અથ ત્રયોવિંશઃ સર્ગઃ
ઇત્યુક્ત્વા મૈથિલીં રાજા રાવણઃ શત્રુરાવણઃ।
સન્દિશ્ય ચ તતઃ સર્વા રાક્ષસીર્નિર્જગામ હ ॥૧॥
નિષ્ક્રાન્તે રાક્ષસેન્દ્રે તુ પુનરન્તઃપુરં ગતે ।
રાક્ષસ્યો ભીમરૂપાસ્તાઃ સીતાં સમભિદુદ્રુવુઃ॥૨॥
તતઃ સીતામુપાગમ્ય રાક્ષસ્યઃ ક્રોધમૂર્છિતાઃ।
પરં પરુષયા વાચા વૈદેહીમિદમબ્રુવન્ ॥૩॥
પૌલસ્ત્યસ્ય વરિષ્ઠસ્ય રાવણસ્ય મહાત્મનઃ।
દશગ્રીવસ્ય ભાર્યાત્વં સીતે ન બહુ મન્યસે ॥૪॥
તતસ્ત્વેકજટા નામ રાક્ષસી વાક્યમબ્રવીત્ ।
આમન્ત્ર્ય ક્રોધતામ્રાક્ષી સીતાં કરતલોદરીમ્ ॥૫॥
પ્રજાપતીનાં ષણ્ણાં તુ ચતુર્થોઽયં પ્રજાપતિઃ।
માનસો બ્રહ્મણઃ પુત્રઃ પુલસ્ત્ય ઇતિ વિશ્રુતઃ॥૬॥
પુલસ્ત્યસ્ય તુ તેજસ્વી મહર્ષિર્માનસઃ સુતઃ।
નામ્ના સ વિશ્રવા નામ પ્રજાપતિસમપ્રભઃ॥૭॥
તસ્ય પુત્રો વિશાલાક્ષિ રાવણઃ શત્રુરાવણઃ।
તસ્ય ત્વં રાક્ષસેન્દ્રસ્ય ભાર્યા ભવિતુમર્હસિ ॥૮॥
મયોક્તં ચારુસર્વાઙ્ગિ વાક્યં કિં નાનુમન્યસે ।
તતો હરિજટા નામ રાક્ષસી વાક્યમબ્રવીત્ ॥૯॥
વિવૃત્ય નયને કોપાન્માર્જારસદૃશેક્ષણા ।
યેન દેવાસ્ત્રયસ્ત્રિંશદ્દેવરાજશ્ચ નિર્જિતઃ॥૧૦॥
તસ્ય ત્વં રાક્ષસેન્દ્રસ્ય ભાર્યા ભવિતુમર્હસિ ।
વીર્યોત્સિક્તસ્ય શૂરસ્ય સઙ્ગ્રામેષ્વનિવર્તિનઃ।
બલિનો વીર્યયુક્તસ્ય ભાર્યા ત્વં કિં ન લિપ્સસે ॥૧૧॥
પ્રિયાં બહુમતાં ભાર્યાં ત્યક્ત્વા રાજા મહાબલઃ।
સર્વાસાં ચ મહાભાગાં ત્વામુપૈષ્યતિ રાવણઃ॥૧૨॥
સમૃદ્ધં સ્ત્રીસહસ્રેણ નાનારત્નોપશોભિતમ્ ।
અન્તઃપુરં તદુત્સૃજ્ય ત્વામુપૈષ્યતિ રાવણઃ॥૧૩॥
અન્યા તુ વિકટા નામ રાક્ષસી વાક્યમબ્રવીત્ ।
અસકૃદ્ ભીમવીર્યેણ નાગા ગન્ધર્વદાનવાઃ।
નિર્જિતાઃ સમરે યેન સ તે પાર્શ્વમુપાગતઃ॥૧૪॥
તસ્ય સર્વસમૃદ્ધસ્ય રાવણસ્ય મહાત્મનઃ।
કિમર્થં રાક્ષસેન્દ્રસ્ય ભાર્યાત્વં નેચ્છસેઽધમે ॥૧૫॥
તતસ્તાં દુર્મુખી નામ રાક્ષસી વાક્યમબ્રવીત્ ।
યસ્ય સૂર્યો ન તપતિ ભીતો યસ્ય સ મારુતઃ।
ન વાતિ સ્માયતાપાઙ્ગિ કિં ત્વં તસ્ય ન તિષ્ઠસે ॥૧૬॥
પુષ્પવૃષ્ટિં ચ તરવો મુમુચુર્યસ્ય વૈ ભયાત્ ।
શૈલાઃ સુસ્ત્રુવુઃ પાનીયં જલદાશ્ચ યદેચ્છતિ ॥૧૭॥
તસ્ય નૈરૃતરાજસ્ય રાજરાજસ્ય ભામિનિ ।
કિં ત્વં ન કુરુષે બુદ્ધિં ભાર્યાર્થે રાવણસ્ય હિ ॥૧૮॥
સાધુ તે તત્ત્વતો દેવિ કથિતં સાધુ ભામિનિ ।
ગૃહાણ સુસ્મિતે વાક્યમન્યથા ન ભવિષ્યસિ ॥૧૯॥
ઇત્યાર્ષે શ્રીમદ્્રામાયણે વાલ્મીકીયે આદિકાવ્યે સુન્દરકાણ્ડે ત્રયોવિંશઃ સર્ગઃ