અથ એકવિંશઃ સર્ગઃ
તસ્ય તદ્વચનં શ્રુત્વા સીતા રૌદ્રસ્ય રક્ષસઃ।
આર્તા દીનસ્વરા દીનં પ્રત્યુવાચ તતઃ શનૈઃ॥૧॥
દુઃખાર્તા રુદતી સીતા વેપમાના તપસ્વિની ।
ચિન્તયન્તી વરારોહા પતિમેવ પતિવ્રતા ॥૨॥
તૃણમન્તરતઃ કૃત્વા પ્રત્યુવાચ શુચિસ્મિતા ।
નિવર્તય મનો મત્તઃ સ્વજને ક્રિયતાં મનઃ॥૩॥
ન માં પ્રાર્થયિતું યુક્તસ્ત્વં સિદ્ધિમિવ પાપકૃત્ ।
અકાર્યં ન મયા કાર્યમેકપત્ન્યા વિગર્હિતમ્ ॥૪॥
કુલં સમ્પ્રાપ્તયા પુણ્યં કુલે મહતિ જાતયા ।
એવમુક્ત્વા તુ વૈદેહી રાવણં તં યશસ્વિની ॥૫॥
રાવણં પૃષ્ઠતઃ કૃત્વા ભૂયો વચનમબ્રવીત્ ।
નાહમૌપયિકી ભાર્યા પરભાર્યા સતી તવ ॥૬॥
સાધુ ધર્મમવેક્ષસ્વ સાધુ સાધુવ્રતં ચર ।
યથા તવ તથાન્યેષાં રક્ષ્યા દારા નિશાચર ॥૭॥
આત્માનમુપમાં કૃત્વા સ્વેષુ દારેષુ રમ્યતામ્ ।
અતુષ્ટં સ્વેષુ દારેષુ ચપલં ચપલેન્દ્રિયમ્ ।
નયન્તિ નિકૃતિપ્રજ્ઞં પરદારાઃ પરાભવમ્ ॥૮॥
ઇહ સન્તો ન વા સન્તિ સતો વા નાનુવર્તસે ।
યથા હિ વિપરીતા તે બુદ્ધિરાચારવર્જિતા ॥૯॥
વચો મિથ્યા પ્રણીતાત્મા પથ્યમુક્તં વિચક્ષણૈઃ।
રાક્ષસાનામભાવાય ત્વં વા ન પ્રતિપદ્યસે ॥૧૦॥
અકૃતાત્માનમાસાદ્ય રાજાનમનયે રતમ્ ।
સમૃદ્ધાનિ વિનશ્યન્તિ રાષ્ટ્રાણિ નગરાણિ ચ ॥૧૧॥
તથૈવ ત્વાં સમાસાદ્ય લઙ્કા રત્નૌઘ સઙ્કુલા ।
અપરાધાત્તવૈકસ્ય નચિરાદ્વિનશિષ્યતિ ॥૧૨॥
સ્વકૃતૈર્હન્યમાનસ્ય રાવણાદીર્ઘદર્શિનઃ।
અભિનન્દન્તિ ભૂતાનિ વિનાશે પાપકર્મણઃ॥૧૩॥
એવં ત્વાં પાપકર્માણં વક્ષ્યન્તિ નિકૃતા જનાઃ।
દિષ્ટ્યૈતદ્વ્યસનં પ્રાપ્તો રૌદ્ર ઇત્યેવ હર્ષિતાઃ॥૧૪॥
શક્યા લોભયિતું નાહમૈશ્વર્યેણ ધનેન વા ।
અનન્યા રાઘવેણાહં ભાસ્કરેણ યથા પ્રભા ॥૧૫॥
ઉપધાય ભુજં તસ્ય લોકનાથસ્ય સત્કૃતમ્ ।
કથં નામોપધાસ્યામિ ભુજમન્યસ્ય કસ્યચિત્ ॥૧૬॥
અહમૌપયિકી ભાર્યા તસ્યૈવ ચ ધરાપતેઃ।
વ્રતસ્નાતસ્ય વિદ્યેવ વિપ્રસ્ય વિદિતાત્મનઃ॥૧૭॥
સાધુ રાવણ રામેણ માં સમાનય દુઃખિતામ્ ।
વને વાસિતયા સાર્ધં કરેણ્વેવ ગજાધિપમ્ ॥૧૮॥
મિત્રમૌપયિકં કર્તું રામઃ સ્થાનં પરીપ્સતા ।
બન્ધં ચાનિચ્છતા ઘોરં ત્વયાસૌ પુરુષર્ષભઃ॥૧૯॥
વિદિતઃ સ હિ ધર્મજ્ઞઃ શરણાગતવત્સલઃ।
તેન મૈત્રી ભવતુ તે યદિ જીવિતુમિચ્છસિ ॥૨૦॥
પ્રસાદયસ્વ ત્વં ચૈનં શરણાગતવત્સલમ્ ।
માં ચાસ્મૈ પ્રયતો ભૂત્વા નિર્યાતયિતુમર્હસિ ॥૨૧॥
એવં હિ તે ભવેત્ સ્વસ્તિ સમ્પ્રદાય રઘૂત્તમે ।
અન્યથા ત્વં હિ કુર્વાણઃ પરાં પ્રાપ્સ્યસિ ચાપદમ્ ॥૨૨॥
વર્જયેદ્વજ્રમુત્સૃષ્ટં વર્જયેદન્તકશ્ચિરમ્ ।
ત્વદ્વિધં ન તુ સઙ્ક્રુદ્ધો લોકનાથઃ સ રાઘવઃ॥૨૩॥
રામસ્ય ધનુષઃ શબ્દં શ્રોષ્યસિ ત્વં મહાસ્વનમ્ ।
શતક્રતુવિસૃષ્ટસ્ય નિર્ઘોષમશનેરિવ ॥૨૪॥
ઇહ શીઘ્રં સુપર્વાણો જ્વલિતાસ્યા ઇવોરગાઃ।
ઇષવો નિપતિષ્યન્તિ રામલક્ષ્મણલક્ષિતાઃ॥૨૫॥
રક્ષાંસિ નિહનિષ્યન્તઃ પુર્યામસ્યાં ન સંશયઃ।
અસમ્પાતં કરિષ્યન્તિ પતન્તઃ કઙ્કવાસસઃ॥૨૬॥
રાક્ષસેન્દ્રમહાસર્પાન્સ રામગરુડો મહાન્ ।
ઉદ્ધરિષ્યતિ વેગેન વૈનતેય ઇવોરગાન્ ॥૨૭॥
અપનેષ્યતિ માં ભર્તા ત્વત્તઃ શીઘ્રમરિન્દમઃ।
અસુરેભ્યઃ શ્રિયં દીપ્તાં વિષ્ણુસ્ત્રિભિરિવ ક્રમૈઃ॥૨૮॥
જનસ્થાને હતસ્થાને નિહતે રક્ષસાં બલે ।
અશક્તેન ત્વયા રક્ષઃ કૃતમેતદસાધુ વૈ ॥૨૯॥
આશ્રમં તત્તયોઃ શૂન્યં પ્રવિશ્ય નરસિંહયોઃ।
ગોચરં ગતયોર્ભ્રાત્રોરપનીતા ત્વયાધમ ॥૩૦॥
ન હિ ગન્ધમુપાઘ્રાય રામલક્ષ્મણયોસ્ત્વયા ।
શક્યં સન્દર્શને સ્થાતું શુના શાર્દૂલયોરિવ ॥૩૧॥
તસ્ય તે વિગ્રહે તાભ્યાં યુગગ્રહણમસ્થિરમ્ ।
વૃત્રસ્યેવેન્દ્રબાહુભ્યાં બાહોરેકસ્ય વિગ્રહે ॥૩૨॥
ક્ષિપ્રં તવ સ નાથો મે રામઃ સૌમિત્રિણા સહ ।
તોયમલ્પમિવાદિત્યઃ પ્રાણાનાદાસ્યતે શરૈઃ॥૩૩॥
ગિરિં કુબેરસ્ય ગતોઽથવાલયં
	સભાં ગતો વા વરુણસ્ય રાજ્ઞઃ।
અસંશયં દાશરથેર્વિમોક્ષ્યસે
	મહાદ્રુમઃ કાલહતોઽશનેરિવ ॥૩૪॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે એકવિંશઃ સર્ગઃ