષ્યામિ ન યત્ર વિચયઃ કૃતઃ।
અદૃષ્ટાંશ્ચ વિચેષ્યામિ દેશાન્રાવણપાલિતાન્ ॥૧૨॥
આપાનશાલા વિચિતાસ્તથા પુષ્પગૃહાણિ ચ ।
ચિત્રશાલાશ્ચ વિચિતા ભૂયઃ ક્રીડાગૃહાણિ ચ ॥૧૩॥
નિષ્કુટાન્તરરથ્યાશ્ચ વિમાનાનિ ચ સર્વશઃ।
ઇતિ સઞ્ચિન્ત્ય ભૂયોઽપિ વિચેતુમુપચક્રમે ॥૧૪॥
ભૂમીગૃહાંશ્ચૈત્યગૃહાન્ગૃહાતિગૃહકાનપિ ।
ઉત્પતન્નિપતંશ્ચાપિ તિષ્ઠન્ગચ્છન્પુનઃ ક્વચિત્ ॥૧૫॥
અપવૃણ્વંશ્ચ દ્વારાણિ કપાટાન્યવઘટ્ટયન્ ।
પ્રવિશન્નિષ્પતંશ્ચાપિ પ્રપતન્નુત્પતન્નિવ ॥૧૬॥
સર્વમપ્યવકાશં સ વિચચાર મહાકપિઃ।
ચતુરઙ્ગુલમાત્રોઽપિ નાવકાશઃ સ વિદ્યતે ।
રાવણાન્તઃપુરે તસ્મિન્યં કપિર્ન જગામ સઃ॥૧૭॥
પ્રાકરાન્તરવીથ્યશ્ચ વેદિકશ્ચૈત્યસંશ્રયાઃ।
શ્વભ્રાશ્ચ પુષ્કરિણ્યશ્ચ સર્વં તેનાવલોકિતમ્ ॥૧૮॥
રાક્ષસ્યો વિવિધાકારા વિરૂપા વિકૃતાસ્તથા ।
દૃષ્ટા હનુમતા તત્ર ન તુ સા જનકાત્મજા ॥૧૯॥
રૂપેણાપ્રતિમા લોકે પરા વિદ્યાધરસ્ત્રિયઃ।
દૃષ્ટા હનુમતા તત્ર ન તુ રાઘવનન્દિની ॥૨૦॥
નાગકન્યા વરારોહાઃ પૂર્ણચન્દ્રનિભાનનાઃ।
દૃષ્ટા હનુમતા તત્ર ન તુ સા જનકાત્મજા ॥૨૧॥
પ્રમથ્ય રાક્ષસેન્દ્રેણ નાગકન્યા બલાદ્ધૃતાઃ।
દૃષ્ટા હનુમતા તત્ર ન સા જનકનન્દિની ॥૨૨॥
સોઽપશ્યંસ્તાં મહાબાહુઃ પશ્યંશ્ચાન્યા વરસ્ત્રિયઃ।
વિષસાદ મહાબાહુર્હનૂમાન્મારુતાત્મજઃ॥૨૩॥
ઉદ્યોગં વાનરેન્દ્રાણાં પ્લવનં સાગરસ્ય ચ ।
વ્યર્થં વીક્ષ્યાનિલસુતશ્ચિન્તાં પુનરુપાગતઃ॥૨૪॥
અવતીર્ય વિમાનાચ્ચ હનૂમાન્મારુતાત્મજઃ।
ચિન્તામુપજગામાથ શોકોપહતચેતનઃ॥૨૫॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે દ્વાદશઃ સર્ગઃ