અથ સપ્તદશઃ સર્ગઃ
તતઃ કુમુદષણ્ડાભો નિર્મલં નિર્મલોદયઃ।
પ્રજગામ નભશ્ચન્દ્રો હંસો નીલમિવોદકમ્ ॥૧॥
સાચિવ્યમિવ કુર્વન્સ પ્રભયા નિર્મલપ્રભઃ।
ચન્દ્રમા રશ્મિભિઃ શીતૈઃ સિષેવે પવનાત્મજમ્ ॥૨॥
સ દદર્શ તતઃ સીતાં પૂર્ણચન્દ્રનિભાનનામ્ ।
શોકભારૈરિવ ન્યસ્તાં ભારૈર્નાવમિવામ્ભસિ ॥૩॥
દિદૃક્ષમાણો વૈદેહીં હનૂમાન્મારુતાત્મજઃ।
સ દદર્શાવિદૂરસ્થા રાક્ષસીર્ઘોરદર્શનાઃ॥૪॥
એકાક્ષીમેકકર્ણાં ચ કર્ણપ્રાવરણાં તથા ।
અકર્ણાં શઙ્કુકર્ણાં ચ મસ્તકોચ્છ્વાસનાસિકામ્ ॥૫॥
અતિકાયોત્તમાઙ્ગીં ચ તનુદીર્ઘશિરોધરામ્ ।
ધ્વસ્તકેશીં તથાકેશીં કેશકમ્બલધારિણીમ્ ॥૬॥
લમ્બકર્ણલલાટાં ચ લમ્બોદરપયોધરામ્ ।
લમ્બોષ્ઠીં ચિબુકોષ્ઠીં ચ લમ્બાસ્યાં લમ્બજાનુકામ્ ॥૭॥
હ્રસ્વાં દીર્ઘાં ચ કુબ્જાં ચ વિકટાં વામનાં તથા ।
કરાલાં ભુગ્નવક્ત્રાં ચ પિઙ્ગાક્ષીં વિકૃતાનનામ્ ॥૮॥
વિકૃતાઃ પિઙ્ગલાઃ કાલીઃ ક્રોધનાઃ કલહપ્રિયાઃ।
કાલાયસમહાશૂલકૂટમુદ્ગરધારિણીઃ॥૯॥
વરાહમૃગશાર્દૂલમહિષાજશિવા મુખાઃ।
ગજોષ્ટ્રહયપાદાશ્ચ નિખાતશિરસોઽપરાઃ॥૧૦॥
એકહસ્તૈકપાદાશ્ચ ખરકર્ણ્યશ્વકર્ણિકાઃ।
ગોકર્ણીર્હસ્તિકર્ણીશ્ચ હરિકર્ણીસ્તથાપરાઃ॥૧૧॥
અતિનાસાશ્ચ કાશ્ચિચ્ચ તિર્યઙ્્નાસા અનાસિકાઃ।
ગજસન્નિભનાસાશ્ચ લલાટોચ્છ્વાસનાસિકાઃ॥૧૨॥
હસ્તિપાદા મહાપાદા ગોપાદાઃ પાદચૂલિકાઃ।
અતિમાત્રશિરોગ્રીવા અતિમાત્રકુચોદરીઃ॥૧૩॥
અતિમાત્રાસ્ય નેત્રાશ્ચ દીર્ઘજિહ્વાનનાસ્તથા ।
અજામુખીર્હસ્તિમુખીર્ગોમુખીઃ સૂકરીમુખીઃ॥૧૪॥
હયોષ્ટ્રખરવક્ત્રાશ્ચ રાક્ષસીર્ઘોરદર્શનાઃ।
શૂલમુદ્ગરહસ્તાશ્ચ ક્રોધનાઃ કલહપ્રિયાઃ॥૧૫॥
કરાલા ધૂમ્રકેશિન્યો રાક્ષસીર્વિકૃતાનનાઃ।
પિબન્તી સતતં પાનં સુરામાંસસદાપ્રિયાઃ॥૧૬॥
માંસશોણિતદિગ્ધાઙ્ગીર્માંસશોણિતભોજનાઃ।
તા દદર્શ કપિશ્રેષ્ઠો રોમહર્ષણદર્શનાઃ॥૧૭॥
સ્કન્ધવન્તમુપાસીનાઃ પરિવાર્ય વનસ્પતિમ્ ।
તસ્યાધસ્તાચ્ચ તાં દેવીં રાજપુત્રીમનિન્દિતામ્ ॥૧૮॥
લક્ષયામાસ લક્ષ્મીવાન્હનૂમાઞ્જનકાત્મજામ્ ।
નિષ્પ્રભાં શોકસન્તપ્તાં મલસઙ્કુલમૂર્ધજામ્ ॥૧૯॥
ક્ષીણપુણ્યાં ચ્યુતાં ભૂમૌ તારાં નિપતિતામિવ ।
ચારિત્ર્ય વ્યપદેશાઢ્યાં ભર્તૃદર્શનદુર્ગતામ્ ॥૨૦॥
ભૂષણૈરુત્તમૈર્હીનાં ભર્તૃવાત્સલ્યભૂષિતામ્ ।
રાક્ષસાધિપસંરુદ્ધાં બન્ધુભિશ્ચ વિનાકૃતામ્ ॥૨૧॥
વિયૂથાં સિંહસંરુદ્ધાં બદ્ધાં ગજવધૂમિવ ।
ચન્દ્રરેખાં પયોદાન્તે શારદાભ્રૈરિવાવૃતામ્ ॥૨૨॥
ક્લિષ્ટરૂપામસંસ્પર્શાદયુક્તામિવ વલ્લકીમ્ ।
સ તાં ભર્તૃહિતે યુક્તામયુક્તાં રક્ષસાં વશે ॥૨૩॥
અશોકવનિકામધ્યે શોકસાગરમાપ્લુતામ્ ।
તાભિઃ પરિવૃતાં તત્ર સગ્રહામિવ રોહિણીમ્ ॥૨૪॥
દદર્શ હનુમાંસ્તત્ર લતામકુસુમામિવ ।
સા મલેન ચ દિગ્ધાઙ્ગી વપુષા ચાપ્યલઙ્કૃતા ।
મૃણાલી પઙ્કદિગ્ધેવ વિભાતિ ચ ન ભાતિ ચ ॥૨૫॥
મલિનેન તુ વસ્ત્રેણ પરિક્લિષ્ટેન ભામિનીમ્ ।
સંવૃતાં મૃગશાવાક્ષીં દદર્શ હનુમાન્કપિઃ॥૨૬॥
તાં દેવીં દીનવદનામદીનાં ભર્તૃતેજસા ।
રક્ષિતાં સ્વેન શીલેન સીતામસિતલોચનામ્ ॥૨૭॥
તાં દૃષ્ટ્વા હનુમાન્સીતાં મૃગશાવનિભેક્ષણામ્ ।
મૃગકન્યામિવ ત્રસ્તાં વીક્ષમાણાં સમન્તતઃ॥૨૮॥
દહન્તીમિવ નિઃશ્વાસૈર્વૃક્ષાન્પલ્લવધારિણઃ।
સઙ્ઘાતમિવ શોકાનાં દુઃખસ્યોર્મિમિવોત્થિતામ્ ॥૨૯॥
તાં ક્ષમાં સુવિભક્તાઙ્ગીં વિનાભરણશોભિનીમ્ ।
પ્રહર્ષમતુલં લેભે મારુતિઃ પ્રેક્ષ્ય મૈથિલીમ્ ॥૩૦॥
હર્ષજાનિ ચ સોઽશ્રૂણિ તાં દૃષ્ટ્વા મદિરેક્ષણામ્ ।
મુમોચ હનુમાંસ્તત્ર નમશ્ચક્રે ચ રાઘવમ્ ॥૩૧॥
નમસ્કૃત્વાથ રામાય લક્ષ્મણાય ચ વીર્યવાન્ ।
સીતાદર્શનસંહૃષ્ટો હનુમાન્ સંવૃતોઽભવત્ ॥૩૨॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે સપ્તદશઃ સર્ગઃ